Pahladzieli, u jakija harady dahetul voziać biełaruskich amataraŭ zakupaŭ.
U byłyja časy šop-tury ŭ Polšču i Litvu ličylisia niečym zvyčajnym, asabliva dla žycharoŭ pryhraničnych Bresta i Hrodna.
Ale pakolki situacyja ź miežami i pravozam tavaraŭ ciaham apošnich hadoŭ tolki paharšajecca, padobnyja pajezdki, chutčej, redkaść.
Brest
Praściej za ŭsio jeździć na šopinh žycharam Bresta. Adtul dahetul možna adpravicca ŭ šop-tur mikraaŭtobusami na 15-21 miesca z pryčepami. Praŭda, vybar haradoŭ nie taki ŭžo šyroki, jak raniej.
Tak, naprykład, adna ź miascovych firm ładzić amal štodzionnyja pajezdki z Bresta ŭ Biału-Padlasku.
Z Bresta vyjazdžajuć a 22-j hadzinie, na prachodžańnie miažy zakładajuć 8 hadzin. Kali ŭsio budzie iści pa płanie, to a 19-j nastupnaha dnia maršrutka musić viarnucca ŭ Brest. Košt pajezdki — 60 rubloŭ z čałavieka.
Aproč Biała-Padlaski, da jakoj ad biełaruskaj miažy mienš za 50 kiłamietraŭ, pa subotach hety ž pieravozčyk ładzić šop-tury ŭ Biełastok. Z Bresta vyjazdžajuć pryblizna a 19-j viečara piatnicy, a ź Biełastoka — a 16-j nastupnaha dnia. Košt pajezdki — 100 rubloŭ.
Ale navat u Breście pieravozčykaŭ, jakija prapanujuć padobnyja pasłuhi, zastałosia nie šmat.
U niekatorych kampanij, jakija niekali śpiecyjalizavalisia na šop-turach, sajty nie abnaŭlajucca z 2023-2024 hadoŭ, što dazvalaje paraŭnać ceny na pajezdki. Naprykład, niekali źjeździć na šopinh z Bresta ŭ Biału-Padlasku možna było ŭsiaho za 40 rubloŭ.
Hrodna
Paśla taho, jak Litva z 1 sakavika 2024 hoda zakryła jašče dva pamiežnyja pierachody na miažy ź Biełaruśsiu, Hrodna z pryhraničnaha horada pieratvaryŭsia ŭ tupikovy, tamu šop-tury z abłasnoha centra źnikli.
Minsk
Šop-tury ź Minska taksama byli davoli papularnymi, praŭda, u adroźnieńnie ad hrodziencaŭ i bieraściejcaŭ, žychary stalicy čaściej jeździli pa zakupy ŭ Litvu, čym u Polšču.
Adnak na siońnia mienavita šop-turaŭ ź Minska ŭ Vilniu nie zastałosia. Vierahodna, adbyłosia heta ŭ pieršuju čarhu praz skaračeńnie dazvołaŭ na pasažyrskija pieravozki z boku Litvy, bo čerhi z aŭtobusaŭ na miažy ź Litvoj — vialikaja redkaść.
Na sajtach turahienctvaŭ i pieravozčykaŭ infarmacyja abo sastarełaja (heta bačna pa cenach — ukłaścisia ŭ 100 rubloŭ za pajezdku pa maršrucie Minsk-Vilnia-Minsk u sučasnych umovach nierealna), abo napisana, što «tur časova prypynieny».
A voś šop-tury ź Minska ŭ Biełastok jašče zachavalisia. Praŭda, aŭtobusy ciapier mohuć trapić tudy tolki praz Brest, bo praź Litvu turystyčnyja aŭtobusy, jakija nakiroŭvajucca ŭ Polšču, bolš nie prapuskajuć.
Šop-tury ŭ Biełastok ciapier prapanujuć usiaho niekalki pieravozčykaŭ. Ceny ad 150 da 195 rubloŭ z čałavieka.
Ale ŭ bolšaści staličnych kampanij, jakija raniej zajmalisia šop-turami ŭ Polšču, infarmacyja na sajtach daŭno nie abnaŭlałasia, časta paznačana, što «tur admienieny» abo «tur płanujecca».
Kamientary