Mora za 200 mietraŭ, krevietki pa kursie čornaha rynku. Biełarus pažyŭ u Jehipcie, a potym pierajechaŭ u Polšču

Čamu Jehipiet?

— Mnie treba było vielmi terminova, litaralna za sutki pakinuć Biełaruś. A pakolki ŭ Jehipcie było da kaho lacieć, i viza robicca prosta ŭ aeraporcie, vybar byŭ na hety kirunak.

Spačatku ja prylacieŭ u Kair. Viza kuplajecca na vychadzie pierad pašpartnym kantrolem. Kaštavała jana kala $30. Pryčym płacić treba było mienavita ŭ dalarach. U krainie brakuje valuty, tamu jany sprabujuć usimi sposabami jaje atrymać.

U Jehipcie žyvuć i pracujuć maje znajomyja. Jany damovilisia z partniorami pa pracy, kab mianie sustreli. Tak što mianie davieźli niepasredna da miesca na mašynie z kiroŭcam.

Heta byŭ bieduinski horad prykładna za 300 km ad Kaira, na bierazie Mižziemnaha mora. Pa sutnaści, vakoł pustynia, i tolki kajfovaje ŭźbiarežža.

Asablivaści lehalizacyi

— Pieršy miesiac ja žyŭ na turystyčnaj vizie. Potym možna było źviarnucca ŭ mihracyjny centr u adnym z haradoŭ, naprykład, u Kairy. Prosta na toj padstavie, što ty biełarus, mahčyma było praciahnuć dziejańnie vizy jašče na miesiac.

Potym pracoŭnyja partniory znajomych uładkavali mianie da siabie ŭ kampaniju jak enikiejščyka (śpiecyjalist pa techničnaj padtrymcy i absłuhoŭvańni kampjutarnaj techniki). Dalej užo hetaja arhanizacyja zajmałasia majoj lehalizacyjaj. Jany dapamahli aformić nie pracoŭny, a turystyčny dazvoł na žycharstva (DNŽ).

U Jehipcie možna navat u apošni dzień dziejańnia svajoj vizy pryjści ŭ mihracyjny centr u Kairy i padać dakumienty na DNŽ pa turystyčnych pryčynach. Naprykład, kali chočaš jašče padarožničać, pahladzieć słavutaści abo prosta pažyć.

Darečy, pry padačy dakumientaŭ jany navat nie praviarali, ci jość u mianie ŭsie nieabchodnyja papiery. Naprykład, patrabavałasia paćvierdžańnie pražyvańnia, damova arendy, a ŭ mianie jaje nie było. Ale dakumienty pryniali i navat ničoha nie spytali. Jość padazreńnie, što prosta tamu, što ja biełarus.

Hety DNŽ mohuć vydać na 2-3 miesiacy abo navat mienš. Ale mnie vydali na paŭhoda. U vyniku ja prylacieŭ u Polšču jašče z sapraŭdnym jehipieckim DNŽ.

Žyllo ŭ Jehipcie

— Mianie praktyčna adrazu pasialili ŭ žyły kompleks, dzie kampanija, u jakoj ja ŭładkavaŭsia, zdymała kvatery dla supracoŭnikaŭ.

Kvatera była prosta na ŭźbiarežžy Mižziemnaha mora. I heta byŭ davoli dobry elitny kompleks. Jak mnie raskazvali, takija kvatery mahli sabie dazvolić tolki bahatyja jehipcianie.

Ale jakaść žylla była nie vielmi dobraj. Naprykład, pamiž dźviaryma i padłohaj byli davoli šyrokija ščyliny, praź jakija da mianie pastajanna niešta zalatała abo zabiahała. Čaściej za ŭsio heta byli kamary. Ich nie čuješ i nie adčuvaješ, pakul jany ciabie nie ŭkusiać.

U siezon daždžoŭ usia vada z bałkona ciekła praz hetu ščylinu prosta ŭ pakoj, i jon pieratvaraŭsia ŭ basiejn.

