Adnačasova dźvie avaryi pad Minskam, paciarpieli niekalki čałaviek. Ludzi kažuć pra začaravany ŭčastak trasy
U sieradu ranicaj paviedamili pra DTZ u Minskim rajonie. U kiuviecie apynuŭsia lehkavy aŭtamabil. Adbyłosia heta niedaloka ad Ratamki, mierkavana, na trasie R28 (Minsk — Maładziečna — Narač). Paźniej stała viadoma, što amal u toj samy čas na hetym ža ŭčastku adbyłasia jašče adna avaryja z paciarpiełymi.
— Vyśvietliłasia, što kiroŭca nie spraviŭsia z kiravańniem, i aŭtamabil źjechaŭ u kiuviet, — raspaviali ŭ MNS. — Z dapamohaj hidraŭličnaha instrumienta rabotniki MNS debłakavali pasažyrku i pieradali jaje miedykam. Paciarpiełuju dastavili ŭ balnicu.
Nastupstvy avaryi bačyŭ adzin ź internet-karystalnikaŭ.
— Čas — niedzie 07:40. Niešta surjoznaje. Trasa Minsk — Maładziečna, kala Minskaha mora. Dva aŭto za miežami prajeznaj častki, adno — na dachu, — raspavioŭ jon.
Adrazu niekalki čytačoŭ paviedamili Onlíner, što hetaja avaryja adbyłasia na ŭčastku trasy, jaki, na ich dumku, stanovicca vielmi niebiaśpiečnym padčas daždžu.
— Mnie padajecca, užo para razabracca z hetym začaravanym miescam. Tut pastajanna avaryi padčas daždžu, bo niepadalok utvarajecca łužyna na pavarocie darohi. Ja prajazdžaju tut čatyry razy na tydzień, i ź vierahodnaściu 50% u mocny doždž tut niechta lažyć u kiuviecie. U majho siabra žonka tut ža vylecieła. My pajšli šukać adlacieŭšy parktronik i znajšli frahmienty dvuch-troch inšych aŭtamabilaŭ, — raspavioŭ adzin z čytačoŭ.
Inšy paviedamiŭ pra DTZ, jakoje adbyłosia tut ža ŭ 2020 hodzie z udziełam jahonaj žonki.
— Tam u doždž vada ściakaje z abočyny da centra i nazapašvajecca ŭ levaj pałasie. Mašyna prajazdžaje na chutkaści zakruhleńnie darohi i łović levymi kołami hetuju vadu. Potym adlataje spačatku ŭ adbojnik, paśla ŭ kiuviet, — adznačyŭ jon. — Tak adbyłosia z majoj žonkaj, jana była za styrnom Tesla. Joj tady pašancavała, što nie pierakuliłasia. Dakładna hetak ža, kali pačynajecca doždž, vylatajuć inšyja aŭto.
DAI Minskaj vobłaści paviedamiła padrabiaznaści ranišnich padziej. Akazvajecca, amal u adzin i toj ža čas na adnym učastku darohi adbylisia dźvie avaryi.
— 23 lipienia ŭ 07:40 na 15-m km aŭtadarohi R28 «Minsk — Maładziečna — Narač» 41-hadovy kiroŭca, ruchajučysia na aŭtamabili Lada ŭ napramku Minska, nie spraviŭsia z kiravańniem, źjechaŭ u pravy kiuviet, dzie pierakuliŭsia, — paviedamlajecca pra pieršaje DTZ, u vyniku jakoha paciarpieŭ 13-hadovy pasažyr.
Dzicia z traŭmami špitalizavana.
— Litaralna ŭ toj ža čas na hetym ža ŭčastku aŭtadarohi 53-hadovy kiroŭca, ruchajučysia na aŭtamabili Peugeot u napramku Minska, nie spraviŭsia z kiravańniem i ździejśniŭ sutyknieńnie z darožnaj aharodžaj, dalej aŭto adkinuła na abočynu, dzie adbyŭsia najezd na aśviatlalnuju mačtu, paśla čaho aŭtamabil pierakuliŭsia ŭ kiuviet, — paviedamiła padrabiaznaści druhoha zdareńnia DAI HUUS Minabłvykankama. U hetaj avaryi paciarpieli kiroŭca, a taksama 62-hadovaja i 42-hadovaja žančyny-pasažyrki.
Ciapier čytajuć
«Ludzi, budźcie pilnyja! U takoj situacyi moža apynucca kožny žychar ES!» Hramadzianin Litvy, asudžany ŭ Biełarusi da 13 hadoŭ za «špijanaž», pieradaŭ list z kałonii37
«Ludzi, budźcie pilnyja! U takoj situacyi moža apynucca kožny žychar ES!» Hramadzianin Litvy, asudžany ŭ Biełarusi da 13 hadoŭ za «špijanaž», pieradaŭ list z kałonii
«Niezaležnaść nie padaje ź nieba i nie dajecca nazaŭsiody. Jaje treba abaraniać». Cichanoŭskaja vystupiła z zajavaj da 35-hodździa pryniaćcia Dekłaracyi ab suvierenitecie4545
Kamientary