Sioleta ŭ Minsku płanujecca adkryć piać novych handlovych centraŭ
paviedamiŭ namieśnik staršyni Minharvykankama Aleh Tabaniuchaŭ 31 sakavika na pres‑kanfierencyi.
Užo ŭ krasaviku buduć adkryty handlovyja centry na vulicach Viery Charužaj i Kulman, a taksama hipiermarkiet u mikrarajonie Čyžoŭka. Jašče try handlovyja centry płanujecca adkryć na praciahu hoda.
Jak paviedamiŭ Tabaniuchaŭ, na siońniašni dzień u Minsku naličvajecca 4.650 pradpryjemstvaŭ handlu i hramadskaha charčavańnia. Da 2014 hoda płanujecca pavialičyć ich kolkaść jašče na 500, pryčym amal 190 pradpryjemstvaŭ buduć adkryty ŭžo sioleta.
Pavodle sacyjalnych standartaŭ, na tysiaču žycharoŭ pavinna prypadać 320 kvadratnych mietraŭ handlovych płoščaŭ i 22 pasadačnyja miescy ŭ punktach hramadskaha charčavańnia. U cełym sacyjalnyja standarty ŭ stalicy zachoŭvajucca, adnak prablemy isnujuć u asobnych rajonach horada — Frunzienskim, Maskoŭskim i Zavodskim, dzie budaŭnictva žylla idzie bolš intensiŭna, čym raźvićcio infrastruktury, adznačyŭ namieśnik staršyni Minharvykankama.
U vyniku pavieličeńnia kolkaści abjektaŭ handlu i hramadskaha charčavańnia da 2014 hoda hetyja pakazčyki pavialičacca da 600 kv. m handlovych płoščaŭ i 44 pasadačnych miescaŭ na tysiaču nasielnictva.
Adnak i hetyja ličby buduć dla Biełarusi niezdavalnialnymi ŭ paraŭnańni z susiednimi krainami, padkreśliŭ Tabaniuchaŭ. U jakaści prykładu jon nazvaŭ Litvu, dzie na adnaho čałavieka prypadaje 1 kv. m handlovaj płoščy.
Kamientary