Žycharka Hrodna skončyła škołu ŭ 28 hadoŭ. Jak tak atrymałasia?
Błohierka z Hrodna padzialiłasia ŭ sacyjalnych sietkach svaim dasiahnieńniem — jana narešcie skončyła siaredniuju škołu i atrymała atestat. Ale karystalnikaŭ tyktoku ździviŭ toj fakt, što vypusknicy 28 hadoŭ.
— Mnie 28 hadoŭ i ja skončyła siaredniuju škołu, — radasna raskazvaje błohierka, jakuju zavuć Kaciaryna. — Ja vučyłasia ŭ viačerniaj škole, prahrama jakoj raściahnuta na try hady — 10, 11 i 12 kłas. Kolki razoŭ ja chacieła ŭsio kinuć, viadoma tolki majmu mužu. Ale dziakuj jamu za padtrymku.
Jak ža tak atrymałasia? Kaciaryna krychu raspaviała ŭ sacsietkach historyju svajho žyćcia. Vyśvietliłasia, što jana skončyła 9 kłasaŭ škoły, a potym pastupiła ŭ kaledž. Vučobu tam pryjšłosia kinuć, pryčyna hučyć davoli prazaična: ciažarnaść.
Kaciaryna vyjšła zamuž, naradziła dačku i syna, raźviałasia, kali čakała treciaje dzicia. Darečy, praz šmatdzietnaść błohierka nie adnojčy sutykałasia z chejtam — niadobrazyčliŭcy pisali abraźlivyja kamientaryi nakont taho, što jana tolki naradžać umieje. Ale jana spakojna tłumačyć, što zaŭsiody imknułasia zarabić hrošy: pracavała ŭ dziciačym sadku, sprabavała rabić brovy, hatavała desierty na zamovu (i navat stvaryła svoj zbornik receptaŭ), zajmałasia SMM, plała sumački z pacierak i pradavała ich pa ŭsioj Jeŭropie.
U 2022 hodzie Kaciaryna druhi raz pabrałasia šlubam. Adnavicca ŭ kaledžy ŭžo było niemahčyma — skončylisia ŭsie terminy. Tamu daviałosia iści ŭ viačerniuju škołu.
Raspaviadajučy pra płany na budučyniu, błohierka kaža, što na hod zabudzie pra vučobu, tamu što čakaje naradžeńnia čaćviortaha dziciaci. A paśla źbirajecca pastupać va ŭniviersitet, kab atrymać vyšejšuju adukacyju.
— Hałoŭnaje, što zaraz u mianie jość vybar i ja sama mahu vyrašać, na kaho mnie vučycca. Siońnia ja hanarusia saboj, bo dla mnohich heta strašny son — viarnucca nazad u škołu. A ja heta zrabiła.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ86
Kamientary