Na mahilnym pomniku Makieja vybili častku šyfru kalinoŭcaŭ FOTA
Mahilny pomnik Uładzimira Makieja, rendar jakoha atrymała «Naša Niva», taki ž supiarečlivy, jak i postać pachavanaha pad im ministra. Strohi profil, uvabity ŭ abrysy radzimy, častka šyfru antyrasijskich paŭstaŭncaŭ jak pryžyćciovaje kreda i paśmiarotny zapaviet. I tut ža: adsyłka da sprečnaj teoryi, a zamiest Uładzimira pa-rusku — «Vładimir».
Amal praz dva hady paśla samahubstva najbližejšaha paplečnika Łukašenki, Uładzimira Makieja, na jahonaj mahile na Uschodnich mohiłkach źjaviŭsia pomnik.
Na płoski i nizki pastamient z šeraha hranitu pastaŭlena abjomnaja paŭśfiera, u razrezie jakoj — hłyboka vyhraviravanaja Biełaruś i profil Makieja pavierch. Nižej vybita fraza «Lublu Biełaruś», jakaja, choć tryvijalnaja i apalityčnaja pa formie, źjaŭlajecca častkaj znakamitaha moŭnaha šyfru antyrasijskich paŭstancaŭ 1863-ha.
«Kaho lubiš? — Lublu Biełaruś. — To ŭzajemna», — jak ličycca, pa hetaj paśladoŭnaści pryznańniaŭ kalinoŭcy adroźnivali svaich i ad rasijskich akupantaŭ, i ad prosta abyjakavych.
Pry žyćci Makiej, byvała, vykarystoŭvaŭ hetyja słovy dla zaviaršeńnia svaich vystupleńniaŭ.
Čamu paŭśfiera jak asnova kampazicyi? Źviarnuŭšysia da vusnaj spadčyny Makieja, možna pasprabavać patłumačyć vybar hieamietryčnaj formy adsyłkaj da hieapalityčnaj kancepcyi «Serca ziamli» Chełfarda Makkindera. Makiej vieryŭ u hetuju sastarełuju ideju i słužyŭ joj. Jana papularna siarod tych, chto vałodaje ŭładaj abo ŭpłyvaje na jaje ŭ Biełarusi i Rasii.
Ideja abhruntoŭvaje «viečnaje» supraćstajańnie Rasii i jaje suchaputnych sajuźnikaŭ z marskimi krainami Zachadu: maŭlaŭ, ichniaj mocy niekali nie chapiła dla kałanizacyi hłybokich terytoryj udalečyni ad vady, što abumoviła źjaŭleńnie niełajalnaha i alternatyŭnaha centru siły.
U toj ža čas pałova šara — jak pałova žyćcia.
Patryjot by jašče ŭbačyŭ simvalizm u sposabie vyjaŭleńnia Biełarusi.
Jaje abrysy nie naniesienyja źvierchu, jak niešta časovaje, jak profil samoha Makieja, a pakazanyja viečnym — vybitym hłyboka ŭ «Sercy ziamli» konturam, prybrać jaki možna tolki zrezaŭšy słai z usiaho šaryka.
Praŭda što nadmahilnaje imia dziaržaŭnaha dziejača napisana na movie, jakoj drenna vałodali žychary vioski Niekraševičy Karelickaha rajona — małoj radzimy Uładzimira Makieja. Jon zapisany «Vładimirom».
***
Uładzimir Makiej skončyŭ samahubstvam 26 listapada 2022 hoda.
Apošnija hady žyćcia ministra prajšli ŭ atmaśfiery maralnych, prafiesijnych i siamiejnych dramaŭ. Jon baluča pieražyvaŭ krušeńnie taho kursu, jaki pravodziŭ. Časta adčuvaŭ siabie niepatrebnym, a miescami i prosta niedarečnym.
Čytajcie taksama: Imaviernaja pryčyna śmierci Uładzimira Makieja — suicyd
Pačać pracavać na toj vobraz budučyni, u jakoj by znajšłosia miesca pa-sapraŭdnamu niezaležnaj Biełarusi, Makiej nie zmoh. Prosta plunuć i adyści ad spravaŭ taksama nie zmoh. Jahony pastupovy adychod ad ułady pieraros u adychod z žyćcia.
Svoj maralny vybar jon abhruntavaŭ cytataj savieckaha raźviedčyka Alaksandra Białova (Johana Vajsa), što lepš być pakaranym śmierciu za viernaść, čym za zdradu.
Vaskrasienski: Adkryvajecca nieba — i Aleś Bialacki adrazu vychodzić31
Kamientary