180 rubloŭ za kiłahram, a smak jak u jełki: zdajecca, znajšlisia samyja darahija cukierki ŭ Minsku
Dziaŭčyna šukała ŭ biełaruskaj stalicy dubajski šakaład, jaki niadaŭna staŭ ledź nie hałoŭnym prysmakam błohieraŭ, a znajšła cukierki pa šalonym košcie. Ažno 180 rubloŭ za kiłahram! Jak dumajecie, smačnyja?
Dubajski šakaład narabiŭ šumu ŭ sacyjalnych sietkach — asabliva paśla taho, jak toj pakazaŭ «Mierzkij Kokobaj». Tamu šmat chto z błohieraŭ kinuŭsia šukać dzivosny prysmak.
Kali vy nie viedajecie, što ž heta za dubajski šakaład taki, rastłumačym. Tak nazyvajuć šakaładki, u jakich toŭsty płast šakaładu, a ŭ siaredzinie chrumstkaja načynka ź ciesta kataifi i fistaškavaj pasty. Šmat chto žartavaŭ, što źniešnie heta nahadvaje lapiošku karovy. Ale na smak, kažuć, vielmi pryjemna.
Čamuści hety tavar ličycca deficytam u Biełarusi. Tamu błohiery prydumlajuć alternatyvu: niechta ŭžo pačaŭ zdymać videarecepty, jak zrabić toj samy dubajski šakaład samastojna doma, a niechta praciahvaje biehać pa kramach, šukajučy alternatyvu.
I voś u kramie Plein de Grace, što znachodzicca ŭ handlovym centry «Mietrapol», adna z tyktok-błohierak znajšła cukierki, jakija, jak joj skazali, pa smaku vielmi padobny da taho dubajskaha šakaładu. Vierahodna, zapivać ich treba valarjankaj, bo ad adnaho pohladu na ceńnik serca pačynaje nyć — 180 rubloŭ.
Dziaŭčyna, jakuju zavuć Maryjaj, na videa ščyra kaža, što nie viedała pra isnavańnie cukierak, jakija stolki kaštujuć. Za adnu cukierku treba było zapłacić kala čatyroch rubloŭ.
Bieły šakaład błohiercy spadabaŭsia, a voś načynka pa smaku nahadvała jełku. Dla paraŭnańnia jana ŭziała jašče niekalki inšych cukierak z kłubnicami i fundukom — «usiaho» pa 150 rubloŭ za kiłahram. Hetyja, jak skazała dziaŭčyna, našmat smačniejšyja.
U kamientaryjach błohiercy raspaviali, što raniej u hetaj kramie pradavalisia jašče daražejšyja cukierki — italjanskija z sušanymi jahadami pa 240 rubloŭ za kiłahram. Kažuć, vielmi smačnyja byli. Niekatoryja kamientatary zasmučanyja tym, što raniej možna było nabyć prysmaki z Francyi, Šviejcaryi, Bielhii i inšych krain Zachodniaj Jeŭropy. Ciapier ža ŭ asartymiencie ŭ asnoŭnym tavary z Turcyi i AAE.
Ciapier čytajuć
Z Łondana Mielnikava vylecieła na Šry-Łanku, u jaje byŭ kachanak spartovaha vyhladu ź Biełarusi49
Kamientary