Bajkier z chvastom. Brescki džek-raseł na matacykle staŭ zorkaj TikTok
Hod tamu Dźmitryj Kuhal zavioŭ akaŭnt dla svajho hadavanca, i zaraz džek-raseł-terjer Džeki — «hałoŭny bajkier Bresta» i zorka TikTok, piša Onliner.by.
Bieź jaho nie prachodzić nivodny bujny bajkierski prajekt: Džeki ŭ šlemie, sabačaj kasusie i krutych matacykletnych akularach imčyć siarod pieršych ludziej kałony. Kamiera, ustalavanaja na vietravym škle matacykła haspadara, piša historyju Džeki ŭ režymie non-stop.
Kali chto-niebudź padychodzić da sabaki-bajkiera, kab pahładzić, adrazu traplaje ŭ «kino». Darečy, hładzić Džeki možna biez bojazi: naš hieroj vałodaje davoli vysakarodnym charaktaram.
«Jon tut žyć nie budzie!»
— Sabaka źjaviŭsia ŭ našym domie 24 listapada 2022 hoda, kali ŭ majho syna byŭ dzień naradžeńnia, — raspaviadaje Dźmitryj. — Chaciełasia zrabić dziciaci siurpryz. Znajšoŭ zavodčycu ŭ Baranavičach, i jana mnie skazała, što jość adzin spakojny chłopiec.
Ja pajechaŭ u Baranavičy mienavita pa jaho. Kažuć, sabaka sam vybiraje haspadara: da mianie pačaŭ prystavać inšy ščaniuk, sprabavaŭ ściahnuć ź mianie škarpetki.
A Džeki siadzieŭ u baku. Ale ja adčuvaŭ, što pryjechaŭ mienavita pa hetaha, jaki saromieŭsia padyści. Kupiŭ jaho, ciškom nočču pryjechaŭ dadomu… Žonka ŭstroiła skandał: «Jon tut žyć nie budzie!»
Ranicaj daviałosia ŭziać sabaku ŭ ofis — dobra, što ja sam sabie dyrektar. I z taho momantu Džeki sa mnoj 24/7. Prajšło dva hady.
— Džeki śpić u nahach haspadara ŭ łožku. Žonka? I dla jaje jon — «najlepšy sabačka». Kaniečnie, kinołahi nie rekamiendujuć dazvalać sabakam kłaścisia ŭ łožak, ale ŭsie sabačniki viedajuć, jak heta adbyvajecca.
Razumnaść džek-raseł-terjeraŭ — adna z najbolš raśpijaranych jakaściaŭ parody. Pry ŭsim svaim admietnym charaktary, Džeki hetuju pryrodnuju rysu całkam paćviardžaje. Z samaha dziacinstva jon zajmajecca z kinołaham, viedaje bolš za 30 kamand. Nam prademanstravaŭ samyja cikavyja: na zadnich łapach z addanym vyrazam mordy — «słužy», z rašučym vyhladam i łapami na ruce haspadara — «tač».
Džeki štodnia jeździć z haspadarom na pracu — Dźmitryj vałodaje fotastudyjaj, jakaja zajmajecca nie tolki zdymkami, ale i palihrafijaj, suvienirami. Tut u Džeki — svajo miesca, dzie jon naziraje za pracesam pa 8—12 hadzin zapar. Byvaje, u Dźmitryja niama času navat paabiedać abo vyvieści hadavanca na vulicu — u takija dni Džeki ciarpliva čakaje. Ale zryvajecca ź miesca, kali čuje: «Pajechali!»
«Pajechali!»
— Mnie zaŭsiody chaciełasia mieć techniku dla dušy. Mašynu razhladaŭ tolki jak srodak pieramiaščeńnia. A voś matacykł — zusim inšaje, — kaža Dźmitryj.
— Čatyry hady tamu kupiŭ novy Minsk X 250. Padrychtavaŭ jaho vielmi jakasna, hrošaj nie škadavaŭ, dumaŭ doŭha na im katacca. Pajechaŭ u padarožža pa Biełarusi, nakataŭ 5000 km. Kožny viečar siadzieŭ nad kartami — šukaŭ roznyja maršruty. I praz dva miesiacy zrazumieŭ, što «Minska» nie chapaje — chutkaść nievialikaja, kamfortu mała. I kupiŭ Honda Varadero.
