Jak biełarusam za miažoj skasavać šlub, nie viartajučysia na radzimu? Spytali ŭ jurystki

Na hetyja pytańni adkazała Alvina Minhazava. Raniej jana była advakatkaj u Biełarusi, a ciapier pracuje jurystkaj advakackaha biuro Król Mazurek u Polščy.

Adzin z samych prostych varyjantaŭ skasavać šlub, jaki dasiažny biełarusam zamiežža, — heta praz konsulstva Biełarusi. Konsulskija ŭstanovy ažyćciaŭlajuć funkcyju ZAHSaŭ, to-bok rehistrujuć akty hramadzianskaha stanu. Ale razvodzicca praz konsulstva možna tym param, jakija nie majuć dziaciej ci niejkich majomasnych sprečak.

«Hety varyjant nie padydzie dla situacyi, kali muž ci žonka majuć mižnarodnuju abaronu (uciakactva abo dadatkovuju abaronu) u Polščy», — źviartaje ŭvahu na važny niuans Alvina Minhazava.

Nakolki ž realna skasavać biełaruski šlub, kali ty sam nie možaš pryjechać u krainu? Jurystka kaža: całkam realna.

Isk možna skłaści i adpravić pa pošcie, prykłaŭšy da jaho ŭsie nieabchodnyja dakumienty. Sudovaje pasiadžeńnie budzie pryznačanaje praz 3 miesiacy — heta termin na prymireńnie, jaki praduhledžany zakonam. Na praciahu hetaha času nieabchodna skłaści davieranaść u krainie svajho znachodžańnia. Davieranaść moža być na blizkaha svajaka (baćki, dzieci, braty, siostry) abo na advakata, jaki budzie pradstaŭlać vašy intaresy ŭ sudzie. Na davieranaść nieabchodna pastavić apastyl. Paśla hetaha adpravić u Biełaruś i zrabić pierakład na biełaruskuju ci ruskuju movu.

«Pradstaŭnik istca budzie ŭ sudovym pasiadžeńni padtrymlivać iskavyja patrabavańni. Adkazčyk, u svaju čarhu, pavinien zahadzia adpravić chadajnictva ŭ adras suda z prośbaj ab razhladzie spravy ŭ jaho adsutnaść. Sud razhledzić spravu, i paśla ŭstupleńnia ŭ siłu rašeńnia suda pradstaŭnik istca zmoža jaho zabrać. Bolš za toje, artykuł 282 Hramadzianska— pracesualnaha kodeksa dazvalaje istcu prasić sud razhledzieć spravu ŭ jaho adsutnaść. Adnak zaŭsiody jość ryzyka, što sud nie zadavolić hetaje chadajnictva, tamu ja b zaŭsiody trymała davieranaść pobač».

Jurystka adznačaje: biełaruskija sudy prymajuć takija davieranaści biez abmiežavańniaŭ, bo našumieły ŭkaz Łukašenki abmiažoŭvaje vykarystańnie zamiežnych davieranaściej tolki dla peŭnych administracyjnych pracedur.

Raźvieścisia ŭ toj krainie, dzie ty ciapier žyvieš, taksama mahčyma (tak, naprykład, rabiła biełaruskaja spartsmienka Kryścina Cimanoŭskaja). Pakolki Alvina Minhazava pracuje ŭ Polščy, jana moža raspavieści tolki pra toje, jak heta adbyvajecca tam.

«Nieabchodna zrabić transkrypcyju paśviedčańnia ab rehistracyi šlubu, heta značyć «uvieści» biełaruskaje paśviedčańnie ab šlubie ŭ polskuju sistemu aktaŭ hramadzianskaha stanu. Isk padajecca ŭ akruhu pa apošnim sumiesnym miescy žycharstva siamji, kali chacia b adzin z pary tam jašče pražyvaje. U inšych vypadkach — pa miescy žycharstva adkazčyka. Kali jaho nielha vyznačyć, to pa miescy žycharstva istca. Da isku nieabchodna prykłaści nieabchodnyja dakumienty, jakimi vy abhruntoŭvajecie svaje dovady. Jak minimum odpis skrócony aktu małżeństwa (skaročany vypis z akta ab šlubie). Kali jość dzieci, to odpis skrócony aktu urodzenia (skaročany vypis z akta ab naradžeńni). A taksama kopii ŭsich dakumientaŭ pa spravie dla adkazčyka».

Źnikłaja śpikierka Kaardynacyjnaj Rady Anžalika Mielnikava raskazvała, što jany z mužam raźvialisia. Ci moh by jon jurydyčna raźvieścisia bieź jaje ŭdziełu padčas adnoj sa svaich pajezdak u Biełaruś? Takoje mahčyma ŭ paradku zavočnaj vytvorčaści, adkazvaje jurystka, — kali adkazčyku naležnym čynam paviedamili pra čas i miesca sudovaha pasiadžeńnia, ale jon nie apaviaściŭ pra pavažnyja pryčyny niajaŭki, abo kali sud pryznaje, što adkazčyk naŭmysna zaciahvaje viadzieńnie pa spravie.

Alvina Minhazava tłumačyć, što ličycca naležnym apaviaščeńniem. Sud adpraŭlaje pastanovu suda ab zaviadzieńni hramadzianskaj spravy i paviedamlaje adkazčyku ab dacie razhladu spravy. Kali ŭ isku ŭkazany adras rehistracyi adkazčyka ŭ Biełarusi, to sud adpravić dakumienty pa hetym adrasie. Taki zakazny list pavinien uziać sam adkazčyk i pastavić podpis. Ale taki list moža atrymać niechta inšy, chto žyvie pa tym ža adrasie. Dla suda heta budzie ličycca naležnym apaviaščeńniem.

«Kopija zavočnaha rašeńnia suda vysyłajecca adkazčyku, istcu i inšym jurydyčna zacikaŭlenym u vyniku spravy asobam. Adkazčyk maje prava padać u sud, jaki pryniaŭ zavočnaje rašeńnie, isk ab admienie hetaha rašeńnia na praciahu dziesiaci dzion z dnia ŭručeńnia jamu kopii rašeńnia. Heta značyć, kali sprava była razhledžana i adkazčyk ab hetym nie viedaŭ, to jon moža hetaje rašeńnie admianić».

Što rabić paśla razvodu tym biełarusam, jakija chočuć šlub ź inšym čałaviekam — u toj ža Polščy, naprykład? Jurystka adkazvaje, što ŭ hetym vypadku hałoŭnaje — mieć rašeńnie suda ź Biełarusi ab skasavańni šlubu i jaho prysiažny pierakład.

«Składanaści mohuć uźniknuć z daviedkaj ź biełaruskaha konsulstva ab tym, što ŭ čałavieka niama pieraškod dla ŭstupleńnia ŭ šlub. Jaje nie mohuć uziać asoby, jakija znachodziacca pad mižnarodnaj abaronaj. Tady treba źviartacca ŭ polski sud i prasić jaho vyzvalić čałavieka ad nieabchodnaści pradstavić hetu daviedku».

• 1
• 0
• 0
• 0
• 0
• 1
• 0
• 0