«Ja pryjechała ŭ 4:50 i była ŭ čarzie 77-ja». Jak ryełtarka nabyvała dla siabroŭki kvateru ŭ elitnym ŽK Minska

Pra kvest z nabyćciom nieruchomaści ŭ Minsku raskazała ŭ tyktoku błohierka pad nikam @realtoranainara. Heta ryełtarka, jakaja pierajechała z Ryhi ŭ Minsk. U biełaruskaj stalicy žančyna taksama pracuje pa śpiecyjalnaści.

Jana raskazała ŭ roliku, što kvateru ŭ ŽK «Paŭnočny bierah» jaje paprasiła pa davieranaści nabyć siabroŭka, jakaja žyvie ŭ Hiermanii.

— Ja pryjechała da ofisa prodažaŭ u 4:50, a tut užo čarha. Ja ŭ čarzie 77-ja. Ujaŭlajecie? Ofis adčynicca a 9-j ranicy. Mabyć, da hetaha momantu kvatery skončacca. Niekatoryja ŭžo śpiać u mašynach — zapisalisia i adpačyvajuć. Voś tak u Minsku kvatery pradajuć — treba za troje sutak stać u čarhu i, moža być, atrymajecca kupić.

@realtoranainara

19.09.2024. kviest "kupiť kvartiru v Sieviernom bieriehie, Minsk.

♬ original sound - anainara

U nastupnym videa žančyna raspaviała, što jana vyjšła z ofisa prodažaŭ u 12:47. U jaje atrymałasia zareziervavać dla siabroŭki dvuchpakajovuju kvateru płoščaj 50 kvadrataŭ. Adzin mietr kaštavaŭ prykładna 1470 jeŭra.

— Tyja, chto kaža, što ŭ Minsku ŭ asnoŭnym kuplajuć kvatery zamiežniki, — nie, niapraŭda. I navat nie pierakupščyki. Była vialikaja čarha, ledź da bojki nie dajšło.

Ryełtarka dzielicca, jak arhanizavana čarha. Byli inicyjatyŭnyja ludzi, jakija z paniadziełka dziažuryli pad ofisam prodažaŭ i skłali niejkija svaje śpisy. Start prodažaŭ byŭ u čaćvier, 19 vieraśnia — u hety dzień i pryjechała ryełtarka. Zrazumieła, što nie ŭsie ludzi try dni nie adychodzili ad ofisa.

— Tyja, chto pryjšoŭ zranku, i pačuŭ: «Vy vaśmidziasiatyja ŭ čarzie», — skazali: «Idzicie vy… sa svaimi čerhami. Voś ja pryjšoŭ, baču pierad saboj dziesiać čałaviek i stanaŭlusia adzinaccatym, astatniaje mianie nie chvaluje». Hałoŭnaje — trapić va ŭnutr. Zapuskajuć pa 10 čałaviek u ofis.

Žančyna skazała, što ŭžo ŭnutry supracoŭniki ofisa prodažaŭ składajuć svaje śpisy, a śpisy entuzijastaŭ na vulicy jana nazvała samadziejnaściu.

— Usim, kaho heta cikavić: na budučyniu nie ŭličvajcie ŭsie hetyja samadziejnyja śpisy. Pažadana mieć kantakt ź niejkim kankretnym mieniedžaram. Tamu što jak my tut pahladzieli, ludziej, u jakich nie było zapisu da kankretnaha mieniedžara i čyj kantakt nie byŭ zarehistravany va ŭnutranaj sistemie «Paŭnočnaha bieraha», absłuhoŭvali ŭ apošniuju čarhu. Umoŭna, 100 čałaviek zajšło, usie zarehistravalisia pa svaim imieni i kantaktnym numary. Mieniedžar hladzić, što z hetaha śpisu 10 čałaviek — jahonyja klijenty, i zabiraje ich da siabie.

@realtoranainara

19.09.2024.

♬ original sound - anainara

Atrymałasia, što tyja, chto nie kantaktavaŭ raniej ź mieniedžarami, akazalisia ŭ čarzie apošnimi — navat kali pad ofisam stajali z paniadziełka. Šmat ludziej zastalisia niezadavolenymi takoj sistemaj.

— Najbolšaj papularnaściu karystajucca kvatery nievialikaj płoščy — tak zvanyja jeŭrastudyi ci jeŭradvuški. Na ich byŭ samy vialiki ažyjataž. Šmat ludziej pajšło rasčaravanymi, bo kali ŭ minułym domie takija kvatery kaštavali 50-60 tysiač jeŭra, to ciapier kala 75 tysiač jeŭra plus-minus niekalki tysiač (u zaležnaści ad paviercha).

Ryełtarka raić tym, chto ŭ budučyni płanuje nabyvać nievialikuju kvateru (bo vialikija, chutčej za ŭsio, možna nabyć amal u luby momant), być maralna hatovymi fizična adstojvać svaju čarhu.

— Nam da bojki sapraŭdy nie chapiła krychu. Ludzi śmiajalisia, što voś my zaraz pabjomsia, a potym budziem susiedziami, budziem zhadvać, jak my zmahalisia za kvatery. Usio skončyłasia pazityŭna.

• 1
• 6
• 6
• 17
• 2
• 0
• 1
• 0