Karaleva NATA. Chto heta zahadkavaja žančyna ŭ žoŭtym, jakaja ŭraziła ŭsich na samicie
«Łedzi ŭ žoŭtym», «karaleva NATA» — tak užo paśpieli prazvać u sacsietkach jarkuju žančynu, jakaja ŭ kaściumie kanarejkavaha adcieńnia efiektna vydzialałasia siarod lidaraŭ krain — členaŭ abarončaha aljansu ŭ Haazie, piša Bi-bi-si.
Heta Maksima, karaleva Niderłandaŭ. I ŭ hetym hodzie, kali ŭdzielniki NATA prybyli na samit u Haazie, jana źjaŭlajecca haspadyniaj hetaha mierapryjemstva.
Razam z mužam, karalom Vilemam-Alaksandram, jana vitaje haściej, jakija prybyli na padzieju.
Siarod ich i Donald Tramp. Jašče niekalki hadzin tamu prezident ZŠA nie strymlivaŭ łajanki, apisvajučy pieramirje pamiž Izrailem i Iranam, a padčas znajomstva z karalevaj Maksimaj vyhladaje natchnionym, uśmiešlivym, vierahodna zachoplenym jaje šarmam.
Niderłandcy zusim nie ździŭleny — ichniaja karaleva, jakuju ŭ krainie spačatku ŭspryniali chałodna, užo 12 hadoŭ nie pierastaje pryjemna ich ździŭlać. Jaje lubiać za žvavaść, sapraŭdnaść, umieńnie źmiakčać vuhły.
Maksima: ź Ńju‑Jorka — na tron
Maci traich dziaciej, viadomaja svaim pačućciom stylu, byłaja inviestycyjnaja bankirka ź Ńju‑Jorka.
Paśpiachovaja bankirka arhiencinskaha pachodžańnia paznajomiłasia sa svaim budučym mužam, tahačasnym kronpryncam Vilemam-Alaksandram, na viečarynie ŭ Ispanii ŭ 1999 hodzie.
Jany chutka zakachalisia, ale kali presa daviedałasia — pačaŭsia skandał.
Baćka Maksimy, Chorche Sarehijeta, byŭ ministram sielskaj haspadarki padčas vajskovaj dyktatury Arhienciny ŭ časy sumna viadomaj «Brudnaj vajny». Tady tam represavali tysiačy ludziej.
I choć Maksima ŭ toj čas była dziciom, hetaja suviaź vyklikała šmat sprečak u Niderłandach.
Niekatory čas navat išła kampanija za aryšt Sarehijety i jaho pryciahnieńnie da suda za złačynstvy suprać humannaści, kali jon pryjechaŭ by ŭ Niderłandy.
Ale kaniec sprečkam pakłała byłaja karaleva Bieatryks, maci prynca. Jana viedała, jak heta — bo jaje zaručyny z byłym členam Hitlerajuhiendu ŭ 1965 taksama ŭsprymalisia nieadnaznačna.
Karaleva błasłaviła šlub starejšaha syna, apisaŭšy Maksimu jak «razumnuju i sučasnuju žančynu».
Ale baćka Maksimy na viasielli ŭsio ž taki nie byŭ, jamu nie dazvolili pryjazdžać da dački.
Nie ŭvajšoŭ jon i ŭ śpis haściej na inaŭhuracyi ŭ 2013 hodzie. Chorche Sarehijeta hladzieŭ, jak jaho dačka stanovicca karalevaj, pa televizary.
Ale paźniej parłamient dazvoliŭ Sarehijecie i jaho žoncy naviedać chrost ich troch unučak.
«My lubim jaje, u joj jość zapał»
Zvyčajnyja niderłandcy palubili Maksimu adrazu paśla viasiella.
Jany byli ŭražanyja tym, što jana adrazu paśla pierajezdu pačała vyvučać hałandskuju movu i dasiahnuła ŭ hetym pośpiechaŭ.
