Krainy Bałtyi i Skandynavii vystupili za pavieličeńnie dapamohi Ukrainie ŭ adkaz na ahresiju RF
U Šviecyi 27 listapada pačaŭsia samit kiraŭnikoŭ uradaŭ krain Bałtyi, Skandynavii i Polščy. Kiraŭniki Danii, Estonii, Finlandyi, Łatvii, Narviehii, Polščy i Šviecyi abmierkavali klučavyja pytańni biaśpieki ŭ kantekście rostu pahroz Jeŭraatłantyčnamu rehijonu.
U sumiesnaj zajavie, apublikavanaj na sajcie ŭrada Šviecyi, udzielniki sustrečy zajavili pra nieabchodnaść kansalidavać namahańni dla padtrymki Ukrainy i ŭzmacnieńnia cisku na Rasiju.
Kiraŭniki ŭradaŭ adnahałosna zajavili pra važnaść pavieličeńnia vajennaj dapamohi Ukrainie. Jany padkreślili, što ich krainy źjaŭlajucca lidarami pa abjomie vajennaj padtrymki na dušu nasielnictva i majuć namier praciahvać hetuju pracu. U bližejšyja miesiacy płanujecca pavialičyć abjom dapamohi, u pryvatnaści, padtrymku ŭkrainskaha VPK i pastaŭki bojeprypasaŭ.
Lidary krain padkreślili, što stojkaść i mužnaść Ukrainy ŭ supraćstajańni rasijskaj ahresii pavinny padmacoŭvacca nadziejnaj mižnarodnaj padtrymkaj. Taksama prahučaŭ zaklik da inšych krain dałučycca da hetych namahańniaŭ.
Udzielniki samitu padtrymali «Płan pieramohi Ukrainy», nakiravany na dasiahnieńnie ŭsioabdymnaha, spraviadlivaha i tryvałaha miru, a taksama poŭnuju intehracyju Ukrainy ŭ jeŭrapiejskija i jeŭraatłantyčnyja struktury.
Lidary krain Bałtyi i Skandynavii pryznali Rasiju samaj vialikaj pahrozaj rehijanalnaj i hłabalnaj biaśpiecy. Jany damovilisia praciahvać pracu pa strymlivańni i supraćdziejańni rasijskaj ahresii, uzmacnieńni sankcyj u dačynieńni da Rasii i tych, chto padtrymlivaje jaje ahresiju. Akramia taho, jany paćvierdzili namiery ŭmacoŭvać abaranazdolnaść svaich krain i ahulnuju biaśpieku jeŭraatłantyčnaha rehijonu.
Na hetuju zajavu adreahavaŭ kiraŭnik Administracyi prezidenta Andrej Jarmak. Jon padziakavaŭ krainam Bałtyi, Paŭnočnaj Jeŭropy i Polščy.
«My ščyra ŭdziačnyja ŭsim našym partnioram za niaźmiennuju padtrymku. Krainy Paŭnočnaj Jeŭropy i Bałtyi i Polšča, jak sapraŭdnyja siabry, niepachisna stajać na baku Ukrainy ź pieršych dzion rasijskaha ŭvarvańnia», — napisaŭ Jarmak.
Kamientary
Tyja sa zhadanych krainaŭ chto sapraŭdy zacikaŭleny ŭ biaśpiecy - haładrancy, a ty chto maje resursy i technałohii - jany daloka ad Rasiei, i nie adčuvajuć sapraŭdnaj pahrozy, nie razumiejuć usiaho kantiekstu trahiedyi, a tamu matyvacyi vykładacca na niejkuju dalokuju ad ich krainu niama. Karaciej, nia vieru, i liču heta prosta pustymi zajavami.