U vieraśni pavodle kryminalnych palityčnych spraŭ asudzili nie mienš za 170 čałaviek

Raźbiŭka pa rehijonach u vieraśni vyhladała nastupnym čynam:

• Minsk — 61 čałaviek;
• Bresckaja vobłaść — 44 čałavieki;
• Homielskaja vobłaść — 20 čałaviek;
• Minskaja vobłaść — 25 čałaviek;
• Mahiloŭskaja vobłaść — vosiem čałaviek;
• Viciebskaja vobłaść — dzieviać čałaviek;
• Hrodzienskaja vobłaść — try čałavieki.

Pieraśled siemjaŭ

U vieraśni praciahvałasia praktyka pieraśledu cełych siemjaŭ abo hrup svajakoŭ pavodle «narodnaha» 342 artykuła Kryminalnaha kodeksa. U Dziaržynsku ŭ miežach sudovaha razboru słuchalisia spravy ŭ dačynieńni da Iryny i Andreja Šajkoŭskich, a taksama Alaksandra i Taćciany Hryškievičaŭ. U sudzie Maskoŭskaha rajona Minska słuchałasia sprava Alaksieja i Ludmiły Paŭłovič. U sudzie Leninskaha rajona Bresta byli asudžanyja muž i žonka da dvuch i adnaho hoda pazbaŭleńnia voli adpaviedna — Hienadź i Hanna Vasiluk. Sud Leninskaha rajona Mahilova asudziŭ da dvuch hadoŭ abmiežavańnia voli biez nakiravańnia ŭ papraŭčuju ŭstanovu Lva Iŭčyna, baćku jakoha, Valeryja Iŭčyna, tryma miesiacami raniej hety ž sud asudziŭ da dvuch z pałovaj hadoŭ abmiežavańnia voli z nakiravańniem u PUAT.

U vieraśni 12 čałaviek asudzili paŭtorna

U vieraśni praciahvałasia tendencyja paŭtornaha i nastupnaha asudžeńnia hramadzian, raniej represavanych pavodle palityčnych matyvaŭ. Viciebski abłasny sud asudziŭ pa sukupnaści z papiarednim prysudam lidarku niezaležnaha prafsajuza «Naftana» Volhu Brycikavu da šaści hadoŭ pazbaŭleńnia voli pavodle artykułaŭ ab «zaklikach da sankcyj», «raspalvańni varožaści» i «sadziejničańni ekstremisckaj dziejnaści». Raniej hetym ža sudom jana była asudžanaja da troch hadoŭ pazbaŭleńnia voli pavodle artykuła ab raspalvańni varožaści.

Sud Leninskaha rajona Bresta asudziŭ pavodle 342 artykuła KK Hienadzia Vasiluka sumarna da dvuch hadoŭ pazbaŭleńnia voli. U lutym hetaha hoda mužčyna byŭ asudžany sudom Maskoŭskaha rajona Bresta pavodle artykuła ab «paklopie na adras Łukašenki». Homielski abłasny sud razhladaŭ spravu ŭ dačynieńni da Leanida Kozyra pavodle artykułaŭ ab «finansavańni dziejnaści ekstremisckaha farmavańnia» i «ŭdziele na terytoryi zamiežnaj dziaržavy va ŭzbrojenym farmavańni». Dva hady tamu mužčyna asudžaŭsia sudom Centralnaha rajona Minska pavodle artykuła ab abrazie pradstaŭnika ŭłady.

Sud Pieršamajskaha rajona Minska asudziŭ da adnaho hoda i troch miesiacaŭ pazbaŭleńnia voli Źmitra Daškieviča pavodle artykułaŭ ab udziele ŭ hrupavych dziejańniach, jakija hruba parušajuć hramadski paradak i niepadparadkavańni patrabavańniam administracyi papraŭčaj ustanovy. Za dva hady abaronca Kurapataŭ zaznaŭ niekalki kryminalnych spraŭ pavodle kožnaha z hetych artykułaŭ u sudzie Maskoŭskaha i Pieršamajskaha rajonaŭ Minska, a taksama ŭ sudzie Barysaŭskaha rajona.

Suprać asudžanaha ŭ červieni hetaha hoda sudom Kiraŭskaha rajona Juryja Avierkava pavodle artykuła ab abrazie pradstaŭnika ŭłady paŭtorna ŭžyli pieraśled u Mahiloŭskim abłasnym sudzie pavodle artykułaŭ ab «raspalvańni varožaści» i «masavych biesparadkach».

Tolki za vierasień zafiksavanyja vosiem vypadkaŭ pieraśledu raniej represavanych hramadzian pavodle 411 artykuła, jaki praduhledžvaje mahčymaść dadańnia terminu turemnaha źniavoleńnia za «niepadparadkavańnie patrabavańniam administracyi papraŭčaj ustanovy». Akramia Źmitra Daškieviča, jakoha sudzili pavodle hetaha artykuła, taksama sudzili:

• Aleha Jafremienku i Apanasa Afanasienkava — u sudzie Barysaŭskaha rajona;
• Uładzimira Cyhanoviča — u sudzie Mazyrskaha rajona;
• Ramana Marusava — u sudzie Leninskaha rajona Mahilova;
• Andreja Budaja — u sudzie Babrujskaha rajona i h. Babrujska;
• Siarhieja Ramanava asudzili da dvuch hadoŭ pazbaŭleńnia voli sudom Horackaha rajona;
• Tamaz Pipija asudžany sudom Navapołacka na paŭtara hoda pazbaŭleńnia voli.

U 46% u abvinavačvańni mieŭsia artykuł 342 KK

Asnoŭnuju dolu ŭ struktury kryminalnaha pieraśledu pavodle palityčnych matyvaŭ składajuć kryminalnyja spravy pavodle 342 artykuła KK. 46% ludziej, suprać jakich byli ŭžytyja represii ŭ vieraśni, mieli ŭ abvinavačvańni hety artykuł.

Pry hetym praktyka vykarystańnia hetaha artykuła maje rehijanalnuju śpiecyfiku — u Bresckaj vobłaści pavodle artykuła za ŭdzieł u stychijnych mirnych schodach u žniŭni i vieraśni 2020 hoda ŭ Breście, Bresckim rajonie i Biarozie sudziać pieravažna hrupy ludziej, staviačy im adny i tyja ž epizody. Pry hetym užo ŭ Pinsku praktyka pajšła ŭ bok pieraśledu hramadzian pa adnym čałavieku — tolki za vierasień u hetym horadzie byli asudžanyja siamiora čałaviek.

• 0
• 0
• 0
• 0
• 0
• 0
• 3
• 0