Novy trend tyktoka: pracirać tvar bananavaj skurkaj. Heta sapraŭdy pracuje?
Tyktok znoŭ ździŭlaje: karystalniki s zadavalnieńniem truć tvar bananavaj skurkaj. Nibyta heta «naturalny botaks», jaki razhładžvaje marščyny, zmahajecca z suchaściu i viartaje blask. Hučyć dziŭna? Ale pad chešteham #bananabotox užo tysiačy videa, miljony prahladaŭ i zachaplalnyja kamientary.
Pračnucca a čaćviortaj ranicy, zakleić rot stužkaj, akunuć tvar u ledzianuju vadu — i… pracirać tvar bananavaj skurkaj. Mienavita tak vyhladaje ranica adnaho ź fitnes-influjensieraŭ TikTok Aštana Choła (Ashton Hall), videa jakoha nabrała amal 30 miljonaŭ prahladaŭ. I jon nie adziny, chto rekłamuje taki sposab dahladu za skuraj.
Ciapier u tyktoku pad chešteham #bananabotox užo tysiačy videa, miljony prahladaŭ i zachaplalnyja kamientary ab karyści «skarbu z bananavaj skurki» i rekłama jaje jak «naturalnaha botaksu».
Prychilniki bananavaj skurki śćviardžajuć, što jana zmahajecca z marščynami, vyraŭnoŭvaje ton skury, pamianšaje pačyrvanieńni i nadaje efiekt «śviežaści».
Recept prosty: uziać śviežy banan, źjeści miakać, a ŭnutranaj častkaj skurki pracirać tvar kruhavymi ruchami. Pakinuć na 15 chvilin, zmyć chałodnaj vadoj, nanieści krem.
Niekatoryja rajać vybirać «starejšyja», navat ciomnyja banany — maŭlaŭ, u ich skurka miakčejšaja i akaža lepšy efiekt.
Što kažuć ekśpierty?
Dermatołahi pryznajuć: bananavaja skura sapraŭdy ŭtrymlivaje vitaminy A, D, Je, antyaksidanty (takija jak askarbinavaja kisłata i lutein), a taksama kruchmał i lecycin, jakija mohuć uvilhatniać skuru i akazvać lohki supraćzapalenčy i ačyščalny efiekt.
Adnak dadajuć: hety efiekt — karotkaterminovy, i čakać hłybokaha amaładžeńnia ci źniknieńnia marščyn nie vypadaje. Karysnyja rečyvy sa skurki banana nie pranikajuć hłyboka ŭ skuru, tamu efiekt budzie paviarchoŭny i niedaŭhaviečny.
Kaśmietołahi nahadvajuć: bananavaja skurka — heta nie kaśmietyčny pradukt. Pry kantakcie z pavietram na joj mohuć chutka raźvivacca bakteryi. Tamu važna vykarystoŭvać tolki śviežuju skurku i nanosić jaje na čystuju skuru.
Pry najaŭnaści aknie, paškodžanaj abo vielmi adčuvalnaj skury taki ekśpierymient moža vyklikać razdražnieńnie abo navat pahoršyć stan. Taksama varta ŭličvać mahčymaść indyvidualnaj reakcyi — pierad užyvańniem pažadana pravieryć srodak na nievialikim učastku skury.
Na pytańnie, ci moža banan zamianić botaks, dermatołahi adnaznačna adkazvajuć: nie. Botaks pracuje na myšačnym uzroŭni, błakujučy pieradaču impulsaŭ, jakija vyklikajuć marščyny. A bananavaja skura dziejničaje vyklučna na pavierchni skury — jak lohki naturalny tonik.
Banany karysnyja dla zdaroŭja skury znutry: utrymlivajuć vitaminy, mikraelemienty i klatčatku, jakaja padtrymlivaje pracu straŭnika i ahulny tonus arhanizmu. Heta ŭpłyvaje na koler tvaru i ahulny stan skury.
Kamientary