Miełoni i Makron pasvarylisia nakont Ukrainy. Mierc starajecca ich pamiryć
Kancler Hiermanii sprabuje ŭrehulavać dypłamatyčnuju sprečku pamiž Rymam i Paryžam paśla taho, jak premjer-ministr Italii Džordža Miełoni nie była ŭciahnuta ŭ apošnija pieramovy lidaraŭ ES i ZŠA adnosna ŭrehulavańnia vajny pamiž RF i Ukrainaj, piša Financial Times.
Napružanaść uźnikła 16 maja, kali prezident Francyi Emanuel Makron abvinavaciŭ Miełoni ŭ raspaŭsiudžvańni «niepraŭdzivaj infarmacyi» paśla taho, jak jana nie ŭziała ŭdzieł u sustrečy lidaraŭ z prezidentam Ukrainy Uładzimiram Zialenskim i ŭ sumiesnaj telefonnaj razmovie z Donaldam Trampam.
Miełoni pajechała ŭ Ałbaniju na samit Jeŭrapiejskaj palityčnaj supolnaści, u jakim udzielničali 40 jeŭrapiejskich lidaraŭ, u tym liku Zialenski. Ale jana nie dałučyłasia da Mierca, Makrona, premjeraŭ Vialikabrytanii Kira Starmiera i Polščy Donalda Tuska na pasiadžeńni, dzie abmiarkoŭvali vyniki rasijska-ukrainskich mirnych pieramoŭ, što adbylisia ŭ toj dzień u Stambule.
Jeŭrapiejskija lidary, jakija tady inicyjavali telefonnuju razmovu z Trampam i Zialenskim, paźniej apublikavali zajavu, u jakoj nazvali patrabavańni Pucina «nieprymalnymi». Premjer-ministr Italii zajaviła žurnalistam, što jaje nie ŭklučyli ŭ śpis praz admovu nakiroŭvać vojski va Ukrainu ŭ miežach prapanavanaj «kaalicyi achvotnych» dla zabieśpiačeńnia biaśpieki paśla mahčymaj mirnaj damovy.
«Italija ŭžo daŭno zajaviła, što nie žadaje nakiroŭvać vojski va Ukrainu. Dla nas niama sensu ŭdzielničać u farmatach, jakija majuć mety, u jakich my nie žadajem brać udziełu», — skazała Miełoni.
Ale Makron zajaviŭ, što razhortvańnie vojskaŭ nie abmiarkoŭvałasia ni ŭ Tyranie, ni ŭ Kijevie na minułych vychadnych, kudy jon prybyŭ razam sa Starmieram, Miercam i Tuskam — i bieź Miełoni: «Dyskusija tyčycca spynieńnia ahniu — davajcie paźbiahać raspaŭsiudžvańnia niepraŭdzivaj infarmacyi. Jaje i tak dastatkova z boku Rasii», piša «Ukrainskaja praŭda».
Mierc sustreŭsia ź Miełoni napiaredadni niadzielnaj intranizacyjnaj imšy Papy Lva XIV i pasprabavaŭ źmiakčyć napružanaść, zajaviŭšy, što abodva lidary zhodnyja z tym, što Italija «pavinna adyhryvać svaju rolu» va ŭsich jeŭrapiejskich mirnych inicyjatyvach pa Ukrainie.
Adsutnaść Miełoni ŭ jeŭrapiejskim kvartecie i adkrytaja krytyka z boku Makrona vyklikali ŭ Italii chvalu abureńnia — krytyki abvinavacili jaje ŭ tym, što jana adchiliła svaju krainu ad pryniaćcia važnych rašeńniaŭ.
U 2020 hodzie jabaćka Amina «aktyŭna hałasavała» za Łukašenku. A ciapier nie razumieje, čamu rodnaja maci na jaje daniesła, a milicyja zatrymała33
Kamientary