Minabarony Biełarusi prapanavała Polščy adnavić vajskovaje supracoŭnictva. Tam nahadali pra mižnarodnyja normy
Žurnalist polskaha vydańnia RMF24 Kšyštaf Zasada aznajomiŭsia ź pierapiskaj biełaruskaha Ministerstva abarony z polskim MZS i raskazaŭ, pra što tam išła havorka.
U červieni Ministerstva abarony Biełarusi nakiravała Polščy prapanovu adnavić dyjałoh pra biaśpieku i stabilnaść u rehijonie, papiaredziŭšy, što adsutnaść razmoŭ moža pryvieści da «novaj vajny ŭ Jeŭropie», u tym liku na terytoryi Biełarusi i Polščy.
MZS Polščy adkazała kateharyčnaj admovaj, patłumačyŭšy, što apošnija čatyry hady Biełaruś viadzie suprać Polščy varožyja hibrydnyja dziejańni, u tym liku arhanizavanyja situacyi na miažy. Taksama Minsk padtrymaŭ ahresiju Rasii suprać Ukrainy i dazvoliŭ vykarystoŭvać svaju terytoryju dla napadaŭ, u vyniku jakich hinuć mirnyja ludzi i razburajecca infrastruktura.
Polski bok padkreśliŭ, što vajskovaje supracoŭnictva patrabuje vykanańnia minimalnych mižnarodnych normaŭ i ŭzajemnaha davieru, čaho ciapier niama, tamu «niama prastory» navat dla pačatku pieramoŭ.
Paśla atrymańnia hetaha adukazu u Biełarusi apublikavali zajavu načalnika Departamienta mižnarodnaha vajskovaha supracoŭnictva — pamočnika ministra abarony Respubliki Biełaruś Valeryja Ravienki. U joj vykazvałasia zaniepakojenaść rostam vajskovych vydatkaŭ Polščy, budaŭnictvam umacavańniaŭ u miežach prajekta «Ščyt Uschodu», kancentracyjaj kala miažy 11 tysiač vajskoŭcaŭ i mahčymym vychadam Varšavy z Ataŭskaj kanviencyi ab zabaronie supraćpiachotnych min. U Minsku zajavili, što jaho inicyjatyva dyjałohu była, maŭlaŭ, praihnaravanaja i abvinavaciŭ Polšču ŭ vykanańni «zahadaŭ z-za miažy», nakiravanych na eskałacyju kanfliktu.
Biełaruski bok zaklikaŭ Polšču zrabić «pravilny vybar» na karyść miru i biaśpieki, zajaviŭšy pra hatoŭnaść viarnucca da raniejšych pahadnieńniaŭ i pašyryć miery prazrystaści i davieru.
«Zasiarodžusia na pracy z ZŠA». Cichanoŭski raskazaŭ pra svaje palityčnyja płany na 2026 hod22
Kamientary