Prakurorski načalnik aburyŭsia nieabhruntavanymi zatrymańniami biełarusaŭ
Za apošnija hady śledčyja zatrymali bolš za 1500 čałaviek, jakich urešcie daviałosia vyzvalić. A kožny ź ich maje prava na kampiensacyju.
Staršy prakuror upraŭleńnia Hienieralnaj prakuratury Ihar Siaŭruk źviarnuŭ uvahu na niekatoryja dziejańni śledčych, u jakich jon bačyć parušeńnie zakanadaŭstva. Jaho artykuł «Niekatoryja aśpiekty prakurorskaha nahladu za zakonnaściu zatrymańnia asob u paradku, praduhledžanym kryminalna-pracesualnym zakonam» apublikavany ŭ śviežym numary viedamasnaha prakurorskaha časopisa «Zakonnaść i pravaparadak» (№1 za 2025 hod).
«Kolkaść zatrymanych asob, u dačynieńni da jakich paśla kryminalny pieraśled spyniajecca pa reabilitujučych padstavach, zastajecca značnaj. U 2022-2024 hadach ich dola ad ahulnaj kolkaści zatrymanych skłała bolš za 4% (zvyš 500 čałaviek štohod), pryčym kožny z takich zatrymanych maje prava na kampiensacyju škody, naniesienaj dziejańniami orhana, jaki viadzie kryminalny praces», — narakaje Ihar Siaŭruk.
Havorka idzie pra situacyi, kali padazravanych pa kryminalnaj spravie kidajuć u izalatar, ale ŭrešcie nie vystaŭlajuć abvinavačvańnie i ich spravy ŭvohule nie dachodziać da suda.
Zrešty, u realnym žyćci mała kamu ź ich udajecca atrymać kampiensacyju.
Aproč taho, prakuror tłumačyć, što zatrymlivać pa «niepasredna ŭźnikłym padazreńni ŭ ździajśnieńni złačynstva» (a heta ŭniviersalnaja farmuloŭka śledčych — NN) nielha naprava i naleva. Heta norma zakona praduhledžvajecca tolki dla kankretnych vypadkaŭ — kali, naprykład, čałavieka złavili na miescy złačynstva albo adrazu paśla pieratrusa, padčas jakoha vyjavilisia važnyja ŭliki.
«Nie moža być razhledžana jak abhruntavanaje zatrymańnie pa niepasredna ŭźnikłym padazreńni asoby, jakoj praz značny čas paśla zaviadzieńnia ŭ dačynieńni da jaje kryminalnaj spravy i vytvorčaści šerahu śledčych dziejańniaŭ ź jaje ŭdziełam padčas čarhovaha dopytu paviedamlajuć, što jana zatrymlivajecca», — tłumačyć Siaŭruk.
Taksama jon źviartaje ŭvahu, što śledčyja niapravilna paznačajuć u pratakole miesca i čas faktyčnaha zatrymańnia. Tam pavinna akazvacca nie adździaleńnie milicyi, kudy pryvieźli čałavieka i stali afarmlać, a kankretnaje miesca i kankretny čas, dzie i kali jaho schapili na vulicy ci ŭ pamiaškańni.
Zaŭvahi i rekamiendacyi prakurora Sieŭruka nie źjaŭlajucca abaviazkovymi dla vykanańnia. Heta jaho traktoŭka zakanadaŭstva, na jakuju jon choča źviarnuć uvahu śledčych i inšych prakuroraŭ.
Ciapier čytajuć
Žonka adhavorvała padpałkoŭnika DFR brać chabary, a toj kazaŭ «atrymaju pałkoŭnika — i na piensiju»: pieršaja piensija pryjšła ŭžo na aryštancki rachunak5
Žonka adhavorvała padpałkoŭnika DFR brać chabary, a toj kazaŭ «atrymaju pałkoŭnika — i na piensiju»: pieršaja piensija pryjšła ŭžo na aryštancki rachunak
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»1414
Kamientary
I voś kab nie psavać ličby spravazdačnaści, kab nie płacić kampiensacyju škody, što rabić?
Nie zatrymlivać ludziej prosta tak?
Adkaz niapravilny. U sistemie dumajuć inakš: Prydumvać choć jakuju kryminalnuju spravu. "Pracujem pravilna, pamyłak nie byvaje" 🫡