Biełaruskaja biznes-łedzi raskazała pra siamiejnaje žyćcio i razvod z zasnavalnikam Itransition
«Muž uvioŭ takoje paniaćcie, jak kaeficyjent siamiejnaha ščaścia».
U novym vypusku šou «Pieratrem z Chalezinym» mastačka i biznes-łedzi Maryja Hvardziejcava raskazała pra ciažki praces razvodu z mužam Siarhiejem Hvardziejcavym — zasnavalnikam adnoj z samych bujnych biełaruskich IT-kampanij Itransition.
Maryja zhadvaje, što na momant, kali jana paznajomiłasia sa svaim mužam, u jaho była maleńkaja IT-kampanija, jakaja składałasia chiba što z 10 čałaviek. A sama Maryja ŭ toj čas pracavała na troch rabotach. Siarod ich — pasada pres-sakratara ŭ Biznes-škole BDU i redaktarka adździeła ŭ haziecie «Siamja». Akramia hetaha, žančyna vučyłasia na dzionnym adździaleńni žurfaka.
Zhadvajučy pra finansavy aśpiekt adnosin, žančyna adznačaje: «Kali pavyšajecca albo panižajecca finansavy ŭzrovień, heta zaŭsiody vyklik, pytańni da siabie. Nieabchodna sadzicca i damaŭlacca, jak heta budzie ŭładkavana».
Jak raskazvaje Maryja, u samym pačatku adnosin, kali ŭ pary byŭ tolki adzin syn, jaje muž uvioŭ takoje paniaćcie, jak «kaeficyjent siamiejnaha ščaścia».
«Jaho sutnaść zaklučałasia ŭ tym, što maje dachody pakryvali chatniuju rabotnicu, nianiu, pradukty, sadoŭnika. A jaho raźmiarkoŭvalisia na padarožžy, nabyćcio doma, inšyja vialikija rečy», — raskazvaje Maryja.
Kali naradziłasia treciaje dzicia, pary daviałosia jašče raz pieradamaŭlacca adnosna vydatkaŭ.
«Troje dziaciej — heta ciažka. Ja adčuła vielmi vialikuju roźnicu. Da hetaha ŭ mianie była dapamoha. Dapamahali baćki, była niania. Ja mahła zajmacca svajoj karjeraj i svaimi niejkimi pytańniami. Kali naradziłasia Liza, heta było ciažka. Na toj momant my byli ŭ Štatach. Ja pradała pijar-ahienctva. U mianie było dva hady «adčajnych chatnich haspadyń».
U lipieni 2022 hodzie Maryja padała na razvod. Na toj momant siamja žyła ŭ Vialikabrytanii, a za plačyma ŭ pary byŭ 21 hod sumiesnaha žyćcia. U siamji było čaćviora dziaciej.
Maryja zaŭvažaje, što pryčynaj razvodu było toje, što ŭ adnosinach «było šmat zalipańniaŭ», jana «straciła bałans pamiž saboju i siamiejnaj historyjaj». Žančyna zhadvaje, što na toje, kab pryniać rašeńnie ab razvodzie, jana dała sabie tydzień:
«Rašeńnie ŭzhadniałasia z maim unutranym śvietam i kaštoŭnaściami, na jakich ja buduju žyćcio. Tamu mnie było lohka. Zrazumieła, što roznyja techničnyja momanty byli składanymi. Mnie vielmi dapamahaŭ sport, miedytacyi. (…) Mocna dapamahła źmiena fokusu. Zamiest taho, kab zadavać pytańnie, čamu sa mnoj heta adbyvajecca, ja pačała zadavać pytańnie — dla čaho heta sa mnoj adbyvajecca».
Praces razvodu byŭ składanym. Jak zhadvaje Maryja, jana prajhrała słuchańni ab časovaj apiecy ŭ Viarchoŭnym sudzie Vialikabrytanii. Ale žančyna zdoleła viarnuć sabie dziaciej i atrymać svaju častku hrošaj ad ahulnaj majomaści. I joj atrymałasia vybudavać adnosiny sa svaim byłym mužam.
«Mnie vielmi padabajecca fraza adnoj ź vialikich fiłosafaŭ 20 stahodździa Channy Arendt, jakaja havaryła, što dla taho, kab ruchacca napierad, treba ŭmieć zabyvać», — adznačaje Maryja.
Kamientary