Raman Hofman stanie vajennym sakratarom premjer-ministra.
Bryhadny hienierał Raman Hofman stanie novym vajennym sakratarom Bińjamina Nietańjachu. Premjer-ministr Izraila abiraŭ ź niekalkich kandydatur, ale spyniŭ svoj vybar mienavita na ŭradžency Mazyra.
Ciapier kandydaturu Hofmana pavinien zaćvierdzić Hienieralny štab, papiaredniaja zhoda ŭžo atrymanaja. Novy vajenny sakratar atrymaje zvańnie hienierał-majora, paviedamlaje now14.co.il.
U sakaviku Hofman uznačaliŭ Upraŭleńnie raspracoŭki novych mietadaŭ viadzieńnia boju CACHAŁ. Pasadu vajennaha sakratara premjer-ministra z 2019 hoda zajmaŭ Avi Hil.
Vajenny sakratar kansultuje premjer-ministra pa pytańniach biaśpieki i abarony. Heta adziny čynoŭnik, jaki maje poŭny dostup da ŭsich raźvieddanych.
Budučy hienierał naradziŭsia ŭ Mazyry ŭ 1976 hodzie. U 1990 hodzie repatryjavaŭsia z baćkami ŭ Izrail. Jon vučyŭsia ŭ siaredniaj škole ŭ Ašdodzie, a potym u vajennym internacie ŭ pasieliščy Eli.
U 1995 hodzie byŭ pryzvany na słužbu ŭ braniatankavyja vojski armii abarony Izraila. Słužyŭ kamandziram uzvoda, a zatym i kamandziram roty. U 2002 hodzie prymaŭ udzieł u apieracyi «achoŭnaja ściana». Paśla byŭ pryznačany namieśnikam kamandzira 71-ha bataljona 188-j braniatankavaj bryhady. Potym zajmaŭ anałahičnuju pasadu ŭ 460-j braniatankavaj bryhadzie. Paźniej słužyŭ u štabie braniatankavaj dyvizii «Haaš».
U 2011-2013 hadach kamandavaŭ 75-m bataljonam u 7-j braniatankavaj bryhadzie.
Raman Hofman u 2019 hodzie staŭ pieršym pradstaŭnikom vialikaj alii, jaki dasiahnuŭ zvańnia hienierał-majora i atrymaŭ dyviziju pad svajo kamandavańnie. Hofman staŭ kamandziram dyvizii «Cha-Bašan» u Paŭnočnym akruzie, jakaja harantuje biaśpieku Hałanskich vyšyń i prylehłych da ich terytoryj.
27 kastryčnika 2022 hoda zaniaŭ pasadu kamandzira Nacyjanalnaha centra vučeńniaŭ suchaputnych vojskaŭ.
7 kastryčnika 2023 hoda padčas bajoŭ z bajevikami CHAMAS byŭ surjozna paranieny ŭ bai pad Sderotam.
Raman Hofman žanaty, u jaho try dački.
Ciapier čytajuć
Kamientary