Biełaruskija i rasijskija jutub-kanały centralizavana baniać niaŭhodnych kamientataraŭ
Hałoŭny redaktar Reform.news Fiodar Paŭlučenka, zabłakavany na YouTube-kanale Biełteleradyjokampanii, vyjaviŭ, što trapiŭ u ban i na dziasiatkach inšych kanałaŭ — nie tolki biełaruskich dziaržaŭnych, ale i rasijskich, uklučajučy «Komsomolskuju pravdu» i pravasłaŭny telekanał «Sojuz». Heta śviedčyć pra niepubličnuju, ale ciesnuju techničnuju kaardynacyju pamiž prapahandystami ź Biełarusi i Rasii. Voś što raskazaŭ Fiodar Paŭlučenka na Reform.news.
«Niekalki miesiacaŭ tamu pa pracy hladzieŭ pramuju tranślacyju na jutub-kanale Biełteleradyjokampanii i, jak heta byvaje, nie vytrymaŭ, adznačyŭsia ŭ čacie — napisaŭ niešta ŭ styli «Saša, što ty niasieš?!». Tut ža byŭ zabanieny. Nu, byvaje, nie vialikaja strata, — piša Paŭlučenka. —
Cikavaje pačałosia potym. Akazałasia, ban u dačynieńni da majho akaŭnta (ź inšaha akaŭnta ŭsio dastupna) spracavaŭ na dziasiatkach kanałaŭ z roznych krain. Ciapier užo nie ŭspomniu ŭsio, ale byli vielmi niečakanyja. Siońnia pravieryŭ jašče raz, i voś što ŭdałosia sabrać.
Mianie zabłakavali biełaruskija kanały ANT, NEWS.by, STB, VajenTB, SBTV, BiełTA, «Biełaruś 24», TRK «Brest», Pieršy nacyjanalny kanał biełaruskaha radyjo i niekatoryja inšyja kanały, źviazanyja z aficyjnaj dziaržaŭnaj biełaruskaj prapahandaj.
Tut usio bolš-mienš zrazumieła. Biełaruskaja dziaržaŭnaja prapahanda sinchranizavanaja i kirujecca z adnaho centra. Chacia i davoli dziŭna, što takija drobnyja techničnyja rečy, jak ban karystalnikaŭ, centralizavany.
Ale akazałasia, da toj ža adzinaj bazy zabaniennych karystalnikaŭ padklučany i bujnyja rasijskija prajekty. Dostup dla mianie, naprykład, začynili na jutub-kanale rasijskaj haziety «Kamsamolskaja praŭda» z 2,24 młn padpisčykaŭ.
Ździviŭ pravasłaŭny telekanał «Sajuz». Jon zasnavany Jekaciarynburhskaj jeparchijaj Ruskaj Pravasłaŭnaj Carkvy 31 studzienia 2005 hoda. Na jaho jutub-kanale ja taksama byŭ zabanieny».
Jak jany heta robiać?
Usio dastatkova prosta, tłumačyć Paŭlučenka.
«U naładach jutub-kanała ŭ raździele «Schavanyja karystalniki» možna skapijavać śpis zabaniennych i pieranieści na inšy kanał. Ja nie znajšoŭ, jak aŭtamatyzavać hety praces. To-bok jany hetym śpisam abmieńvajucca ŭručnuju i pracujuć centralizavana».
Ciapier čytajuć
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie3
Kamientary
Dziaržava bolš iniertnaja, asvojvaje novyja technałohii paźniej. Adnak kali asvoiła, vykarystoŭvaje sistemna.