Siońnia ŭ Paŭdniovaj Karei prajšli daterminovyja vybary.
Nastupnym prezidentam Paŭdniovaj Karei stanie Li Čže Mion ad libieralnaj «Demakratyčnaj partyi», vynikaje z vynikaŭ ekzitpołaŭ, pieradaje Reuters. Padlik hałasoŭ užo pačaŭsia, aficyjnyja vyniki čakajucca viečaram u aŭtorak abo ranicaj u sieradu.
Li Čže Mion ličyŭsia favarytam, a Kim Mun Su byŭ kandydatam ad kansiervatyŭnaj partyi adchilenaha prezidenta Hramadzianskaja siła».
Li, pavodle apošnich pieradvybarčych apytańniaŭ, apiaredžvaŭ Kima na 10—14%, i jaho padtrymlivajuć da pałovy vybarščykaŭ. U vybarach brali ŭdzieł jašče try kandydaty.
Vybary prachodziać u adzin tur, to bok toj, chto atrymaje prostuju bolšaść, adrazu stanovicca prezidentam i kiraŭnikom vykanaŭčaj ułady ŭ Paŭdniovaj Karei.
Li Čže Mion udzielničaŭ i ŭ papiarednich prezidenckich vybarach u 2022 hodzie i prajhraŭ Jun Sok Jolu mienš čym na adzin pracent.
Kim ža byŭ ministram u ŭradzie Jun Sok Jola. Li padčas pieradvybarčaj kampanii abvinavačvaŭ Kima i jaho paplečnikaŭ pa partyi «Hramadzianskaja siła» ŭ tym, što jany spryjali sprobie Juna ŭvieści vajennaje stanovišča, a zatym sprabavali dapamahčy prezidentu ŭtrymacca va ŭładzie.
Prezident Jun Sok Jol 3 śniežnia minułaha hoda sprabavaŭ uvieści vajennaje stanovišča, zahadaŭšy vajskoŭcam uziać pad kantrol parłamient. Sproba pravaliłasia, vyklikaŭšy najhłybiejšy palityčny kryzis u krainie.
14 śniežnia parłamient, u jakim bolšaść miescaŭ naležyć apazicyi, prahałasavaŭ za impičmient Juna, 15 studzienia jon byŭ aryštavany, a 4 krasavika Kanstytucyjny sud paćvierdziŭ impičmient, paśla čaho byli pryznačanyja pazačarhovyja prezidenckija vybary.
Vital z-pad Vilejki, jaki padpaliŭ chatu z ułasnymi dziećmi, zavierbavaŭsia ŭ rasijskaje vojska. I prapaŭ na pieršym ža bajavym zadańni5
Kamientary