Voś na hetym bajku Džeki i staŭ zorkaj TikTok.
Jak pasadzić sabaku na matacykł?
Pieršaje, što było nieabchodna, — asobnaje miesca. U Jeŭropie prapanujuć hatovyja varyjanty za 400 jeŭra. Dźmitryj ža vyrašyŭ znajści majstra ŭ bajkierskaj hrupie. Znajšoŭsia čałaviek, jaki šyje kofry dla matacykłaŭ.
Sabačych sumak jon nikoli nie rabiŭ, ale ryzyknuŭ. Spačatku zrabili pa pamierach psa karobku, pa hetych lakałach pašyli torbu — z vysokimi bortami, ale dosyć miakkuju. Atrymałasia kala 200 rubloŭ, ale hałoŭnaje — Džeki «matacykletnaje miesca» adrazu pryniaŭ za svajo.
Navošta manietyzavać TikTok sabaki-bajkiera?
— Hod tamu zachaciełasia stvaryć staronku Džeki ŭ TikTok i vieści jaje ad imia sabaki, — uspaminaje Dźmitryj. — Jaho historyi prydumvaju, zychodziačy z tych padziej, jakija ź im adbyvajucca. Znajšoŭ prahramu, jakaja źmianiaje hołas, i ciapier Džeki havoryć «pa-ludsku». Na matacykle, pobač ź jaho sumkaj, pastajanna pracuje kamiera z dyjapazonam 360 hradusaŭ.
Ja mahu adyści ŭ kramu, naprykład, a Džeki spakojna siadzić u svajoj sumcy. Ale ludzi sami pastajanna ciahnucca da jaho, chtości choča trapić u kadr zorki TikTok. Mnohija viedajuć Džeki pa sacsietkach, padychodziać jak da staroha siabra.
Haspadar apeŭnivaje, što ludzi z usiaho śvietu pišuć Džeki:
— Kali paviedamleńni prychodziać z Bresta, ad dziaciej, to sustrakajusia ź imi, zapisvajem sumiesnyja roliki. A padpisčyki z Rasii, Jeŭropy dasyłajuć «hałoŭnamu bajkieru Bresta» padarunki. Padziaka — rolik u TikTok: «Džeki ŭ kiepačcy z Maskvy», «Džeki ŭ kurtačcy z Sankt-Pieciarburha», «Džeki ŭ kaściumie z matylkom z…» i h. d.
Razam ź Dźmitryjem Džeki prajechaŭ kala 9000 km pa Biełarusi. Amal kožny dzień jon «śviecicca» ŭ TikTok.
— Ja ŭžo daŭno zapuściŭ ułasny akaŭnt u inšaj sietcy — Instagram. I choć mianie nazyvajuć «motabłohieram», ja siabie takim nie liču. A voś u Džeki ŭ TikTok kolkaść padpisčykaŭ u razy bolšaja. Manietyzavać jaho akaŭnt pakul nie źbirajusia, mnie heta nie cikava. Zdajecca, pry manietyzacyi źnikaje toje, što robicca vyklučna dla dušy, — kaža mužčyna.
Adnojčy prytułku dla biazdomnych žyvioł «Dabrata» spatrebiŭsia kardon — na padściłki sabakam. Dźmitryj vyrašyŭ skarystacca svajoj staronkaj u sacsietcy i źviarnuŭsia da padpisčykaŭ, pastaviŭ pryčep kala ofisa ŭ Breście. U vyniku nieabyjakavyja nabrali poŭny pryčep kardonu. A zimoj u «Dabracie» zamierzła kałonka, kotki i sabaki zastalisia biez vady. Znoŭ vyručyŭ internet — pryčep za niekalki hadzin zahruzili dvuma paddonami butelek z vadoj.
Tak papularnaść Džeki «akuplajecca» nie manietyzacyjaj, a zusim inšym sposabam.
Ciapier čytajuć
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach3
Kamientary