Niemca Kryhiera prysudzili da śmierci za kastryčnicki vybuch u Aziaryščy?
Prapahandystka Ludmiła Hładkaja nadrukavała ŭ telehramie novy post, pryśviečany pracesu, na jakim asudzili da śmiarotnaha pakarańnia hramadzianina Hiermanii Ryka Kryhiera. Kankretyki mała i ŭ im, ale pa ŭskosnych zhadkach možna prynamsi zdahadvacca, u ździajśnieńni jakoha «terakta» jon moh abvinavačvacca.
Hładkaja cytuje niejkuju pažyłuju žančynu, jakaja prysutničała na sudzie ŭ jakaści paciarpiełaj:
«Ja spała, pračnułasia ad vybuchu, jaki byŭ vielmi žudasny… Było strašna, padumała, što niešta strašnaje zdaryłasia… Navat padumała — moža vajna…».
Žančyna, pavodle słoŭ Hładkaj, u momant svajho snu «znachodziłasia ŭ łaźni za žaleznymi dźviaryma, jakija pierakasiła, i jany bolš nie začynialisia». Heta, jak śćviardžaje prapahandystka, śviedčyć pra vializnuju siłu vybuchu.
Taksama Hładkaja zhadvaje pra «pakazańni dziasiatkaŭ śviedak, paciarpiełych, žycharoŭ najbližejšych da miesca vybuchu vulic, ludziej, jakija byli na čyhunačnaj stancyi ŭ momant i paśla vybuchu», a taksama pra «apytańni słužboŭcaŭ vajskovaj čaści».
Usio pieraličanaje razam z chranałahičnym supadzieńniem dazvalaje vykazvać viersiju, što Kryhieru inkryminavali arhanizacyju vybuchu na čyhunačnaj stancyi Aziaryšča pad Minskam. Hety vybuch prahučaŭ kala 23-j hadziny 5 kastryčnika 2023 hoda.
Ź infarmacyi, jakuju Ludmiła Hładkaja padavała raniej, vynikaje, što Ryka Kryhier pryjechaŭ u Biełaruś nibyta 2 kastryčnika, a zatrymali jaho 13 kastryčnika. U toj ža čas jana śćviaržała, što zadańniem jaho było «pravieści ŭ Asipovičach raźviedku i fatahrafavańnie abjektaŭ pa kaardynatach»
Aziaryšča — hałoŭnaja stancyja dla pahruzki vajskovaj techniki ŭ Minsku. Tam hruziacca i biełaruskija, i rasijskija vojski. Pobač ź joju raźmieščanyja 120-ja bryhada, 127-ja bryhada suviazi, 56-ty połk suviazi.
Supolnaść biełaruskich čyhunačnikaŭ tady vyśvietliła, što vybuch na stancyi Aziaryšča adbyŭsia pamiž 4 i 6 kalainami (bližej da vysokich hruzavych płatformaŭ). Mahutnaść vybuchu aceńvałasia jak davoli vysokaja. Tym nie mienš, adznačałasia, što
asabliva surjoznych paškodžańniaŭ infrastruktury (puciej i inšych zbudavańniaŭ dy pryład) nie adbyłosia. Nastupstvy vybuchu nie paciahnuli za saboj zatrymak ciahnikoŭ i pierapynkaŭ u ruchu, pakolki 1 i 2 hałoŭnyja kalainy nie byli paškodžanyja. Nieabchodnaść u adnaŭlenčych i značnych ramontnych pracach adsutničaje.
Kiraŭnik «Bajpoła» Alaksandr Azaraŭ tady vykazvaŭ viersiju, što sabranyja jaho arhanizacyjaj danyja dazvalajuć zrabić vysnovu, nibyta na stancyi Aziaryšča KDB praviaraŭ bojehatoŭnaść i reahavańnie na nadzvyčajnuju situacyju MUS i śpiecsłužbaŭ.
Mahutnaść vybuchu na stancyi Aziaryšča davoli vysokaja, ale asablivych paškodžańniaŭ niama — Supolnaść čyhunačnikaŭ
Tajamničy vybuch u Aziaryščy. «Bajpoł» prapanavaŭ svaju viersiju zdareńnia na stancyi pahruzki vajskovaj techniki
Na stancyjach u Minsku i vakoł Minska chodziać uzbrojenyja patruli milicyjantaŭ
U Homieli šukajuć traich mužčyn. Padobna, što heta źviazana z vybuchami pad Minskam
Na stancyi Aziaryšča padarvali puci — Supolnaść čyhunačnikaŭ
Nočču ŭ rajonie Kałodziščaŭ adbyŭsia vybuch — Motolkohelp
Ciapier čytajuć
Jaŭhien Afnahiel raskazaŭ, što było paśla suda, dzie skandavali «Vierym, možam, pieramožam!» I nazvaŭ, chto dla jaho sapraŭdny lidar Biełarusi5
Kamientary