Usplosk raku toŭstaj kiški źviazany sa snekami i kaŭbasami — vučonyja

Jak piša CNN, novaje daśledavańnie amierykanskich vučonych z Univiersiteta Paŭdniovaj Fłarydy pakazała, što pierapracavanyja alei mohuć spryjać rostu zachvorvańniaŭ rakam toŭstaj kiški.

Jak tłumačać aŭtary, u straŭnikava-kišačnym trakcie štodnia ŭźnikajuć mutacyi, jakija zvyčajna padaŭlajucca imunnaj sistemaj z dapamohaj miedyjataraŭ, źviazanych z amieha-3 tłustymi kisłotami. Adnak kali ŭ arhaniźmie na praciahu doŭhaha času nazirajecca dysbałans pamiž amieha-3 i amieha-6 na karyść apošnich, to heta ŭskładniaje baraćbu z mutacyjami i sadziejničaje ich zamacavańniu.

Amieha-6 tłustyja kisłoty pastupajuć u naš arhanizm zvyčajna z ultrapierapracavanych praduktaŭ (piečyva, cukierki, sneki, tłustyja sousy, kiłbasy) i fast-fudu, u pryhatavańni jakich vykarystoŭvajuć raślinny alej.

Najbolš bahatyja na linolevuju kisłatu (tak jašče nazyvajuć amieha-6) kukuruzny, arachisavy, sojevy i słaniečnikavy alei. U paraŭnańni ź imi rapsavy alej vyhladaje bolš biaśpiečnym, bo maje bolš zbałansavanyja suadnosiny amieha-3 i amieha-6.

Vučonyja adznačajuć, što amieha-6 tłustyja kisłoty nieabchodnyja dla padtrymańnia dobraha zdaroŭja arhanizmu. Jany stymulujuć rost vałasoŭ i skury, rehulujuć abmien rečyvaŭ, umacoŭvajuć kostki, a ŭ niekatorych vypadkach mohuć być supraćzapalenčymi.

Adnak linolevaja kisłata taksama moža pieratvarycca ŭ malekuły, takija jak prostahłandziny, jakija sihnalizujuć ab uźniknieńni zapaleńnie. Heta nie źjaŭlajecca prablemaj, kali arhanizm sprabuje chutka zmahacca ź infiekcyjaj, ale moža być razburalnym, kali zapaleńnie praciahvajecca doŭhi čas.

U svaim daśledavańni, vyniki jakoha apublikavanyja ŭ časopisie Gut, vučonyja skancentravalisia na vyśviatleńni taho, jak amieha-6 i amieha-3 tłustyja kisłoty pavodziać siabie ŭ tkancy puchliny i narmalnaj tkancy toŭstaj kiški. Dla hetaha jany vykarystoŭvali rakavyja tkanki toŭstaj kiški, uziatyja ŭ 80 pacyjentaŭ, i paraŭnali ich z narmalnymi tkankami hetaha ž orhana, uziatyja ŭ tych ža pacyjentaŭ.

Pry analizie vučonyja vyjavili, što ŭ narmalnych tkankach zachoŭvaŭsia bałans abiedźviuch kisłot, što nielha skazać pra chvoryja. U rakavaj tkancy naziraŭsia značny dysbałans na karyść amieha-6 tłustych kisłot, jakija pieraškadžali amieha-3 zmahacca z zapaleńniem.

Jak pišuć aŭtary, kali ŭ arhaniźmie nie chapaje amieha-3, kab kantralavać zapaleńnie, vyklikanaje reakcyjaj na rak, jano praciahvaje razburać kletki, nanosiačy dadatkovuju škodu ich DNK i stvarajučy spryjalnyja ŭmovy dla rostu rakavych kletak.

Vučonyja adznačajuć, što prablema zaklučajecca nie stolki ŭ amieha-6, kolki ŭ adsutnaści ŭ našym racyjonie dastatkovaj kolkaści amieha-3 tłustych kisłot. Tamu jany rekamiendujuć bolš spažyvać pradukty, bahatyja imi. Siarod ich skumbryja, sieladziec, sardziny, tuniec, łasoś i stronha. Druhoj krynicaj amieha-3 źjaŭlajucca arechi i nasieńnie.

A voś prymajučy bijadabaŭki z amieha-3 treba pamiatać, što ŭ zdarovych ludziej jany patencyjna mohuć pavialičyć, a nie źnizić ryzyku chvarob serca i insultu.

• 6
• 0
• 0
• 0
• 3
• 2
• 0
• 1