Pucina vinšujuć ź pieramohaj na vybarach kiraŭniki «siabroŭskich krain»
Jak vynikaje z paviedamleńniaŭ ahienctvaŭ, pieršym z zamiežnych lidaraŭ Pucina pavinšavaŭ prezident Vieniesueły Nikałas Madura.
Kiraŭniki šerahu tak zvanych družalubnych Rasii krain pavinšavali Uładzimira Pucina ź pieramohaj na vybarach prezidenta, u jakich jon u adsutnaść realnaj palityčnaj kankurencyi bałatavaŭsia na piaty termin.
Jak vynikaje z paviedamleńniaŭ ahienctvaŭ, pieršym z zamiežnych lidaraŭ Pucina pavinšavaŭ prezident Vieniesueły Nikałas Madura, lehitymnaść jakoha stavili pad sumnieńnie Złučanyja Štaty. Jon nazvaŭ Pucina «starejšym bratam» i skazaŭ, što jaho pieramoha dapamoža budavać «šmatpalarny śviet». Vinšavańni Pucinu nakiravali taksama lidary Kuby, Nikarahua, Balivii, Handurasa, piša Radyjo Svaboda.
Pucin taksama atrymaŭ vinšavańni ad kiraŭnikoŭ Paŭnočnaj Karei i Mjanmy, ź jakimi Maskva ciesna supracoŭničaje ŭ śfiery pastavak zbroi.
Paviedamlajecca taksama pra vinšavańni ad lidaraŭ Uźbiekistana i Tadžykistana, prarasijskaha kiraŭnika baśnijskaj Respubliki Sierbskaj Miłarada Dodzika i dziejačaŭ małdaŭskaj prarasijskaj apazicyi. Pucina pavinšavaŭ taksama MZS Kitaja. Pakul nie było paviedamleńniaŭ ab vinšavańniach ad staršyni KNR Si Czińpina.
Łukašenka paźniej u telefonnaj razmovie pavinšavaŭ Pucina ź pieramohaj na vybarach «ad siabie asabista i ad imia ŭsiaho biełaruskaha naroda».
Vinšavańniaŭ ad zachodnich lideraŭ u adras Pucina niama — za vyklučeńniem sarkastyčnaha tvitu kiraŭnika Jeŭrarady Šarla Mišela, jaki pavinšavaŭ Pucina ź pieramohaj jašče 15 sakavika, ukazaŭšy na pradkazalnaść vynikaŭ vybaraŭ. U kancylaryi prezidenta Hiermanii Franka-Valtera Štajnmajera naŭprost zajavili, što jon Pucina vinšavać nie budzie. Źniešniepalityčnyja viedamstvy šerahu krain abmiežavalisia kanstatacyjaj, što vybary ŭ Rasii byli niesvabodnymi i dalokimi ad demakratyčnych standartaŭ.
Prezident Ukrainy Uładzimir Zialenski ŭ viačernim zvarocie ŭ niadzielu zajaviŭ, što Pucin «imitavaŭ» vybary prezidenta. Pa słovach Zialenskaha, Pucin «prosta zachvareŭ uładaj i robić usio, kab kiravać pažyćciova». Ukrainski prezident zaznačyŭ, što nijakaj lehitymnaści «ŭ hetaj imitacyi vybaraŭ niama i być nie moža». Va Ukrainie aficyjna zabaroniena vieści jakija-niebudź pieramovy asabista z Pucinym.
Čytajcie taksama:
CVK: Pucin pieramahaje na vybarach z rekordnymi 87,33%. A ŭ Čačni ŭ jaho naohuł 99%
Pucin prakamientavaŭ śmierć Navalnaha. I skazaŭ, što byŭ zhodny jaho abmianiać
Pucin zajaviŭ pra mahčymaść stvareńnia «sanitarnaj zony» na ŭkrainskich terytoryjach
Ciapier čytajuć
Łukašenku na śviacie ŭ Aleksandryi supravadžała aficer Zajcava10
Kamientary
- 300-500k ludziej pakinuła krainu
- tysiačy palitviaźniaŭ
- aryšty za praktyčna ŭsiakuju krytyku ŭłady
- ...