Stała viadoma jašče pra adnaho biełarusa, jaki vajavaŭ na baku Rasii i trapiŭ u pałon
Stała viadoma jašče pra adnaho biełarusa, jaki vajavaŭ na baku Rasii i trapiŭ va ŭkrainski pałon. Ciapier jon maje status vajennapałonnaha i moža trapić u śpis budučych abmienaŭ pamiž Rasijaj i Ukrainaj. Heta Artur Arakielan.
Hramadzianinu Biełarusi Arturu Arakielanu, jaki vajavaŭ na baku Rasii, jašče nie spoŭniłasia 21 hoda. Jon trapiŭ va ŭkrainski pałon sioleta ŭ mai.
Jak paviedamili Radyjo Svaboda va ŭkrainskim prajekcie Kaardynacyjnaha štaba Ukrainy ŭ pytańniach abychodžańnia z vajennapałonnymi «Chaču žyć», Arakielan Artur Sahatełavič naradziŭsia 13 śniežnia 2004 hoda, pachodzić z Homielskaj vobłaści, Śvietłahorskaha rajona, z ahraharadka Piečyščy.
Jak udałosia vyśvietlić «Svabodzie», Artur Arakielan źjaŭlajecca vypusknikom Piečyščanskaj siaredniaj škoły, ale tam nie viedajuć, čym jon zajmajecca i dzie ciapier znachodzicca. Artur, jak i jaho maci Anžeła, źjaŭlajecca hramadzianinam Biełarusi. Hramadzianstva baćki Sahateła nie ŭdałosia pravieryć, ale miascovyja žychary śćviardžajuć, što jon časta jeździć na zarobki ŭ Rasiju.
Pavodle infarmacyi ŭkrainskaha prajekta, Artura Arakielana ŭziali ŭ pałon padčas bajoŭ u Łuhanskaj vobłaści.
Jon vajavaŭ u 27-m motastrałkovym pałku 25-j ahulnavajskovaj armii. Hety połk byŭ stvorany ŭ 2023 hodzie ŭ miežach uzmacnieńnia hrupoŭki vojskaŭ dla vajny va Ukrainie, ciapier uvachodzić u skład hrupoŭki vojskaŭ «Zachad» i dziejničaje na krasnalimanskim napramku ŭ Łuhanskaj vobłaści.
Detalaŭ pra toje, jak jon trapiŭ na vajnu va Ukrainu, niama. Ciapier jon maje status vajennapałonnaha i moža trapić u śpis budučych abmienaŭ pamiž Rasijaj i Ukrainaj.
«Svaboda» taksama źviarnułasia da inicyjatyvy «Kibierpartyzany» pa dadatkovuju infarmacyju pra Artura Arakielana.
Supolnaść paćvierdziła jaho datu naradžeńnia i pachodžańnie. Paśviedčańnie ab jaho naradžeńni było vydadziena 2 lutaha 2005 hoda Sińkoŭskim sielsavietam Smarhonskaha rajona.
Zhodna ź infarmacyjaj, jakoj «Kibierpartyzany» majuć u rasparadžeńni, Piečyščanskuju škołu Artur Arakielan moh skončyć u 2019 hodzie. Potym, jak vynikaje z zapisu ab jaho pracoŭnaj dziejnaści pa stanie na 21 lipienia 2020 hoda, jon pracavaŭ u miascovaj sielskaj haspadarcy «Prahres-Ahra», jakuju ŭ 2023 hodzie likvidavali i dałučyli da kamunalnaha sielskahaspadarčaha pradpryjemstva «Paleskaje» z centram u ahraharadku Paleśsie Śvietłahorskaha rajona Homielskaj vobłaści.
Jaho maci Anžeła pa stanie na 2017 hod taksama pracavała ŭ «Prahres-Ahra», była dajarkaj. Dadatkovaj infarmacyi pra baćku Sahateła niama.
-
«Pahladzicie na toje, što adbyvajecca va Ukrainie prosta zaraz, u hetuju chvilinu». Eks-prezident Juščanka źviarnuŭsia z adkrytym listom da Trampa
-
U Biełarusi ŭpieršyniu źjaviłasia łamanaja raźmietka
-
Byłoha vykładčyka duchoŭnaha vučylišča, jaki žanaty z maładziejšaj za jaho na 30 hod studentkaj, vypuścili ź izrailskaj palicyi
Ciapier čytajuć
Jamu vybili čatyry zuby, a paśla vykinuli z krainy. Ciapier byłoha palitviaźnia aryštavali ŭ Łatvii z šaściu mihrantami ŭ mašynie19
Kamientary