Čat-boty mohuć padtrymlivać nacyzm i inšyja antyčałaviečyja ideałohii z-za adnoj asablivaści
Navukoŭcy sa Stenfarda vyjavili sprečnuju asablivaść maleńkich i vialikich moŭnych madelaŭ, takich jak ChatGPT, Bing, Bard i inšych, jakaja składajecca ŭ prajaŭleńni razumieńnia i navat padtrymki takich antyčałaviečych ideałohij, jak nacyzm. Usiamu vinoj adna nałada, jakaja, naadvarot, była stvoranaja ź mierkavańniaŭ humanizmu.
Jak piša časopis Life Science, u svaim niadaŭnim daśledavańni navukoŭcy sa Stenfardskaha ŭniviersiteta ŭ ZŠA prateściravali šeść maleńkich i vialikich niejrasietak na vykazvańnie empatyi da karystalnikaŭ roznych ras, pałoŭ, hienietyki i palityčnych pohladaŭ.
Dla hetaha daśledčyki stvaryli 65 unikalnych virtualnych asob sa svaimi naborami charaktarystyk, jakija skardzilisia niejrasietkam na ŭłasnaje psichičnaje zdaroŭje, a taksama na pryhniot i hvałt u dačynieńni da siabie ŭ žyćci.
Pieršaja vysnova, da jakoj pryjšli navukoŭcy, była takoj, što sučasnyja madeli štučnaha intelektu (ŠI) pakul jašče nie zdolnyja praŭdapadobna imitavać razumieńnie i spačuvańnie ŭ adnosinach da ludziej.
Adnak druhaja vysnova akazałasia tryvožnaj. Niejrasietki, imknučysia prajaŭlać empatyju da ŭsich karystalnikaŭ, mohuć całkam ci amal całkam praihnaravać albo navat padtrymać fakty najaŭnaści ŭ asobnych indyvidaŭ antyčałaviečych, marhinalnych abo dyskryminacyjnych ideałahičnych pohladaŭ.
Tak, viadomy na ŭvieś śviet ChatGPT padčas hutarki ź virtualnaj asobaj u vyhladzie «suicydalnaha i depresiŭnaha paśladoŭnika idej nacyzmu» vykazaŭ «nadzvyčajnaje spačuvańnie» hetamu karystalniku i całkam praihnaravaŭ jahonyja nacysckija pohlady, pieradaje časopis Life Science.
Prykłady ź inšymi niejrasietkami, siarod jakich byli čat-boty Microsoft Bing i Google Bard, taksama demanstravali spačuvańnie, a ŭ niekatorych vypadkach i padtrymku adeptam dyskryminacyjnych ideałohij.
«My zaniepakojenyja tym, što ŠI niedastatkova ŭśviedamlaje kantekst i situacyju, kali i da kaho možna vykazvać empatyju. Varta terminova zrabić niejrasietki bolš spraviadlivymi, kab paźbiehnuć u budučyni niepryjemnych sacyjalnych nastupstvaŭ», — padkreślili navukoŭcy ŭ svaim daśledavańni.
Ciapier čytajuć
Ciemnaskury student u Minsku paskardziŭsia Łukašenku na darahuju koka-kołu. Užo vybačaŭsia, ale milicyja im zacikaviłasia6
Kamientary