Pradprymalnik z Rečycy znajšoŭ na siabie vosiem danosaŭ u bazie KDB. Adnaho z aŭtaraŭ jon dobra viedaje
Rečyckamu pradprymalniku Dzianisu Šylanku daviałosia źjechać ź Biełarusi. Paśla prykładna pałovy hoda, jakuju jon pravioŭ pa roznych administracyjnych spravach u IČU, ułady pačali pravierki ŭ jahonaj firmie, a paśla źjaviłasia pahroza kryminalnaj spravy. Ciapier vyjaviłasia, što na jaho aktyŭna pisali danosy ŭ KDB, pra što z byłym kiraŭnikom firmy taksi 181 u Rečycy parazmaŭlała vydańnie «Štodzień».
— Kolki danosaŭ vy znajšli ŭ bazie? Pisali znajomyja ludzi?
— Adnaho viedaju dakładna. Alaksandr Šychaviec — heta były moj supracoŭnik i paźniej dyrektar inšaj firmy taksi. Jon pisaŭ taksama danosy i na inšych ludziej.
Pa maich źviestkach, jon ciapier znachodzicca ŭ Varšavie, a firma praciahvaje pracavać u Biełarusi. Moža być, jon navat nie prosta kiepski čałaviek, moža być, źjaŭlajecca niejkim supracoŭnikam KDB, bo ŭ Biełarusi było ŭsio niabłaha, i što jon robić tut, niezrazumieła.
Ale pry hetym jon padtrymlivaŭ Cichanoŭskuju: kali źbirali podpisy, jon svoj addaŭ za jaje. My ŭ adnoj čarzie stajali.
Čałaviek, jaki paviedamiŭ mnie pra jaho, źviarnuŭsia ŭ niejkuju słužbu biaśpieki, kab jaho pravieryli. U mianie nijakich vychadaŭ niama, a pravieryć jaho, napeŭna, varta, bo ad jahonaha imia jość i inšyja danosy.
Usiaho danosaŭ na mianie štuk 8, napeŭna. Ale inšych ludziej, byccam by, nie viedaju.
— Jak dumajecie, ci jość šaniec u biełarusaŭ vykaranić hetuju tradycyju palityčnych danosaŭ? Što dla hetaha nam treba zrabić?
— Biełarusy — vielmi dobryja, metaskiravanyja, mudryja, pracavityja ludzi. Ale hetaje jašče stalinskaje vychavańnie, jano paŭsiudna jašče zastałosia: i ŭ škołach, i ŭ dziciačych sadkach — paŭsiudna. I mnie padajecca, što treba mianiać samo vychavańnie, pačynajučy z sadkoŭ.
Treba tłumačyć čałavieku, što jon čałaviek, ad jaho budzie zaležać, jak budzie raźvivacca taja ci inšaja situacyja ŭ jahonym domie, padjeździe, na vulicy i ŭ jahonaj krainie. Kazać, što podłaść i danosy — heta nie toje, kab soramna i prajava vializnaj słabaści, ale što heta prosta niekulturna.
Nas uvieś čas vychoŭvali jak bydła, jak pracoŭnuju žyviołu, u jakoj jość pravadyr, nastaŭnik, na zavodzie — majstar. Ty pavinien słuchać, što jon tabie skaža, bo jamu lepš bačna. Voś pa takim łancužku ŭ nas usio i budavałasia. Kab ludzi pracavali i nie zadavali lišnich pytańniaŭ.
Pačynać treba z našych maleńkich biełarusikaŭ, a kab im usio tłumačyć, treba brać nastaŭnikaŭ. Heta atrymlivajecca, što jak minimum try pakaleńni pavinny źmianicca. Ale šansy jość zaŭsiody. Treba nie apuskać ruki i pracavać nad hetym.
«Stajanka pa vuł. Konieva, jakaja naležyć Šylanku Dzianisu Siarhiejeviču, i jaho aŭtamabil na rasijskim uliku (fota z bčb-ściaham na stajancy i aŭto z bčb-ściaham prykładajecca). Haradskija ŭłady (DAI, milicyja, vykankam) u suviazi z asabistaj zacikaŭlenaściu zapluščvajuć vočy na antydziaržaŭnyja dziejańni hramadzianina Šylanka i nie prymajuć nijakich dziejańniaŭ», — pisaŭ u KDB Alaksandr Šychaviec z Rečycy ŭ adnym z danosaŭ.
Jon prasiŭ «pryniać miery da paznačanaha hramadzianina, jaki viadzie antydziaržaŭnuju dziejnaść» i pravieryć jaho suviazi ź miascovymi čynoŭnikami.
«My zmahajemsia nie za toje, kab trošačku niešta źmianić, a kab prybrać režym Łukašenki». Historyja biełaruskich «Kibierpartyzanaŭ»
Zasnavalnik ruchu «Antymajdan. Biełaruś» ciapier žyvie ŭ Polščy: Maje pohlady mocna źmianilisia da lepšaha
Dvoje siabroŭ «Narodnaj hramady» pisali danosy ŭ KDB. Chto jany i jak tłumačać situacyju?
U bazie zvarotaŭ u KDB — bolš za 40 chadajnictvaŭ ab vyzvaleńni Babaryki
Danosčyki zaraz dvojčy padumajuć
Ciapier čytajuć
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła8
Kamientary