Pahutaryli ź vizavaj ekśpiertkaj i redaktarkaj visaflow.live Anastasijaj Łysakoŭskaj pra asnoŭnyja pamyłki, jakija dapuskajuć biełarusy pry padačy na vizu i pry padarožžy ź joj.
Pamyłka №1. Atrymać polskuju pracoŭnuju vizu, kab padarožničać
U apošnija hady samaj lehkadastupnaj dla biełarusaŭ ličyłasia polskaja pracoŭnaja viza. Fejkavyja zaprašeńni na pracu kaštavali niašmat, a sama viza rabiłasia davoli chutka i, jak praviła, adrazu na hod. Mnohija rabili jaje nie tamu, što źbiralisia pracavać u Polščy, a praz toje, što heta było adnosna prosta.
Kali vy vykarystoŭvali vizu nie dla toj mety, dla jakoj prasili, to nastupny raz vam u takoj vizie mohuć admović. Choć aŭtamatam heta nie značyć, što pracoŭnuju vizu vam bolš nikoli nie adkryjuć.
Tym, chto padajecca paśla niametavaha vykarystańnia vizy, śpiecyjalist raić padrychtavać dobry pakiet dakumientaŭ i prykłaści da jaho chadajnictva na imia konsuła z tłumačeńniem pryčyn, čamu papiaredniaja viza nie była vykarystanaja pa pryznačeńni. Heta moža pavialičyć šancy na pośpiech.
Pa słovach Anastasii Łysakoŭskaj, paśla taho, jak Polšča pastrožyła kantrol za vykarystańniem pracoŭnych viz i viz Poland.Business Harbour, popyt na adkryćcio pracoŭnaj vizy prykmietna źmienšyŭsia.
«Byvajuć vypadki, kali ludzi adkryvajuć pracoŭnuju vizu na padstavie nabytaha za hrošy zaprašeńnia ad firmy, dzie pracavać nie płanujuć. Ale ŭ vyniku jany ŭsio adno jeduć u Polšču i tam pracaŭładkoŭvajucca, choć i ŭ inšym miescy. Taki varyjant adkryćcia vizy razhladać možna, a voś adkryvać pracoŭnuju vizu, kab pa joj padarožničać — dakładna nie varta», — kaža ekśpiertka.
Pa słovach Anastasii Łysakoŭskaj, popyt na pracoŭnyja polskija vizy z boku biełarusaŭ źniziŭsia jašče i praz toje, što palaki na samoj miažy mocna pastrožyli kantrol za vykarystańniem viz. Tamu sustrakajucca vypadki anulavańniaŭ.
Pamyłka №2. Admianić broń hatela
Ale padlahajuć anulavańniu nie tolki polskija pracoŭnyja vizy.
«Kali my majem spravu z šenhienskaj vizaj, najbolš častaja pryčyna anulavańnia vizy — admiena braniravańnia hatela, jakoje było pakazana na padačy. Asabliva časta heta nazirajecca ŭ Bałharyi i Vienhryi, radziej u Hrecyi».
Taksama vy ryzykujecie atrymać anulavańnie šenhienskaj vizy, kali było vyjaŭlena parušeńnie vizavych praviłaŭ — naprykład, pieravyšeńnie terminu znachodžańnia.
Pamyłka №3. Niaŭvažliva pračytać patrabavańni
Jašče adna pamyłka — niedakładnaje vyvučeńnie patrabavańniaŭ.
«Šenhienskija vizy praktyčna ŭsich krain majuć padobny pakiet dakumientaŭ, ale niekatoryja patrabavańni mohuć adroźnivacca.
Naprykład, Ispanija patrabuje vypisku z rachunku za apošnija try miesiacy. Rešta musić składać nie mienš za 113 jeŭra na čałavieka na dzień znachodžańnia (minimum 1020 jeŭra). Ale z takim minimumam na karcie vy chutčej za ŭsio atrymajecie admovu, tamu lepiej, kab u vypiscy było bolš za 1500 jeŭra na čałavieka.
Hiermanija, naprykład patrabuje pierakład usich dakumientaŭ na anhlijskuju ci niamieckuju movu, ale vypisku z rachunku pierakładać nie treba.
Taksama davoli časta nie prymajuć dakumienty pry padačy siemjami ź dziećmi, pakolki krainy majuć roznyja patrabavańni nataryjalnaha dazvołu na vyjezd dziciaci. Adnyja krainy patrabujuć hety dakumient z dazvołam abaich baćkoŭ, a niekatoryja krainy nie prosiać naohuł, tamu treba ŭvažliva vyvučać pytańnie».
Pamyłka №4. Adkryvać vizu ŭ Hrecyju praź Ispaniju
Śpiecyjalistka raić adkazna vybirać krainu padačy, kab nie atrymałasia tak, što čałaviek z hrečaskaj vizaj jechaŭ na aŭto ŭ Ispaniju, jakaja znachodzicca ŭ zusim inšym kirunku.
«Hiermanija ŭviała naziemny kantrol, i kali čałaviek trapić ź vizaj Hrecyi na taki kantrol, to buduć pytańni nakont metavaha vykarystańnia vizy», — tłumačyć Łysakoŭskaja.
Ahułam, što tyčycca Hrecyi, to vizu ŭ hetuju krainu lepiej adkryvać u siezon z maja pa kastryčnik, pakolki zimoj isnuje vialikaja vierahodnaść atrymać admovu.
Pamyłka №5. Čakać, što pieršy raz daduć multyvizu
Siarod inšych pamyłak ahientka nazyvaje padaču zapytu na multyvizu, kali ŭ čałavieka adsutničaje vizavaja historyja.
«Mnohija dahetul nie razumiejuć usiu składanaść situacyi. Kali da hetaha nie było dobraj vizavaj historyi, raźličvać na doŭhaterminovuju vizu nie varta. Jość para krain, takich jak Italija, Hiermanija i Francyja, jakija mohuć pastavić dobruju vizu ŭ pusty pašpart (ad 3—6 miesiacaŭ), ale heta vialikaja redkaść», — kaža śpiecyjalistka.
Padsumoŭvajučy, ekśpiertka adznačaje, što na pačatak 2025 hoda atrymać vizu biełarusam navat składaniej, čym było ŭ 2022-2023-m.
«Stała mienš mahčymaściej zapisacca, Italija i Francyja raniej lepiej pracavali. Konsulstvy zvaročvalisia pastupova, tamu ŭ 2022—2023 hadach było bolš varyjantaŭ, čym ciapier. Šlachoŭ atrymańnia viz stanovicca mienš, tamu terminy atrymańnia viz pavialičylisia», — kaža Anastasija Łysakoŭskaja.
Kamientary