U Vilni šukajuć ludziej, hatovych za hrošy špijonić za litoŭskimi śpiecsłužbami i zdymać akcyi biełarusaŭ
Imavierna, heta praca śpiecsłužbaŭ Rasii abo Biełarusi. Tyja, chto nabiraje na pracu — dakładna nie litoŭcy.
U telehram-čacie «Praca Vilnius» źjaviłasia čarhovaja abjava pra pošuk padpracoŭki. Žurnalist «Našaj Nivy» vyrašyŭ zapytacca, u čym jaje sutnaść.
Spačatku kantakt prapanavaŭ zdymać akcyi za miažoj. «25 [sakavika] vychodzili biełarusy, prasili ich zdymać taksama». Apłata — vyklučna ŭ kryptavalucie.
Paśla jon zapytaŭsia, ci hatovy naš žurnalist parušać zakon, «naprykład, malavać hrafici».
Kab praciahnuć dyjałoh, žurnalist skazaŭ, što ŭ pryncypie hatovy, hałoŭnaje, kab sprava nie tyčyłasia narkotykaŭ.
«My bieražem svaich ludziej, anijakich narkotykaŭ», — zapeŭniŭ «Aleks».
U vyniku «Aleks» vydaŭ pieršaje, probnaje dy biaspłatnaje zadańnie — sfatahrafavać parkoŭku z numarami aŭtamabilaŭ. Admietna, što ŭ budynku znachodzicca Departamient dziaržaŭnaj biaśpieki Litvy.
«Aleks» pačaŭ pierakonvać, što heta całkam lehalna, a «pytańniaŭ zamoŭnikam jany nie zadajuć».
Kab pravieryć, ci źviazany hety čałaviek ź Litvoj, my skinuli jamu pytańnie na litoŭskaj movie — maŭlaŭ, heta budynak Departamienta dziaržaŭnaj biaśpieki Litvy, čałaviek na druhim kancy adkazvaŭ vielmi doŭha. Na pytańnie, ci litoviec jon, adkazaŭ: «nie, etničny ŭkrainiec» (paśla admovy vykonvać zadańnie jon adrazu vydaliŭ paviedamleńnie, tamu my nie paśpieli jaho zachavać). Biełaruskaj movy jon taksama nie viedaje.
Imavierna, zamoŭnik ci apieratar ciapier znachodziacca ŭ Polščy — skrynšot huhł-mapaŭ, jaki nam skinuli, na polskaj movie.
Siarod inšaha, aktyvizavaŭsia i inšy kantaktny akaŭnt, pra jaki my raspaviadali — Normal (id 7123162933). Minułym razam zadańniem było namalavać hrafici «Vilnia naša» na bačnym miescy ŭ horadzie. A ciapier jon znoŭku nabiraje ludziej dla vykanańnia zadańniaŭ u Vilni.
Administratary prynamsi adnoj z hrupaŭ pa pošuku pracy taksama adreahavali na naša paviedamleńnie i zabanili Normal.
Kryminalny kodeks Litvy praduhledžvaje surovuju adkaznaść za špijanaž i dapamohu «inšym dziaržavam u varožych da Litvy dziejańniach». Pa artykule 118 KK Litvy za ahienturnuju dziejnaść pahražaje da 7 hadoŭ turmy, a za špijanaž pa artykule 119 KK Litvy — da 15 hadoŭ turmy.
«Naša Niva» — bastyjon biełaruščyny
PADTRYMAĆ
Kamientary
Hramotnosť urovnia "škoła KHB"