Madura abviaściŭ nadzvyčajnaje ekanamičnaje stanovišča ŭ Vieniesuele ŭ adkaz na myty ZŠA
«Siońnia, dziakuj Bohu, u Vieniesueły jość svaja ekanamičnaja madel, kab supraćstajać hetamu novamu etapu ekanomiki i ruchacca napierad», — zajaviŭ Nikałas Madura.
Kiraŭnik Vieniesueły Nikałas Madura padpisaŭ ukaz ab uviadzieńni nadzvyčajnaha ekanamičnaha stanovišča na terytoryi krainy terminam na dva miesiacy z mahčymaściu padaŭžeńnia. Hetaje rašeńnie stała adkazam na novyja handlovyja pošliny, uviedzienyja administracyjaj prezidenta ZŠA Donalda Trampa, piša Reuters.
2 krasavika 2025 hoda Donald Tramp abviaściŭ ab uviadzieńni minimalnaha 10% pošliny na ŭsie impartnyja tavary, a taksama dadatkovych pošlin dla krain z najbolšym handlovym deficytam z ZŠA.
U pryvatnaści, na tavary ź Vieniesueły byli ŭviedzieny pošliny ŭ pamiery 15%, što zakranuła ekspart morapraduktaŭ, śviežaj ryby, romu i kavy. Akramia taho, Tramp abviaściŭ ab uviadzieńni 25% pošliny na krainy, jakija zakuplajuć naftu i haz u Vieniesueły, što značna ŭskładniaje ekspart enierhanośbitaŭ z krainy.
U adkaz na hetyja miery Madura zajaviŭ, što Vieniesueła budzie pieršaj krainaj, jakaja pieraadoleje nastupstvy handlovaj vajny, abvieščanaj Trampam. Jon padkreśliŭ, što kraina maje ŭłasnuju ekanamičnuju madel dla supraćstajańnia novym vyklikam i zabieśpiačeńnia dalejšaha raźvićcia.
«Siońnia, dziakuj Bohu, u Vieniesueły jość svaja ekanamičnaja madel, kab supraćstajać hetamu novamu etapu ekanomiki i ruchacca napierad», — zajaviŭ Nikałas Madura.
Nadzvyčajnaje ekanamičnaje stanovišča daje prezidentu Vieniesueły šyrokija paŭnamoctvy dla pryniaćcia vyklučnych mier, uklučajučy rehulavańnie padatkaŭ, ustanaŭleńnie abaviazkovych kvot na zakupku nacyjanalnaj pradukcyi i pavieličeńnie dziaržaŭnaha doŭhu. Madura adznačyŭ, što hetyja miery nakiravany na abaronu nacyjanalnaj ekanomiki i źmiakčeńnie niehatyŭnych nastupstvaŭ źniešnich sankcyj.
Kankretnyja miery, źviazanyja z hetym pašyreńniem paŭnamoctvaŭ Madura, buduć abvieščanyja praź niekalki dzion.
Ekśpierty vykazvajuć aściarohi adnosna mahčymaści viartańnia hipierinflacyi ŭ Vieniesuele. Pa dadzienych niezaležnych naziralnikaŭ, inflacyja ŭ sakaviku skłała 13%, a prahnozy na 2025 hod śviedčać ab mahčymym pieravyšeńni 100%.
«Pra jaki sajuz možna havaryć?» Łukašenka ŭ Astanie raskrytykavaŭ Rasiju za naviazvańnie utylzboraŭ15
Kamientary