Eks-maładafrontaŭca Dubskaha schapili ŭ Varoniežy i nibyta chacieli adpravić na vajnu. A potym jon uspłyŭ u prapahandystaŭ
Chłopiec ź ćmianaj bijahrafijaj pahražaŭ Ksienii Lebiedzievaj, što kali jana jamu nie dapamoža, to jon napiša ŭ «Našu Nivu».
Dniami były maładafrontaviec Arciom Dubski zaśviaciŭsia ŭ rasijskich miedyja — maŭlaŭ, u Varoniežy jaho, hramadzianina Biełarusi, sprabavali hvałtoŭna adpravić na vajnu. Akazałasia, što ŭ historyi nie ŭsio tak prosta.
Chto taki Dubski? Piersanaž ź nieadnaznačnaj bijahrafijaj.
Arciom dałučyŭsia da «Maładoha frontu» ŭ 2006-m, kali jamu było 19 hadoŭ. U kancy nulavych na Dubskaha zaviali kryminalnuju spravu za ŭdzieł u pratestach. Jon atrymaŭ chatniuju chimiju, ale pad pahrozaj jašče adnoj kryminałki vyjechaŭ va Ukrainu. Kali ŭsio ž viarnuŭsia, atrymaŭ hod kałonii — za ŭchileńnie ad pakarańnia. Dubski byŭ pryznany palitviaźniem.
Paśla vyzvaleńnia žyŭ va Ukrainie, paśla ŭ Polščy.
U 2022-m Dubski trapiŭ pad uvahu polskich siłavikoŭ za publičnyja abrazy ŭkrainskich uciekačoŭ. Jaho sabralisia sudzić, tamu jon źjechaŭ u Biełaruś, dzie paśpieŭ dać intervju prapahandystam.
A ŭrešcie asieŭ u Rasii, dzie žyvie ŭžo treci hod. Siabram chłopiec tłumačyŭ heta tym, što pryjechaŭ u Varoniež da budučaj žonki — jana, taksama biełaruska, žyvie tam.
Niadaŭna Dubski źjaviŭsia ŭ rasijskich miedyja. Arciom raskazaŭ, što 29 studzienia 2025 hoda jon pajšoŭ u adzin z varoniežskich punktaŭ vydačy zakazaŭ. Tam jamu admovilisia vydavać tavar. Pačałasia svarka, Dubski pazvaniŭ u palicyju, ale ŭčastkovy zamiest dapamohi vyklikaŭ kaleh.
Pa słovach Dubskaha, jaho spakavali, advieźli ŭ adździaleńnie palicyi, pry hetym paškodzili jamu plačo — u chłopca vylecieŭ sustaŭ. Palicejskija vyklikali chutkuju, jamu ŭkałoli abiazbolvalnyja srodki i zrabili renthien, ale ŭ balnicy nie pakinuli, daviałosia viartacca ŭ adździaleńnie.
A tam jaho byccam sprabavali zavierbavać na vajnu — pry tym što jon maje biełaruskaje hramadzianstva i nie abaviazany jechać na front. Pa słovach Dubskaha, pratakoły na jaho doŭha nie składali, admaŭlalisia zvanić u biełaruskaje konsulstva, a paśla jamu znoŭ «vyciahnuli» sustaŭ, i chłopiec jašče raz trapiŭ u balnicu. Dalej jaho znoŭ viarnuli ŭ adździeł, adkul jon źbieh rankam 30 studzienia dziakujučy pieraźmiency palicejskich.
Takuju viersiju padziej Arciom raskazaŭ rasijskamu telehram-kanału «Aściarožna, naviny». Varta adznačyć, što nijakich dokazaŭ hetaj historyi — naprykład, dakumientaŭ z adździeła ci balnicy — apublikavana nie było.
Pasolstva Biełarusi ŭ Rasii zajaviła, što ŭ kursie situacyi i znachodzicca ŭ ščylnym kantakcie z Dubskim. Rasijskija siłaviki raskazali, što za minuły hod Dubski kala 50 razoŭ ładziŭ skandały ŭ tym punkcie vydačy, a pry apošnim zatrymańni «dvojčy imitavaŭ paharšeńnie samaadčuvańnia».
A 5 lutaha pra kamunikacyju z Dubskim napisała biełaruskaja prapahandystka Ksienija Lebiedzieva. Jana apublikavała cytaty ź pierapiski — pavodle ich, Dubski, kab viarnuć svoj pašpart, źbiraŭsia napisać roznym miedyja. I pahražaŭ, što kali biełaruskija dziaržaŭnyja prapahandysty nie dapamohuć, to jon pojdzie skardzicca niezaležnym žurnalistam.
«Tut jość šans unikalny, vielmi vadka pad siabie schadzić. Nu, ujavicie, jakaja karcinka budzie, ja prosta ŭsłych ciapier razvažaju: kali taja ž «Niva Naša», jakaja publikuje aficyjny zvarot, naprykład, majoj havoračaj hałavy, što ja, voś taki biedałaha, trapiŭ u takuju situacyju ŭ rasijskaj palicyi, dzie braciški-rasiški ŭsialak ździekavalisia ź biednaha biełarusika, chacieli jaho, ułasna, na vajnu zapakavać.
A jon taki vybieh i, značyć, łamanuŭsia ŭ biełaruskaje pasolstva. A jamu tam fihu pakazali. Jon łamanuŭsia da biełaruskich miedyjščykaŭ, tam da Ksienii [Lebiedzievaj], da Pratasieviča — zaraz budu pisać — a jamu adtul jašče bolšuju fihu pakazali. I jon užo ad biezvychodnaści łamanuŭsia da tak zvanych destruktyŭnych. I tam jaho aśviatlili. Ujavicie, jak heta budzie pryhoža, viasiołka źziaje na niebie jasnym».
Pavodle słoŭ Lebiedzievaj, Dubski chvaliŭsia joj, što dasłaŭ svaju historyju prykładna ŭ 80 telehram-kanałaŭ.
Pašpart, jaki zabrali palicejskija, Dubskaha nibyta nie nadta chvalavaŭ.
«Dy chren na pašpart, mianie za piaciorku ŭ Jeŭropu zaviazuć. Biez prablem, ja tudy traplu, tam adnaŭlu ŭsie polskija dakumienty», — pisaŭ Dubski Lebiedzievaj.
Ale pierad hetym usio ž pastaraŭsia maksimalna raspaŭsiudzić historyju pra hvałtoŭnuju adpraŭku na vajnu.
«Naša Niva» — bastyjon biełaruščyny
PADTRYMAĆCiapier čytajuć
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty44
Kamientary