Ukrainski film «2000 mietraŭ da Andrejeŭki» pakazaŭ vajnu vačyma bajcoŭ. Niekatoryja hinuli ŭ kadry

Mścisłaŭ Čarnoŭ, čyj dakumientalny film «20 dzion u Maryupali» ŭ 2024 hodzie atrymaŭ «Oskar» za najlepšy dakumientalny film, vypuściŭ novy film ab padziejach vajny — «2000 mietraŭ da Andrejeŭki».

U studzieni hetaha hoda film atrymaŭ pryz za režusuru na fiestyvali «Sandens» (ZŠA).

The Directing Award: World Cinema Documentary goes to Mstyslav Chernov @mstyslavchernov for “2000 Meters to Andriivka” pic.twitter.com/wc1W1RP9lO

— Sundance Film Festival (@sundancefest) January 31, 2025

U centry filma — bai, jakija adbyvalisia ŭ 2023 hodzie za vyzvaleńnie nievialikaha ŭkrainskaha siała Andrejeŭka, jakoje źjaŭlałasia vielmi važnym płacdarmam dla dalejšych bajoŭ za Bachmut.

Nazva filma adlustroŭvaje fizičnuju i psichałahičnuju dystancyju, jakuju treba pieraadoleć ukrainskim vajskoŭcam dla vyzvaleńnia Andrejeŭki. 2000 mietraŭ — heta nie prosta adlehłaść na karcie, a šlach praź minnyja pali, abstreły i ruiny, šlach, dzie kožny mietr moža stać apošnim. Jak adznačaje Čarnoŭ za kadram, «tut nie maje značeńnia adlehłaść, tolki čas», bo ŭsio zaležyć ad taho, nakolki chutka pačnie pracavać rasijski minamiot.

Pavialičyć

Film byŭ źniaty niepasredna padčas bajavych dziejańniaŭ na froncie ŭ vieraśni 2023 hoda. Dla pieradačy atmaśfiery režysior vykarystoŭvaje spałučeńnie dvuch typaŭ kamiery — kłasičnaj abjektyŭnaj, jakaja fiksuje razmovy, pierapynki pamiž bajami, emocyi bajcoŭ, i subjektyŭnaj, jakaja prymacavana da šlemaŭ bajcoŭ i fiksuje padziei ich ułasnymi vačyma. Čarnoŭ vykarystoŭvaje taki mietad, kab maksimalna nablizić hledača da realnaści frontu.

U centry apoviedu — bajcy 3-j asobnaj šturmavoj bryhady Uzbrojenych sił Ukrainy. Siarod ich kamandzir padraździaleńnia z pazyŭnym «Fiedzia», jakomu daručana ŭstanavić ukrainski ściah u siale.

Adna z samych zapaminalnych scen — heta razmova z 46-hadovym dobraachvotnikam, jaki ŭ čas pierapynku daje abiacańnie paśla vajny mienš kuryć, pierajści z cyharet chacia b na samakrutki. Z zakadravaha kamientaryja hladač daviedvajecca, što praź piać miesiacaŭ hety hieroj pamre ad atrymanych ran.

Film nie prycharošvaje rečaisnaść: mnohija z hierojaŭ hinuć, i Čarnoŭ nie chavaje hetaha. Tak prosta ŭ kadry hinie 24-hadovy sałdat z pazyŭnym «Haharyn».

Krytyki adznačajuć cikavuju strukturu filma. Jak i ŭ «20 dniach u Maryupali», jon padzieleny na častki. Ale tut adlik idzie nie na dni, jak u popiarednim filmie, a na mietry. Čym bližej hieroi da Andrejeŭki, tym vyšejšaja cana, jakuju jany płaciać za vyzvaleńnie hetaha siała.

Režysior pakazvaje nie tolki momanty boju, ale i toje, što adbyvajecca paśla: jak tavaryšy viazuć cieły zahinułych, jak reahujuć na straty, jak pišuć apošnija paviedamleńni siemjam.

Pavialičyć

Jak adznačajuć kinakrytyki, «2000 mietraŭ da Andrejeŭki» nie tolki fiksuje chod vajny, ale i stavić fiłasofskija pytańni. Režysior pakazvaje, što vajna — heta nie tolki stratehija i taktyka, ale i čałaviečyja losy, bol i stomlenaść. Jon procidziejničaje narmalizacyi vajny, prymušaje hledača nie prosta hladzieć, a pieražyvać toje, što adbyvajecca. Film nie daje hatovych adkazaŭ, ale prymušaje zadumacca pra sens baraćby i košt kožnaha mietra ziamli, za jaki iduć žorstkija bai.

U adnoj scenie «Fiedzia» adkryta havoryć, što vajna stała jaho kašmaram, ad jakoha nielha pračnucca. Urešcie, jaho padraździaleńnie dachodzić da Andrejeŭki i ustanaŭlivaje ŭkrainski ściah. A siarod razburanych damoŭ i vypalenaj ziamli bajcy znachodziać trochkolernuju košku.

«Kot, my ciabie vyniesiem. Ciarpi, kazakom budzieš», — kaža adzin z bajcoŭ i sadzić žyviołu ŭ zaplečnik.

Pavialičyć

14 vieraśnia 2023 hoda Ministerstva abarony Ukrainy paviedamiła ab vyzvaleńni Andrejeŭki i źniščeńni bolšaj častki piachoty 72-j Asobnaj motastrałkovaj bryhady Uzbrojenych sił Rasii. Na toj momant siało, u jakim da vajny žyło mienš za sotniu čałaviek, było całkam razburana. Ciapier Andreeŭka znoŭ znachodzicca pad kantrolem Rasii.

• 5
• 1
• 1
• 1
• 1
• 27
• 2
• 0