Niekalki dziasiatkaŭ biełarusaŭ zatrymali z pačatku hoda pa viartańni ŭ krainu

Fota: Viasna

Taksama pad dadatkovyja pravierki na miažy traplajuć ludzi, jakija raniej zatrymlivalisia na akcyjach pratestu i trapili ŭ bazu «BIESparadki», i tyja, chto daŭno nie žyvie ŭ Biełarusi, piša «Viasna».

Na pačatku lutaha stała viadoma, što z adnaho rejsavaha aŭtobusa zatrymali adrazu šeść čałaviek.

Usich zatrymanych da suda źmiaścili ŭ IČU ŭ bližejšym ad miažy horadzie, paśla čaho niekatorym pryznačyli «sutki».

Zvyčajna ludziej, jakich zatrymali ŭ punkcie propusku, sudziać za «raspaŭsiud ekstremisckich materyjałaŭ» (art. 19.11 KoAP). Vyklučeńniem mohuć stać tyja, kaho zatrymlivaje KDB. U takim vypadku, kali dopyt adbyvajecca ŭ Minsku, to tam suprać ich składajuć pratakoł za «drobnaje chulihanstva» (art. 19.1 KoAP), abo adrazu źmiaščajuć u SIZA ŭ miežach kryminalnaj spravy.

«Viaśnie» viadomyja vypadki, kali čałaviek šmat razoŭ pierasiakaŭ miažu ciaham apošnich niekalki hadoŭ i nikoli nie sutykaŭsia z dadatkovymi pravierkami, padčas znachodžańnia ŭ Biełarusi nie zatrymlivaŭsia, ale ŭ vyniku pry čarhovaj sprobie zajechać u Biełaruś adrazu paśla pašpartnaha kantrolu byŭ zatrymany.

Tamu varta adznačyć, što situacyja źmianiajecca ŭvieś čas i niama nijakich harantyj, što čałaviek, jaki raniej zajazdžaŭ i vyjazdžaŭ biez prablem, nie trapić u pole zroku siłavikoŭ praź niejkija novyja fakty jaho pratesnaj aktyŭnaści ŭ minułym.

Zatrymańnie paśla viartańnia ŭ Biełaruś nieabaviazkova adbyvajecca adrazu na miažy. Za niekatorymi siłaviki prychodziać praź niekalki dzion, albo telefanujuć i prosiać pryjści samastojna na razmovu.

Aproč usiaho, na miažy praciahvajucca dopyty ŭkraincaŭ, jakija pryjazdžajuć u Biełaruś. Razmovy zajmajuć ad niekalkich chvilinaŭ da niekalkich hadzinaŭ. Tamu rejsavyja aŭtobusy vymušany čakać pa niekalki hadzinaŭ ich viartańnia.

Taksama niadaŭna «Bajsoł» paviedamiŭ pra ŭzmocnienyja pravierki na miažy pry vyjeździe z krainy.

Taksama siłaviki adsočvajuć udzielnikaŭ biełaruskich akcyj salidarnaści, jakija adbyvajucca za miažoj. Tak, Hienprakuratura naprykancy studzienia paviedamiła, što «identyfikavała 365 udzielnikaŭ akcyj za miažoj». Usich ich źbirajucca pryciahnuć da kryminalnaj adkaznaści ŭ paradku śpiecyjalnaj vytvorčaści. Bolšaść ź identyfikavanych z Varšavy (203 čałavieki).

Taksama viedamstva zhadała, što va ŭdzielnikaŭ akcyjaŭ buduć šukać majomaść na terytoryi Biełarusi, «u tym liku zarehistravanuju na inšych asobaŭ». Viadoma, što ŭ minułyja hady siłaviki ŭžo pryciahvali da administracyjnaj adkaznaści ŭdzielnikaŭ zamiežnych akcyj.

• 2
• 0
• 0
• 5
• 2
• 2
• 15
• 0