«Jana pryjšła i pieramahła», — kaža hałandski historyk Chienk te Vielde pra jaje źjaŭleńnie ŭ hramadskim žyćci Niderłandaŭ.
Łacinaamierykanskija karani Maksimy nadajuć joj pryvabnaści, pa słovach historyka Chana van Bry, jaki śpiecyjalizujecca na hałandskim karaleŭskim rodzie.
«Jana ekzatyčnaja, u joj jość zapał, blask i jarkaść, i jana nie sprabuje być addalenaj, jak Bieatryks», — raskazvaŭ jon karespandentcy BBC Ani Chalihan u 2013 hodzie.
«My lubim jaje za heta, ludzi mohuć adčuć jaje aŭtentyčnaść»
Ź dziacinstva Vilem-Alaksandr mieŭ składanyja adnosiny z presaj.
«Jon nie skazaŭ ŚMI «iści na…», jak paviedamlałasia, kali jamu było 11 hadoŭ, ale heta było niešta padobnaje», — raspaviadaŭ Van Bry.
Jon zaŭsiody byŭ saramlivy na publicy, strymany, kažuć ahladalniki, ale z Maksimaj vyhladaje bolš rassłablenym.
Siońnia niderłandcy lubiać svaju karalevu, a ahladalniki čas ad času nazyvajuć jaje «samaj cikavaj karaleŭskaj asobaj».
Karaleva mody
Akramia jaje dasiahnieńniaŭ doma i ŭ siamiejnym žyćci, publika ź pieršaha dnia abmiarkoŭvaje jaje vopratku.
Karaleva Maksima viadomaja ŭ Niderłandach i za ich miežami jarkim stylem i ŭmieńniem spałučać elehantnyja sukienki i śmiełyja, adnakolernyja styli.
Ad kanareječna-žoŭtaha žanočaha kaściuma-tuniki padčas dziaržaŭnaha vizitu ŭ Bruniej da kaskadnaj sukienki koleru šampanskaha na adkryćci parłamienta ŭ 2011 hodzie.
U presie jość navat hajdy pra toje, «jak apranacca, jak karaleva Maksima». Heta žančyna razumieje, jak vykarystoŭvać siłu pieršaha ŭražańnia.
Jaje ekstravahantnaja viasielnaja sukienka koleru słanovaj kości z šoŭku mikada była ad Valentino.
A jaje paźniejšyja ŭbory na roznych važnych padziejach nie raz pryciahvali ŭvahu presy, znoŭ i znoŭ traplajučy ŭ zahałoŭki.
Viadomyja taksama jaje stroi z Ukrainy, naprykład padčas vizitu na Kubu ŭ 2023 hodzie, dzie Maksima była apranuta ŭ vyšyvanuju sukienku ad ukrainskaha brenda Foberini.
Na samicie NATA, dzie Maksima vyłučyłasia svaim žoŭtym kaściumam, zvyčajna addajuć pieravahu bolš strymanym koleram.
Choć jak takoha dres-kodu niama — na zdymkach ź minułych samitaŭ možna ŭbačyć lidarak krain i ŭ srebry, i ŭ aślaplalna-biełym, i ŭ fuksijevych kaściumach.
Sa źjaŭleńniem u palitycy Ursuły fon der Lajen, jakaja lubić biełyja ci ružovyja pinžaki, na zdymkach lidaraŭ krain biezumoŭna pavažała kolkaść koleraŭ.
I mužčyny-palityki, jak vidać na fotazdymkach, taksama addajuć pieravahu roznym koleram halštukaŭ na aficyjnych fota.
Ale heta, zdajecca, pieršy raz, kali karaleŭskaja asoba, pradstaŭnica krainy — haspadyni samitu, tak paśpiachova zmahła pierachapić uvahu, pryciahnuŭšy da siabie pozirki nie tolki sacsietak, ale i suśvietnych lidaraŭ.
Ciapier čytajuć
Cichanoŭski na mitynhu ŭ Varšavie: Ja złamaju hety režym VIDEA4
Kamientary