Kvatera kaštavała 20 tysiač jehipieckich funtaŭ, na toj momant heta było kala $660-670.

U Jehipcie jość aficyjny i nieaficyjny kursy valut. Kali aficyjny kurs byŭ 31 funt za dalar, to na čornym rynku amal uvieś čas, što ja tam žyŭ, kurs byŭ kala 50 za dalar.

Čym zaniacca, akramia pracy

— Ja prylacieŭ u kancy siezona, i tam užo ničoha nie było. Pa sutnaści, adzinaj zabavaj byŭ internet.

U ich niama bieźlimitnaha internetu, i pieryjadyčna sietka padaje tak, nibyta jany pačynajuć błakavać usie viadomyja pratakoły. Pry hetym Telegram i Psiphon pracujuć, a inšyja VPN zvyčajna błakujucca.

Ale było sapraŭdy kajfova: mora było ŭsiaho za 200 mietraŭ, možna było prosta chadzić i hadzinami płavać u vielmi ciopłaj vadzie.

Na plažy chapała śmiećcia, jak, u pryncypie, i ŭsiudy ŭ Jehipcie, ale samo mora było čystym i prazrystym.

Naohuł u Jehipcie śmiećcie na kožnym kroku. Ja bačyŭ śmietnicy, napeŭna, tolki ŭ Kairy i Aleksandryi, i to ŭ turystyčnych miescach. A tak, tam litaralna jedzie mašyna, i z akna vykidajuć pakiet sa śmiećciem.

Ci ž idzieš pa vulicy, jehipcianie pjuć limanad z butelek, a potym pakidajuć butelku prosta kala ściany.

Ja čuŭ pra horad śmiećciaroŭ (chryścijanski kopcki kvartał na ŭskrainie Kaira, jaki zajmajecca zboram śmiećcia dla jaho pierapracoŭki i ŭtylizacyi).

Ja tam nie byŭ, ale maje siabry vielmi im urazilisia. Ale ŭ tym horadzie, dzie ja žyŭ, takoha nie było. Prosta śmiećcie vakoł, cełyja pali śmiećcia za horadam.

Palicejskaja dziaržava i prablemy ź miedabsłuhoŭvańniem

— U kampanii, dzie ja pracavaŭ, była opcyja: možna było ŭziać mašynu z kiroŭcam ci ž vadzić samastojna. Ja braŭ z kiroŭcam, bo chutka zrazumieŭ, što nie chaču siadać u Jehipcie za rul.

U horadzie praktyčna niama piešachodnych pierachodaŭ. Śviatłafory ja naohuł bačyŭ adziny raz u samym centry Kaira. Pry hetym nichto na śviatłafory nie aryjentujecca, usie jeździać, jak chočuć. A kali ty vyrašyš pierajści praz šašu, dzie ŭ kožny bok pa 8 pałos, to prosta idzieš i hladziš va ŭsie baki, tamu što tam jašče jość takaja tema, jak jazda pa sustrečcy.

Ź inšych minusaŭ — Jehipiet vielmi palicejskaja dziaržava. U ich palicyjanty i vajskoŭcy — jak asobnaja kasta.

Taksama ja čuŭ drennyja vodhuki ab jehipieckaj miedycynie. Nakolki ja zrazumieŭ, niama dastatkovaha ŭzroŭniu padtrymki sanitaryi va ŭstanovach, i sama jakaść miedycynskaha absłuhoŭvańnia pakidaje žadać lepšaha. Ułasna, heta i było adnym z pointaŭ, kali ja pisaŭ zvarot da polskaha ambasadara.

Ja prasiŭ vydać mnie vizu, bo ŭ mianie jość surjoznaje zachvorvańnie, i «liču, što mnie niebiaśpiečna znachodzicca ŭ Jehipcie, bo mnie, kali što, nie akažuć naležnuju miedycynskuju dapamohu».

Plusy žyćcia ŭ Jehipcie

— Sonca, mora, piasok — heta kajf. Dastatkova nizkija ceny na miascovyja pradukty.

