Mera Daŭhaŭpiłsa złavili na machlarstvie z elektryčnaściu. Łukašysty złaradničajuć, zabyŭšysia, što jon «svoj»

U kancy sakavika ŭ šykoŭnym siamiejnym majontku mera Daŭhaŭpiłsa Andrejsa Ełksnyńša było vyjaŭlena nielehalnaje padklučeńnie da elektrasietki. Hety majontak aformleny na maci i žonku palityka, ale niekatory čas tam žyŭ i sam mer.

Śpiecyjalisty łatvijskich elektrasietak prybyli ŭ majontak u supravadžeńni palicyi i vyjavili tam pad ziamloj pryładu, jakaja dazvalała pieraklučacca ź lehalnaha elektrazabieśpiačeńnia na nielehalnaje. Kiravańnie pryładaj adbyvałasia dystancyjna z kacielni doma. U vyniku raschod enierhii byŭ našmat mienšy, čym musiŭ by być u abjekcie nieruchomaści takoha pamieru. 

Sam mer admaŭlaje svaju datyčnaść da chitrykaŭ z elektryčnaściu, spasyłajučysia na toje, što nie žyvie ŭ tym miescy i ničoha nie viedaje. Jon havoryć, kab pytańni zadavali jahonym žoncy i cieściu.

U dačynieńni da zdareńnia raspačaty kryminalny praces, jaki viadzie nie daŭhaŭpiłskaja palicyja, a pravaachoŭniki inšaha rehijona — Ziemhalii, kab paźbiehnuć kanfliktu intaresaŭ.

Z hetaha vypadku napoŭnicu złaradničajuć łukašenkaŭskija prapahandysty. U adnym ź ich kanałaŭ jany pišuć: 

«Tam, darečy, nie ścipły damok, a narmalnaja takaja dvuchpaviarchovaja damina na ŭčastku ŭ 8 tys kv. m. kažuć, navat z anturažam u styli hrafskaj siadziby. U tym sensie, što haściej sustrakajuć zdaraviennyja skulptury lvoŭ na varotach. Jość abahravany basiejn. Praŭda, dla biaśpieki zapisany dom na mamu, ale viadoma, što mer tam dakładna žyvie z žonkaj».

A dalej praz asobu daŭhaŭpiłskaha mera łukašysty navalvajucca na ŭsiu «łatvijskuju viarchušku», zhadvajučy pra niadaŭniaje adklučeńnie Łatvii razam ź inšymi krainami Bałtyi ad ahulnaj ź Biełaruśsiu i Rasijaj enierhasistemy:

«Nu, heta značyć łatvijskaja viarchuška kaža «Hudbaj, Lenin!» i potym adrazaje pravady, jakija viaduć da tannaj elektraenierhii ŭ Biełarusi i Rasii. A sami robiać nielehalnyja abychody da słupa i dziviacca, čaho heta čeladź tak aburajecca dzikimi taryfami na śviatło».

Pavialičyć

Tut, adnak, jość adzin pikantny momant. Andrejs Ełksnyńš akurat z tych łatvijskich palitykaŭ, jakich łukašenkaŭski režym — jak i pucinski ŭ Rasii, — maje ŭsie padstavy ličyć «sacyjalna blizkimi». Tak, u lipieni 2022 hoda, užo nie tolki paśla pratestaŭ 2020-ha, a navat paśla pačatku vajny va Ukrainie Ełksnyńš pryniaŭ prapanovu biełaruskaha konsulstva ŭ Daŭhaŭpiłsie i ŭziaŭ udzieł u zładžanym im pryjomie z nahody «Dnia niezaležnaści» 3 lipienia.

Toj ža samy kanał, jaki ciapier złaradničaje z prablem daŭhaŭpiłskaha mera, tady ličyŭ Ełksnyńša redkim u Łatvii ekziemplaram ź liku «niaŭporatych palitykaŭ z cudoŭnym pačućciom humaru».

Pavialičyć

Vosieńniu taho ž hoda Andrejs Ełksnyńš, adkazvajučy žurnalistam na pytańnie pra Krym, skazaŭ, što «Krym źjaŭlajecca častkaj Rasijskaj Fiederacyi». Paśla zaŭvahi, što amal usia mižnarodnaja supolnaść nie pryznała akupacyju paŭvostrava, jon adkazaŭ, što heta tak, ale «niemahčyma admaŭlać fakt, što jaho ŭklučyli ŭ skład RF, i što ŭvieś śviet praciahnuŭ paśla hetaha supracoŭničać z Rasijaj».

Adkazvajučy na ​​pytańnie ab adkaznaści Rasii za zabojstvy cyvilnych u Bučy, mer Daŭhaŭpiłsa skazaŭ, što «za ŭsio, što adbyłosia, adkaznyja i Rasija, i Ukraina, i ZŠA».

Urešcie, u minułym hodzie, jak i ŭ papiarednija Ełksnyńš demanstratyŭna śviatkavaŭ dzień Pieramohi 9 maja, nazyvajučy tuju vajnu pa saviecka-rasijskaj tradycyi «Vialikaj Ajčynnaj». I ŭ tym samym prapahandysckim telehram-kanale, jaki siońnia praz Ełksnyńša krytykuje «łatvijskuju viarchušku», jaho z zadavalnieniem uschvalali i cytavali jak čałavieka, jaki «treci hod prymušaje łatyšoŭ nie zabyvacca pra Dzień Pieramohi».

Pavialičyć

Andrejs Ełksnyńš źjaŭlajecca pradstaŭnikom sacyjał-demakratyčnaj partyi Saskaņa («Zhoda»), jakaja tradycyjna mieła značnuju padtrymku siarod ruskamoŭnych žycharoŭ Łatvii, i tolki na apošnich vybarach u Siejm vosieńniu 2022 hoda nie zmahła pieraadoleć 5-pracentny barjer.

• 0
• 0
• 14
• 6
• 0
• 0
• 1
• 0