Łukašenka nie pajedzie ŭ Vilniu

Alaksandr Łukašenka nie prymie ŭdziełu va ŭračystaściach z nahody 20‑j hadaviny adnaŭleńnia niezaležnaści Litvy, jakija adbuducca 11 sakavika ŭ Vilni. Aficyjnuju biełaruskuju delehacyju ŭznačalić namieśnik premjer‑ministra Viktar Bura.

Pra heta rašeńnie Alaksandr Łukašenka prainfarmavaŭ litoŭskaha prezidenta Dalu Hrybaŭskajcie, paviedamlaje pres‑słužby kiraŭnika biełaruskaj dziaržavy.

Zaprašeńnie Łukašenki pryniać udzieł va ŭračystaściach było nakiravana ad imia kancylaryi prezidenta Litvy.

U adkaz pasłańni Łukašenki «ščyra padziakavaŭ» litoŭskuju kalehu za zaprašeńnie i adznačyŭ vysoki patencyjał dalejšaha raźvićcia palityčnych, ekanamičnych i kulturnych suviaziaŭ u intaresach biełaruskaha i litoŭskaha narodaŭ, paviedamlaje pres‑słužba kiraŭnika dziaržavy.

«Padkreśliŭšy važnaść umacavańnia dyjałohu na vyšejšym dziaržaŭnym uzroŭni, prezident Biełarusi paćvierdziŭ zaprašeńnie kiraŭniku litoŭskaj dziaržavy naviedać Respubliku Biełaruś ź vizitam», — havorycca ŭ paviedamleńni.

***

Apošnim razam Alaksandr Łukašenka naviedvaŭ Litvu 16 vieraśnia 2009 hoda, jon braŭ udzieł u pracy biełaruska‑litoŭskaha ekanamičnaha forumu ŭ Vilni.

Tady ž adbyłasia sustreča prezidentaŭ Biełarusi i Litvy, jakaja doŭžyłasia pryblizna dźvie hadziny. Raniej Hrybaŭskajcie zajaŭlała, što zaprašeńnie Łukašenki na śviatkavańnie 20‑hodździa adnaŭleńnia dziaržaŭnaści Litvy moža zaležać ad dziejańniaŭ Minska ŭ dačynieńni da byłoha načalnika Vilniuskaha harnizona Uładzimira Uschopčyka. «Zaraz my viadziem pieramovy ź Biełaruśsiu, sprabujem pačuć, jakimi buduć zachady ŭ supracoŭnictvie, što tyčacca spravy Uschopčyka», — skazała 26 studzienia Hrybaŭskajcie, adkazvajučy na pytańnie žurnalistaŭ adnosna jaje rašeńnia ab zaprašeńni Łukašenki.

Litoŭskija pravaachoŭnyja orhany padazrajuć Uschopčyka ŭ tym, što 13 studzienia 1991 hoda jon daŭ zahad stralać pa biezabaronnym ludziam. MZS Litvy ŭručyła Biełarusi notu ŭ suviazi z tym, što biełaruskaja Hienieralnaja prakuratura admoviłasia dapamahčy susiedniaj krainie ŭ rasśledavańni spravy Uschopčyka.

2 sakavika stała viadoma, što Uschopčyk, jaki z 22 maja 2000 hoda pa 19 lutaha 2004 hoda źjaŭlaŭsia namieśnikam ministra abarony Biełarusi, byŭ dapytany ŭ Hienprakuratury ŭ jakaści śviedki pavodle prośby litoŭskich pravaachoŭnych orhanaŭ. Materyjały dopytu nakiravany ŭ Vilniu.

• 0
• 0
• 0
• 0
• 0
• 0
• 0
• 0