Biełarusa, jakoha departujuć z Polščy, raniej sudzili za pieravozku nielehalnych mihrantaŭ
Padstavaj dla zatrymańnia biełarusa mahło stać toje, što mužčyna pieravoziŭ mihrantaŭ, jakija nielehalna ŭjazdžajuć u Polšču ź biełaruskaha boku, piša MOST.
Biełarusa Dźmitryja Smaktunoviča 11 červienia vypravadzili z Polščy za parušeńnie praviłaŭ znachodžańnia ŭ Jeŭrasajuzie: jaho DNŽ u Litvie anulavali. Ciapier mužčyna znachodzicca na niejtralnaj zonie i baicca apynucca ŭ Biełarusi z-za svajoj hramadzianskaj pazicyi.
Žonka Natalla raspaviała, što Dźmitryja zatrymlivali za pieravoziŭ mihrantaŭ, jakija nielehalna ŭjazdžajuć u Polšču ź biełaruskaha boku, u krasaviku 2023 hoda. Tady jon supracoŭničaŭ sa śledstvam, dziakujučy jaho dziejańniam udałosia vyjści na inšych udzielnikaŭ kanała pieravozki. Jaho sudzimaść pahašanaja.
Jak śćviardžaje Natalla, mužčynu nielha ŭ Biełaruś praz palityčny składnik: pavodle jaje słoŭ, Źmicier aktyŭna kamientavaŭ padziei 2020 hoda ŭ sacsietkach. Da jaho maci prychodzili ludzi, jakija cikavilisia mužčynam. A potym ź im źviazalisia znajomyja «z orhanaŭ» i rekamiendavali pa mahčymaści nie pryjazdžać u Biełaruś, tamu što na jaho jość niejkija materyjały.
Kiroŭcy aŭtobusaŭ skazali Źmicieru, što na biełaruskim baku jaho ŭžo čakajuć supracoŭniki KDB.
Ciapier mužčyna znachodzicca na niejtralnaj terytoryi.
Polskija pamiežniki spynili ruch na pamiežnym punkcie ŭ Tarespali ŭ abodva baki.
Pavodle infarmacyi MOST, da Dźmitryja padychodzili biełaruskija pamiežniki i prapanoŭvali «biez kabinietaŭ» pravieści na biełaruski bok i navat dapamahčy dabracca dadomu. Ale mužčyna čakaje advakata ŭ niejtralnaj zonie.
Ź biełaruskaha boku miažy pracuje dziaržaŭnaje telebačańnie.
Kamientary