«Kinuŭ i zabyŭsia». U ZŠA stvaryli ŭdarny dron u vyhladzie miača dla amierykanskaha futbołu
Niezvyčajnaj formy bieśpiłotnik, pa słovach raspracoŭščykaŭ, pryznačany jak dla bajavych, tak i dla raźviedvalnych ci navat humanitarnych metaŭ. Mietad zapusku całkam anałahičny špurlańniu hulniavoha miača.
Kampanija XDown paviedamiła pra stvareńnie i paśpiachovyja vyprabavańni novaha bieśpiłotnika-kamikadze pad nazvaj P.S. Killer, jaki svajoj formaj padobny na miač dla amierykanskaha futbołu i zapuskajecca pavodle taho ž pryncypu.
Pavodle relizu kampanii, bieśpiłotnik pieršapačatkova byŭ stvorany dla bajavych i raźviedvalnych misij Sił śpiecyjalnych apieracyj ZŠA, ale taksama moža vykonvać humanitarnyja funkcyi.
P.S. Killer moža być zapuščany lubym čałaviekam za 2 siekundy pavodle pryncypu «kinuŭ i zabyŭsia» — dastatkova tolki padkinuć jaho ŭ pavietra.
Dron-kamikadze važyć usiaho kala 800 hramaŭ i moža nieści karysnuju nahruzku anałahičnaj vahi, pry hetym pierasoŭvajučysia amal niezaŭvažna. Chutkaść ruchu moža dasiahać 250 km/h, a maksimalnaja adlehłaść palotu (u zaležnaści ad hruzu) — bolš za 64 km, adznačaje kampanija XDown.
Pry standartnaj bajavoj nahruzcy dron moža kropkava niejtralizoŭvać piachotu, broniemašyny i navat bajavyja tanki (a taksama nievialikija celi ŭ adkrytym mory), a kali zamianić vybuchoŭku na kamiery, to bieśpiłotnik pieratvarajecca ŭ vysokakłasny instrumient nazirańnia za pierasoŭvańniem niepryjaciela i vyjaŭleńnia snajpierskich pazicyj.
Aproč hetaha, dron možna vykarystoŭvać dla dastaŭki ježy, bojeprypasaŭ i lekaŭ sałdatam na pole boju, a taksama pravodzić apieracyi pa pošuku i vyratavańni (jak u vajenny, tak i ŭ mirny čas).
Košt adnaho takoha drona abo cełaj partyi pakul aficyjna nie nazyvajecca.
Ciapier čytajuć
Łukašenka choča pastavić na «Pałanezy» jadziernyja bojehałoŭki17
Łukašenka choča pastavić na «Pałanezy» jadziernyja bojehałoŭki
«Jon kazaŭ, što zołata z saboj nie zabiareš, lepiej zrabić niešta dla inšych». Dačka biznesmiena Kalina raskazała, jak razam z bratam čakaje jaho z kałonii
Kamientary