«Biełaja stužka» Michaela Chanekie
Biełaja stužka (Das weisse Band - Eine deutsche Kindergeschichte)
Aŭstryja — Francyja — Niamieččyna, 2009, čorna-bieły, 114 chv.
Režysior: Michael Chanekie
Roli vykonvajuć: Siuzana Łatar, Ulrych Tukur, Burhchard Kłaŭsner, Jozaf Birbichler
Žanr: Prypavieść
Adznaki: za mastactva — 7, za vidoviščnaść — 2, za źmiest — 3,5
U niamieckaj vioscy pierad Pieršaj suśvietnaj vajnoj panuje cišynia. Ale supakoj padmanlivy. Niechta paździekvaŭsia z doktara, naciahnuŭšy pierad jahonym domam drot. Złaviesnyja padziei narastajuć, jak śniehavy kamiak; złačyncy tak i nie buduć złoŭlenyja…
Karcina Michaela Chanekie, uznaharodžanaja ŭ Kanach, — kalihrafičnaja čorna-biełaja prypavieść. Režysior akuratna i choładna vyšukvaje zło, što chavajecca za fasadam štodzionnaha žyćcia. Namioki, pozirki, stojenaja nianaviść, pycha, nieluboŭ, žorstkaść. Zmarniełyja dzietki — jak zmoŭnicka-demaničnyja istoty (ci heta tolki zdajecca?). Uračysta-biaśsilnyja darosłyja, što pakryvajuć zło i zło piestujuć. Tryvoha, što navisaje nad vioskaj — i zavieršycca suśvietnaj bojniaj.
Usio heta majsterski-strymana paraśpisana; vybialena apierataram, adznačana biełaju stužkaj.
Ale karcinu, što demanstrujecca ŭ Domie kino na movie aryhinała z subtyrami, aceniać tolki amatary anemična-aŭtarskaha kino. Astatnim lepiej nie turbavacca.
Kamientary