Prapahandyst ANT Alaksandraŭ razyhraŭ scenku svajoj razmovy z emihrantami, ale heta akazałasia chłuśnioj
Biełaruskaja prapahanda katory dzień nie moža naradavacca, što padmanam źniała film «Čužoje nieba» pra ciažkaści žyćcia emihrantaŭ za miažoj. Jany zładzili zakryty pakaz stužki ŭ Minsku i zrabili bieźlič repartažaŭ ź mierapryjemstva. Adzin ź ich — aŭtarstva Andreja Alaksandrava z ANT padajecca tak, nibyta jon dadatkova pahutaryŭ z hierojami stužki ŭžo paśla premjery. Ale heta taksama chłuśnia.
Jak «Našaj Nivie» raskazała adna z hieraiń filma, dadatkovuju razmovu ź imi, užo pa videasuviazi, zdymali ŭ studzieni 2025 hoda (u toj čas jak žyvyja zdymki, arhanizavanyja ich siabroŭkaj, prajšli jašče vosieńniu 2024 hoda).
«Apieratarka prosta skazała, što budzie jašče adna razmova pra našu situacyju, kab dać bolš techničnych detalaŭ».
Surazmoŭca padkreślivaje, što pa videasuviazi ź imi źviazvaŭsia dakładna nie Andrej Alaksandraŭ z ANT.
«Tam byŭ absalutna inšy mužčyna. Zdajecca, jon pradstaŭlaŭsia Alaksandram. Paśla jon pačyściŭ usie pierapiski, tamu i śladoŭ nie znojdzieš, kab niejak jaho asobu vyśvietlić».
Dziaŭčyna źviartaje ŭvahu, što padčas studzieńskaha intervju jana adčuvała, što ź im «niešta nie toje»:
«Viedajecie, mužčyna tak pravodziŭ hetuju razmovu, što jak by cisnuŭ uvieś čas. Mianie heta tady naviało na dumki, što, moža, heta nie Ofis Cichanoŭskaj, dla jakoha nibyta zapisvałasia videa, bo naŭrad ci ludzi adtul buduć tak razmaŭlać», — ale ŭrešcie jana supakoiła siabie tym, što zdymajecca pa prośbie svajoj znajomaj, jakoj daviaraje.
«Ja dumała, što taja pravieryła infarmacyju, vieryfikavała, chto ź joj źviazaŭsia. Bo ja b sama tak zrabiła. Ale, vidać, jana była tady ŭ bolš uraźlivym emacyjnym stanie, jaki dazvoliŭ pavieścisia na takoje».
Adnačasova z hetym dziaŭčyna padkreślivaje, što nie adčuvaje siabie achviaraj emihracyi, jak toje chacieli padać u filmie.
«Ja achviara ich padmanu — heta tak. Ale nakont samoha filma… Pa-pieršaje, razmova tam vielmi abrezanaja. A pa-druhoje, ja chacieła dadać, što emihracyja — sapraŭdy ciažki praces dla luboha čałavieka ŭ luboj krainie. Ale heta i toje, što dazvalaje čałavieku raści prafiesijna, raźvivacca, vučycca žyć. Narmalna ŭ niejki momant prachodzić praź ciažkaści, u tym liku finansavyja. Ale na treci hod emihracyi ja ŭ prafiesijnym płanie adčuvaju siabie nastolki ŭpeŭniena, nakolki nikoli nie adčuvała. I razumieju što, mahčyma, kali b žyła ŭ Biełarusi, to moj prafiesijny rost i nie zdaryŭsia b».
Na BT zrabili film pra toje, jak biełarusy ledź vyžyvajuć u Jeŭropie. Kab zapisać videa, hierojaŭ žorstka padmanuli
«Mnie soramna, ale ja navat nie pamiataju». Stali viadomyja novyja padrabiaznaści z pracesu zdymak emihrantaŭ dla kino na BT
Voś chto toj «režysior», jaki padmanam stvaryŭ film pra vilenskuju i biełastockuju emihracyju
Ciapier čytajuć
Chto toj nieadekvatny biełarus, jaki lasnuŭ dziciatka hałavoj ab padłohu ŭ maskoŭskim Šaramiećcievie8
Kamientary