TASS dvojčy mianiała zahałovak dla kamientara Ejsmant pra pieramovy ŭ Stambule
Rasijskaje dziaržaŭnaje infarmahienctva TASS učora apublikavała kamientar pres-sakratara Łukašenki Natalli Ejsmant ab vynikach pieramovaŭ Rasii i Ukrainy ŭ Stambule. Pry hetym zahałovak na praciahu dnia mianiaŭsia niekalki razoŭ, a sama Ejsmant vymušana była dać poŭny kamientar ź nieabchodnymi akcentami praz ułasnyja kanały, piša Reform.news.
Spačatku na sajcie TASS 17 maja ŭ 12:22 źjaviłasia natatka z zahałoŭkam «Pres-sakratar Łukašenki: vyniki pieramoŭ u Stambule — pośpiech kiraŭnictva RF».
Možna mierkavać, što pres-słužbu Łukašenki taki akcent nie zadavoliŭ. Poŭny kamientar byŭ raspaŭsiudžany praz telehram-kanał «Puł Pieršaha» ŭ 12:43.
Pry hetym u paviedamleńni «Puła Pieršaha» tłustym vyłučany nastupnyja słovy: «Biełaruś nikoli nie naprošvałasia na rolu pasiarednika — ni raniej, ni ciapier. Heta našaja pryncypovaja pazicyja» i «my arhanizujem praces tak, jak nie arhanizuje ni adna inšaja kraina». Frazy hučać vielmi dziŭna, bo nichto pra heta Ejsmant nie pytaŭsia i nichto nie prapanoŭvaŭ Biełaruś u jakaści pieramoŭnaj placoŭki.
Vidavočna, u TASS apieratyŭna adreahavali na paprok ź biełaruskaha boku i ŭ 12.44 źmianili zahałovak svajoj natatki na «Ejsmant: Minsk hatovy stać pasiarednikam pa ŭrehulavańni na Ukrainie».
Ale i hety tezis u zahałoŭku pratrymaŭsia niadoŭha.
U 12:49 TASS unosić čarhovuju praŭku i mianiaje zahałovak na «Ejsmant nazvała vyniki pieramoŭ u Stambule taktyčnym pośpiecham Rasii».
U 13:54 biełaruskaje dziaržahienctva BiełTA vydaje svoj varyjant zahałoŭka dla paviedamleńnia z kamientarom Ejsmant «Pres-sakratar Prezidenta Biełarusi ab vynikach pieramovaŭ Rasii i Ukrainy ŭ Stambule». Pry hetym u tekście paznačana, što kamientar byŭ dadzieny rasijskamu ahienctvu.
Varta adznačyć, što pres-słužba Łukašenki časta vykarystoŭvaje pryjom «kamientar mižnarodnamu ahienctvu» dla taho, kab danieści svaju pazicyju da mižnarodnych partnioraŭ.
U dadzienym vypadku ciažka nie zaŭvažyć, što dla atačeńnia Łukašenki było važna padkreślić, što jon usio jašče spadziajecca na ŭdzieł u pieramovach, naprykład, u jakaści haspadara pierahavornaj placoŭki.
Kamientary