USU vyvieli vajskoŭcaŭ z poŭdnia Hłuškoŭskaha rajona Kurskaj vobłaści
Ukrainskija vajskoŭcy pakinuli terytoryju ŭ rajonie vioski Viasiołaje na poŭdni Hłuškoŭskaha rajona Kurskaj vobłaści. Prarasijskija vajennyja błohi pačali paviedamlać pra heta jašče ŭ listapadzie, a ŭ noč na aŭtorak infarmacyju paćvierdziŭ ukrainski OSINT-prajekt DeepState, zaŭvažyła «Ahientstvo».
Pavodle DeepState, šeraja zona ŭ rajonie Viasiołaha płoščaj bolš za 20 kv. km bolš nie isnuje.
Hety vystup sfarmavaŭsia ŭ siaredzinie vieraśnia, jaho płošča praktyčna adrazu pavialičyłasia da 40 kv. km. U pačatku kastryčnika hety ŭčastak vyras da 50 kv. km, adnak zatym terytoryja pad kantrolem USU tut tolki skaračałasia: 10 kastryčnika — da 36 kv. km, u kancy kastryčnika — da 21 kv. km.
Viartańnie rajona pad kantrol Rasii ŭskosna paćviardžaje videa z razburanaha siała ŭ paniadziełak uviečary ŭ telehram-kanałach Hłuškoŭskaha rajona. Aŭtar videa za kadram kaža: «Hulnia Stalker, tolki ŭsio ŭžyvuju».
Prarasijskija vajskovyja błohi pra vyvad ukrainskich vojskaŭ z terytoryi vystupu ŭ Hłuškoŭskim rajonie pisali z pačatku listapada. «Rybar» 5 listapada paviedamiŭ ab adnaŭleńni kantrolu la linii rasijskaj miažy na poŭdzień ad vioski Novy šlach. Pra heta, pavodle źviestak kanała, śviedčyła videa miniravańnia razryvu pamiž «zubami drakona» na miažy.
Vajskovy analityk Jan Maćviejeŭ skazaŭ «Ahientstvu», što USU spynili sproby prarvacca ŭ hetym rajonie. Z adnaho boku heta pieraškodzili zrabić surjoznyja straty, z druhoha — heta stała biessensoŭnym paśla kontrnastupleńnia Rasii ŭ Kurskaj vobłaści. Pa słovach Maćviejeva, Rasii ŭdałosia likvidavać pastku pamiž rakoj i miažoj, u jakuju trapiła častka Hłuškoŭskaha rajona ŭ žniŭni, i ciapier źjaviłasia mahčymaść zabiaśpiečvać Hłuškova prama z Koranieva.
Niekalki dziasiatkaŭ kvadratnych kiłamietraŭ u dvuch miescach miažy ŭ Hłuškoŭskim rajonie (na zachadzie i na poŭdni) USU zaniali paśla taho, jak u žniŭni zajšli ŭ Sudžanski i Koranieŭski rajony Kurskaj vobłaści. Hetamu papiaredničała źniščeńnie ŭsich mastoŭ i niekalkich chutka zbudavanych paśla hetaha pantonnych pierapraŭ praz raku Siejm, što faktyčna adrezała častku Hłuškoŭskaha rajona płoščaj 700 kv. km ad astatniaj terytoryi Kurskaj vobłaści.
Vajennyja analityki vykazali zdahadku, što Ukraina takim čynam sprabuje paŭtaryć manieŭr, jaki dazvoliŭ joj viarnuć Chierson u 2022 hodzie.
Šeraja zona na poŭdni Hłuškoŭskaha rajona praisnavała 2,5 miesiaca. Na zachadzie rajona jana pakul zachoŭvajecca.
Kamientary