Paśla pažaru ŭ načnym kłubie ŭ Paŭnočnaj Makiedonii zatrymany 10 čałaviek. U krainie — siamidzionnaja žałoba pa zahinułych
Na pažary zahinuli 59 čałaviek i 155 paciarpieli.
Palicyja zatrymała 10 čałaviek u ramkach rasśledavańnia pryčyn pažaru ŭ načnym kłubie ŭ Paŭnočnaj Makiedonii, u vyniku jakoha, pavodle apošnich źviestak, zahinuli 59 čałaviek i 155 paciarpieli, piša Bi-bi-si.
Pažar adbyŭsia kala 2:30 pa miascovym časie ŭ noč na niadzielu ŭ načnym kłubie Pulse u horadzie Kočani, kali tam vystupała papularnaja miascovaja hrupa DNK. Na kancert pryjšło kala 500 čałaviek.
Pavodle papiarednich źviestak, pryčynaj uzharańnia stała vykarystańnie piratechniki.
Pradstaŭnica Prakuratury Respubliki Paŭnočnaja Makiedonija Bialana Arsoŭska paviedamiła, što ŭ dačynieńni da 10 padazravanych u trahiedyi, u tym liku čynoŭnikaŭ, jakija vydali kłubu licenziju, byli vyniesieny pastanovy ab zatrymańni. Raniej miascovyja ŚMI paviedamlali ab zatrymańni ŭładalnika kłuba.
Jana taksama paviedamiła, što ŭ budynku kłuba byŭ tolki adzin pracujučy vychad, bo zadnija dźviery ŭstanovy byli začynienyja i nie mahli być vykarystanyja dla evakuacyi.
Pieršaja pravierka na miescy pažaru ŭ niadzielu, pavodle jaje słoŭ, taksama vyjaviła niekalki «anamalij».
Arsoŭskaja taksama paviedamiła, što paśla pažaru vyžyŭ tolki adzin udzielnik hrupy DNK — adzin z dvuch vakalistaŭ, jon znachodzicca ŭ balnicy. Astatnija muzykanty, u tym liku druhi vakalist, bek-vakalistka, bubnač, kłavišnik, a taksama fatohraf hrupy zahinuli.
Ministr unutranych spraŭ Paŭnočnaj Makiedonii Panče Taškoŭski raniej zajaviŭ, što pažar uźnik z-za iskraŭ ad piratechničnych pryład, jakija trapili na stol, zroblenuju ź lohkaŭzharalnaha materyjału.
Na źniatych naviedvalnikami kadrach vidać, jak ludzi sprabujuć zahasić uzharańnie, ale nie pakidajuć kłub paśla pačatku pažaru. Pavodle słoŭ vidavočcaŭ, kali ludzi pačali vychodzić z ustanovy, uźnikła ciskanina.
Miascovaja presa apisvaje Pulse, raźmieščany ŭ horadzie Kočani za 100 km na ŭschod ad stalicy Skopje, jak «impravizavany načny kłub». Pavodle danych ŚMI, raniej u hetym pamiaškańni znachodziŭsia skład dyvanoŭ.
20-hadovaja Maryja Tasieva raspaviała, što trapiła ŭ ciskaninu, kali ludzi kinulisia da vychadu. Pavodle jaje słoŭ, jana ŭpała na padłohu, ale ŭ vyniku zmahła znajści vychad.
«Nie viedaju jak, ale mnie niejkim čynam udałosia vybracca, — skazała jana ahienctvu Reuters. — Zaraz ja ŭ paradku, ale jość šmat zahinułych». Pavodle dziaŭčyny, jaje 25-hadovaja siastra taksama zahinuła.
Vałancior Čyrvonaha Kryža Mustafa Saidaŭ skazaŭ, što bolšaść paciarpiełych — maładyja ludzi va ŭzroście ad 18 da 20 hadoŭ. Pavodle aficyjnych danych, bolš za 20 paranienych i troje zahinułych byli maładziejšyja za 18 hadoŭ.
«Historyi vielmi sumnyja, i, na žal, zahinuła šmat maładych ludziej», — skazaŭ jon.
Uładzisłaŭ Hrujeŭ, śpiecyjalist pa płastyčnaj chirurhii ŭ Univiersiteckaj klinicy Skopje, paviedamiŭ, što bolšaść pacyjentaŭ, jakija prachodziać lačeńnie ŭ jaho balnicy, pastupili z šyrokimi apiokami.
«U ich apioki druhoj i treciaj stupieni ŭ vobłaści hałavy, šyi i vierchniaj častki tułava», — paviedamiŭ jon.
Dyrektar miascovaj balnicy ŭ Kočani raniej zajaviŭ, što piersanał spačatku mieŭ ciažkaści ź identyfikacyjaj pacyjentaŭ z-za adsutnaści ŭ ich dakumientaŭ. Stan 18 pacyjentaŭ, pavodle jaho słoŭ, aceńvaŭsia jak krytyčny.
Premjer-ministr Paŭnočnaj Makiedonii Chryścijan Mickoski zajaviŭ, što kraina straciła šmat maładych žyćciaŭ i nazvaŭ hety dzień «ciažkim i vielmi sumnym».
Ułady abviaścili siamidzionnuju ahulnanacyjanalnuju žałobu pa zahinułych.
Prezident Paŭnočnaj Makiedonii Hardona Siłjanoŭskaja-Daŭkova zajaviła, što šakavana «jak maci, čałaviek i prezident». «Vaš vielizarny bol — heta i moj bol», — skazała jana.
Siłjanoŭskaja-Daŭkova taksama paviedamiła, što najbolš ciažka paciarpiełyja byli dastaŭleny ŭ śpiecyjalizavanyja kliniki ŭ Bałharyi, Hrecyi, Sierbii i Turcyi.
«Niekatorym ludziam varta źniać ružovyja akulary». Lavončyk — pra Mielnikavu, uciečku ŭ «Bajchełp», biełyja palito i hrošy na 1300 palitviaźniaŭ10
Kamientary