Viadučy analityčny centr, jaki kansultuje rasijski ŭrad pa pytańniach ekanomiki, papiaredziŭ Kreml pra narastajučyja prablemy va ŭmovach vysokaj inflacyi i zapavoleńnia ekanamičnaha rostu.
«Rasijskaja ekanomika staić pierad pahrozaj maštabnaha ŭsplosku karparatyŭnych bankructvaŭ užo ŭ hetym hodzie», — havorycca ŭ dakładzie Centra makraekanamičnaha analizu i karotkaterminovaha prahnazavańnia, jaki kansultuje ŭrad Rasii, pieradaje ahienctva Reuters.
Pavodle danych analityčnaha centra, dola rasijskich pradpryjemstvaŭ z ryzykoŭnym uzroŭniem zapazyčanaści ŭ struktury ahulnaj vyručki za 2024 hod padvoiłasia. Heta śviedčyć ab narastajučych prablemach va ŭmovach vysokaj inflacyi i zapavoleńnia ekanamičnaha rostu, što vyliłasia ŭ niadaŭniaje pavyšeńnie klučavoj staŭki ŭ Rasii da rekordnych 21%.
Analityki Kramla papiaredžvajuć, što na kaniec 2024 hoda dola kampanij u ahulnym karparatyŭnym dachodzie, u jakich pracentnyja płaciažy składajuć dźvie traciny ad skarektavanaj prybytkovaści, mahła dasiahnuć 20%.
Naprykład, rasijski apieratar mabilnaj suviazi MTS zajaviŭ, što ŭ trecim kvartale 2024 hoda čysty prybytak kampanii skaraciŭsia na 88,8% u vyniku rostu pracentnych vydatkaŭ. U Rasijskaj čyhunki vydatki na absłuhoŭvańnie doŭhu ŭ pačatku hetaha hoda pavialičylisia da $4 miljardaŭ.
Rasijski biznes usio čaściej sutykajecca ź ciažkaściami z-za vysokich pracentnych stavak, jakija značna pavialičvajuć košt zapazyčańniaŭ. Mnohija pradpryjemstvy zamiest taho, kab inviestavać u siabie ci raspłočvacca z pastaŭščykami, pierachodziać na stratehiju maksimalnaha zachavańnia finansavych srodkaŭ: raźmiaščajuć najaŭnyja hrošy ŭ bankach abo nabyvajuć biezryzykoŭnyja dziaržaŭnyja ablihacyi z vysokimi pracentnymi staŭkami, śviedčać danyja kramloŭskich analitykaŭ.
U vyniku ŭsio bolšaja kolkaść kampanij sutykajecca z prablemaj niavypłat ad kontrahientaŭ (inšych kampanij-partnioraŭ pa ździełkach). Dola takich vypadkaŭ u ahulnaj vyručcy pavialičyłasia da 37% u trecim kvartale 2024 hoda, u toj čas jak u 2021-2023 hadach jana składała kala 20%.
Heta śviedčyć ab tym, što bolš za tracinu dachodaŭ rasijskich kampanij niesvoječasova abo ŭvohule nie apłačvajuć. Pradpryjemstvy i biznesy, jakija nie atrymlivajuć apłaty za pastaŭlenyja tavary ci pasłuhi, sami sutykajucca ź niedachopam srodkaŭ. Heta pryvodzić da taho, što jany taksama nie mohuć svoječasova vykonvać svaje abaviazacielstvy pierad pastaŭščykami, supracoŭnikami abo bankami. U vyniku ŭźnikaje łancuhovaja reakcyja: prablemy adnoj kampanii pieradajucca inšym, što moža spravakavać maštabny kryzis u ekanomicy, rost bankructvaŭ i istotnaje źnižeńnie dziełavoj aktyŭnaści.
«Zapavoleńnie dynamiki inviestycyj u vytvorčyja mahutnaści i źnižeńnie patencyjału ekanamičnaha rostu ŭžo nazirajucca. Pa našych prahnozach, u 2025 hodzie rost inviestycyj moža źnizicca ź ciapierašnich 7% da 1,7-2,0%», — pišuć dziaržaŭnyja daśledčyki.
Pry hetym, analityki z brytanskaha Karaleŭskaha instytuta abjadnanych słužbaŭ (RUSI) vykazvali dumku, što realnaja ekanamičnaja situacyja ŭ Rasii nie takaja katastrafičnaja, jak časta padajecca. Daśledčyki źviartajuć uvahu na rost VUP u 2023 hodzie na 3,6% i čakany padobny rost u 2024 hodzie. Rasijskaja ekanomika zachoŭvaje ŭstojlivaść dziakujučy vysokim zarobkam u vajennym siektary i pavieličeńniu inviestycyj u abstalavańnie, zajaŭlali brytanskija analityki.
Pa acenkach RUSI, niahledziačy na sankcyi i vysokija pracentnyja staŭki, bujnyja rasijskija kampanii ŭsio jašče majuć dostup da dziaržaŭnych kredytaŭ, što dazvalaje im paźbiahać krytyčnych finansavych prablem. Bolš za toje, rasijski ŭrad zdolny padtrymlivać ekanomiku za košt unutranych resursaŭ, finansujučy dziaržaŭnyja vydatki i padtrymlivajučy spažyvieckija vydatki na vysokim uzroŭni.
«Na žal, nadziei na niepaźbiežny ekanamičny kryzis naŭrad ci apraŭdajucca. Choć Rasija, niesumnienna, sutykajecca sa značnymi prablemami, mała što havoryć pra toje, što jany pryviaduć da jakich-niebudź značnych palityčnych nastupstvaŭ, jakija mahli b zaachvocić Kreml ścišyć svaje ambicyi va Ukrainie», — ličać analityki RUSI.
Kamientary