Sud nad Trampam pa spravie ab sakretnych dakumientach adkłali na niavyznačany termin
Zaraz jon naŭrad ci pačniecca da prezidenckich vybaraŭ 5 listapada.
Fiederalny akruhovy sudździa Ajlin Kenan vyrašyła adkłaści na niavyznačany termin sud nad Donaldam Trampam pa spravie nakont sakretnych dakumientaŭ. Zaraz jon naŭrad ci pačniecca da prezidenckich vybaraŭ 5 listapada. Pakul byłoha prezidenta sudziać pa spravie ab vypłatach pornaaktrysie Stormi Deniełs, piša Bi-bi-si.
Sudździa Fiederalnaha akruhovaha suda Paŭdniovaj akruhi Fłarydy zajaviła, što pryznačać pačatak słuchańniaŭ pierš, čym vyrašany važnyja pytańni adnosna dokazaŭ, było b nieabačliva.
Sprava ab sakretnych dakumientach — heta adna z čatyroch kryminalnych spraŭ, zaviedzienych u dačynieńni da byłoha prezidenta. U hetym vypadku prakuratura abvinavačvaje Donalda Trampa ŭ niezakonnym zachoŭvańni sakretnych dakumientaŭ u jaho majontku Mar-a-Łaha ŭ Fłarydzie, a taksama ŭ dačy iłžyvych pakazańniaŭ i pieraškodzie rasśledavańniu.
U chodzie papiaredniaha razboru advakaty Trampa i prakurory šmat spračalisia, u pryvatnaści, pra toje, jakija z sakretnych dakumientaŭ možna budzie pakazać u sudzie ŭ jakaści dokazaŭ.
Pačatak sudovaha pracesu byŭ pryznačany na 20 maja, ale ciapier sudździa Kenan hetuju datu skasavała, a novuju nie pryznačyła. Zamiest hetaha jana pryznačyła niekalki novych papiarednich słuchańniaŭ, u tym liku adno — na kaniec lipienia.
Surjoznyja sumnievy ŭ tym, što sud sapraŭdy pačniecca 20 maja, źjavilisia ŭžo daŭno, pakolki papiarednija razhlady prasoŭvalisia vielmi pavolna.
Niekatoryja amierykanskija kamientatary vykazvali padazreńni, što sudździa Kenan, jakaja časta ŭstavała na bok Trampa i jaho advakataŭ, naŭmysna adciahvała pačatak suda nad byłym prezidentam, jaki pryznačyŭ jaje.
Advakaty Trampa prapanoŭvali pravieści sud užo paśla prezidenckich vybaraŭ, na jakich, vidavočna, Tramp znoŭ pazmahajecca z Džo Bajdenam. Prakurory damahalisia, kab sud prajšoŭ užo sioleta.
Razam z eks-prezidentam abvinavačanymi pa hetaj spravie źjaŭlajucca jaho pamočnik Uołt Naŭta i mieniedžar majontka Mar-a-Łaha Karłas de Aliviejra. Usie jany adkidajuć abvinavačvańni.
Donald Tramp, adbivajučysia ad abvinavačvańniaŭ pa čatyroch kryminalnych spravach, adnačasova damahajecca ŭ Viarchoŭnym sudzie pryznańnia, što jon, jak prezident, maje imunitet ad kryminalnaha pieraśledu.
«Niekatorym ludziam varta źniać ružovyja akulary». Lavončyk — pra Mielnikavu, uciečku ŭ «Bajchełp», biełyja palito i hrošy na 1300 palitviaźniaŭ10
Kamientary