Biełaruskaha aktyvista Mikałaja Alaksiejeva, zabitaha FSB pry zatrymańni ŭ Karelii, pachavali ŭ Rasii. U dzień pachavańnia jaho małodšamu dziciaci spoŭniłasia dzieviać miesiacaŭ. Pra heta DW raspavioŭ adzin z synoŭ Alaksiejeva.
Biełaruskaha aktyvista Mikałaja Alaksiejeva, zastrelenaha ŭ Karelii pry zatrymańni FSB, pachavali ŭ Rasii 16 sakavika.
Rasijskija śpiecsłužby kala miesiaca sačyli za mužčynam, śćviardžaje ŭ razmovie z DW jaho syn, jaki paprasiŭ nie nazyvać imia. Pavodle jaho słoŭ, apošnija paru hadoŭ Alaksiejeŭ žyŭ u Rasii, tamu što ŭ Biełarusi jaho abvinavacili ŭ «abrazie Łukašenki» i abjavili ŭ vyšuk.
«Z baćkam mieŭ znosiny litaralna za niekalki dzion da jaho zabojstva. U apošni čas jon šukaŭ mahčymaść vyjechać za miažu, bo ź minułaha hoda RF i RB abjadnali vyšukovyja śpisy», — raspavioŭ surazmoŭca.
Jon miarkuje, što heta i stała pryčynaj cikavaści da jaho baćki rasijskich śpiecsłužbaŭ.
49-hadovy Mikałaj Alaksiejeŭ byŭ zastreleny 6 sakavika supracoŭnikami FSB u Ałanieckim rajonie respubliki Karelija. Pa aficyjnaj viersii rasijskich siłavikoŭ, mužčynu źbiralisia zatrymać pa kryminalnaj spravie «ab padrychtoŭcy da teraktu», ale jon akazaŭ supraciŭleńnie i byŭ zabity. U rasijskaj śpiecsłužbie taksama zajavili, što Alaksiejeŭ byŭ členam pałka Kastusia Kalinoŭskaha i źbiraŭsia padarvać administracyju ŭ horadzie Ałaniec.
«Na videa FSB niama ni asob, ni hołasu padazravanaha»
Syn Alaksiejeva źviartaje ŭvahu, što kryminalnaja sprava «ab padrychtoŭcy da teraktu» ŭ dačynieńni da jaho baćki była zaviedzienaja ŭ dzień jaho hibieli, 6 sakavika. Jon nazyvaje aficyjnuju viersiju FSB «cyrkam, jaki byŭ naładžany napiaredadni vybaraŭ».
«Heta ž tak banalna: hladzicie, ludzi, vakoł terarysty i vorahi, hurtujciesia vakoł lidara», — ličyć jon.
Mužčyna adznačaje, što na videa «likvidacyi biełarusa», raspaŭsiudžanym FSB, niama «ni asob, ni hołasu padazravanaha»: «Pabiehali, pakryčali ŭ pustatu, pastralali pa ścienach, kadr ź ciełam. Asabliva ŭ vočy kinułasia: bieły švedar, śvietły bieton vakoł, a kryvi niama. Ad kulavych [ranieńniaŭ] jaje zaŭsiody šmat».
Raniej pradstaŭniki abjadnańnia byłych siłavikoŭ Biełarusi «Biełpoł» zajavili, što rolik FSB «maje vidavočna pastanovačny charaktar». Jany taksama vykazali zdahadku, što videa źniata «ŭžo paśla zabojstva Alaksiejeva».
Alaksiejeŭ pracavaŭ za 30 km ad aficyjnaha miesca śmierci
Pa aficyjnaj viersii, biełarusa zastrelili kala piaci viečara 6 sakavika. Syn Alaksiejeva śćviardžaje, što baćka pierastaŭ vychodzić na suviaź u 10:48.
«Ad bazy adpačynku, dzie jon pracavaŭ, da aficyjnaha miesca śmierci — kala 30 km. Heta značyć, pa viersii FSB, jon išoŭ na niby «zadańnie» z vyklučanym telefonam 30 kiłamietraŭ zimoj — z 11 da 17 hadzin», — kaža małady čałaviek.
Surazmoŭca DW pryznajecca, što viedaŭ i padzialaŭ palityčnyja pohlady svajho baćki, jaki padtrymaŭ pratesty ŭ Biełarusi ŭ 2020 hodzie i vystupaŭ suprać vajny va Ukrainie.
Jon śćviardžaje, što Alaksiejeŭ nie byŭ prychilnikam siłavych mietadaŭ.
«Jon vystupaŭ za vyklučna mirny pratest. Jon byŭ hłyboka vierujučym čałaviekam: u chram chadziŭ, spaviadaŭsia, maliŭsia. Zbroja i, tym bolš, terakty byli prosta niečym niemahčymym», — dadaje syn aktyvista.
Na pytańnie DW, ci byŭ źviazany jon ci jaho baćka z pałkom Kalinoŭskaha, surazmoŭca adkazaŭ: «Ja asabista z PKK nie źviazany». Raniej z pytańniem pra Alaksiejeva žurnalisty taksama źviartalisia ŭ połk Kalinoŭskaha. «Nie kamientujem hety vypadak», — zajavili ŭ pres-słužbie PKK.
Kamientary