Kiraŭnikom brytanskaj raźviedki ŭpieršyniu ŭ historyi stanie žančyna — Blejz Mietrevieli
Kiraŭnikom brytanskaj źniešniaj raźviedki, viadomaj va ŭsim śviecie jak lehiendarnaja MI6, upieršyniu za jaje 116-hadovuju historyju stanie žančyna — 47-hadovaja Blejz Mietrevieli. Pra pryznačeńnie Mietrevieli ŭ niadzielu abviaściła pres-słužba brytanskaha ŭrada, piša Bi-bi-si.
Jana źmienić ciapierašniaha kiraŭnika MI6 Ryčarda Mura hetaj vosieńniu.
Blejz Mietrevieli pastupiła na słužbu ŭ raźviedku ŭ 1999 hodzie, jašče kali była studentkaj Kiembrydža. Zaraz jana ŭznačalvaje ŭ MI6 adździeł technałohij i inavacyj, to-bok źjaŭlajecca členam kiraŭnictva raźviedki, jaki dla publiki abaznačajecca litaraj Q, a da hetaha zajmała roznyja kiraŭničyja pasady ŭ słužbie kontrraźviedki — MI5.
Vialikuju častku svajoj karjery raźviedčycy Blejz Mietrevieli praviała na Blizkim Uschodzie i ŭ Jeŭropie.
Kiraŭnik raźviedki taksama maje litarnaje abaznačeńnie — C — ale pry hetym jon źjaŭlajecca adzinym čałaviekam u słužbie, čyjo sapraŭdnaje imia abnarodujecca.
MI6 zajmajecca zboram infarmacyi za miažoj, supraćdziejańniem varožym dziaržavam i baraćboj z teraryzmam.
Pres-słužba ŭrada pieradaje słovy Mietrevieli pra toje, što MI6 razam z kontrraźviedkaj MI5 i kibierraźviedkaj GCHQ adyhryvajuć najvažniejšuju rolu ŭ zabieśpiačeńni biaśpieki naroda Brytanii i prasoŭvańni brytanskich intaresaŭ za miažoj.
«Ja budu rada praciahvać hetuju pracu pobač z advažnymi supracoŭnikami i ahientami MI6 i mnohimi našymi zamiežnymi partniorami», — skazała Mietrevieli.
U 2021 hodzie, razmaŭlajučy z hazietaj Telegraph pad psieŭdanimam «dyrektar K» słužby MI5, Blejz Mietrevieli kazała, što pahrozu dla Brytanii ŭjaŭlajuć «dziejańni rasijskaj dziaržavy — [ale] nie sama Rasija», i što Kitaj «źmianiaje śviet, što stvaraje dla Brytanii dzivosnyja mahčymaści i adnačasova pahrozu».
Jak adznačaje ahladalnik BBC Frenk Hardnier, Mietrevieli ŭznačalić raźviedku ŭ časy, kali jana sutykajecca ź biesprecedentnymi i šmatlikimi ciažkimi zadačami.
Pa-pieršaje, heta niebiaśpieka, jakuju ŭjaŭlajuć Rasija, Kitaj, Iran i Paŭnočnaja Kareja, jakija ŭsio aktyŭniej supracoŭničajuć pamiž saboj u spravie padryvu pazicyj Zachadu ŭvohule i Brytanii ŭ pryvatnaści va ŭsim śviecie.
«Ale jość i prablemy techničnaha charaktaru, — praciahvaje Hardnier. — U epochu imklivych ličbavych inavacyj, kali stolki raźvieddanych źbirajecca anłajn i z kosmasu, MI6 davodzicca ŭsio chutčej krucić piedali, kab nie adstać ad času i apiaredzić vorahaŭ».
Premjer-ministr Vialikabrytanii Kir Starmier, čyje słovy pryvodzić pres-słužba ŭrada, nazvaŭ pryznačeńnie Mietrevieli histaryčnym i padkreśliŭ, što praca raźviedki ciapier važnaja jak nikoli.
Ryčard Mur, jaki ŭznačalvaŭ MI6 apošnija piać hadoŭ i sastupić hetu pasadu Blejz Mietrevieli, taksama nazvaŭ jaje pryznačeńnie histaryčnym.
«Blejz — vysokaprafiesijny supracoŭnik raźviedki i kiraŭnik, jana — adzin z najlepšych našych rozumaŭ u śfiery technałohij», — skazaŭ ser Ryčard.
Kamientary