Naprykład, ja moh kupić za $8 (pa kursie čornaha rynku) kiłahram hatovych krevietak u paniroŭcy, z mnostvam śpiecyj, z rysam i sałataj. Tak ja abiedaŭ kožny dzień.

Kali ty zmožaš pryvitacca pa-arabsku abo spytać, jak spravy, staŭleńnie da ciabie budzie značna lepšym. Kali vyvučyš movu, tabie navat pierastanuć zavyšać ceny.

U maleńkich kramkach jość dva vidy ceńnikaŭ — dla svaich i pryjezžych. Naprykład, šaurma ŭ siryjskim restarančyku dla miascovych była 30 funtaŭ. A dla mianie ŭžo ŭ dva-try razy daražej.

Pryčyny pierajezdu ŭ Polšču

— Pa niekalkich pryčynach. Pierš za ŭsio, była ryzyka, što Jehipiet moža mianie departavać. Viadoma, unutry krainy nichto b mianie nie čapaŭ, ale, naprykład, kali b ja sabraŭsia kudyści lacieć, to mianie b zatrymali i źmiaścili ŭ turmu pierad vysyłkaj (a turmy ŭ ich žorstkija, jak ja čuŭ).

Tamu ja źviazaŭsia z polskaj ambasadaj. Mnie skazali, kab ja padaŭ list ad adnoj z pravaabarončych arhanizacyj u Varšavie. Ale tady jakraz staŭ nabirać abaroty vizavy skandał, i pravaabaroncy skazali, što «ŭ suviazi z apošnimi padziejami» jany časova prypyniajuć vydaču rekamiendacyj.

Ja napisaŭ pra heta ŭ ambasadu, ale jany adkazali, što im usio roŭna treba daručalnictva mienavita ad hetaj arhanizacyi.

Pa vyniku praź siabroŭ atrymałasia vyjści na kiraŭnika inšaha fondu ŭ Polščy i atrymać rekamiendacyju ŭžo ad ich.

U polskaj ambasadzie skazali, što rekamiendacyja sumnieŭnaja, jany nie viedajuć, što heta za fond. Ale dazvolili ŭsio ž padać dakumienty z farmuloŭkaj «uličycie, što my ličym Jehipiet biaśpiečnaj krainaj».

Ja potym bačyŭ, što ŭ Hruzii z takoj farmuloŭkaj dajuć admovy, i napisaŭ padrabiazny zvarot da pasła na 5 staronak (tam možna na ruskaj ci biełaruskaj), dzie raśpisaŭ usie detali svajoj spravy. Dumaju, heta i jašče kuča dakumientaŭ i razdrukavanych skrynšotaŭ adyhrali svaju rolu.

U vyniku ja ŭsio ž atrymaŭ vizu i ciapier žyvu ŭ Polščy. I mahu skazać, što tut vidavočna kajfoviej — i ŭ płanie žyćcia, i pracy.

Parada tym, chto zastaniecca ŭ Jehipcie nadoŭha

Napeŭna, źmirycca. Bo ład žyćcia tam vielmi mocna adroźnivajecca ad našaha, i niejkaja dola źmireńnia ŭsio ž taki pavinna prysutničać.

I inšaja parada — čaściej myć ruki.

Varta vučyć arabskuju, heta budzie plusam. U Jehipcie tam dastatkova žorstkija abmiežavańni na kuplu nieruchomaści dla nierezidentaŭ.

Navat z dazvołam na žycharstva ty nie zmožaš aformić paŭnavartasnuju kuplu, chutčej, heta budzie jak arenda na praciahły termin (u bolšaści kurortnych łakacyj zamiežniki mohuć aformić leasehold na 99 hadoŭ, ale ŭ afrykanskaj častcy Jehipta dapuskajecca poŭnaje vałodańnie abo freehold).

Dumaju, možna pasprabavać atrymać pašpart. Nie pa turystyčnym DNŽ, viadoma, ale kali lehalizavacca aficyjna, to całkam mahčyma.

• 3
• 0
• 1
• 3
• 1
• 3
• 0
• 0