Pamierła mahiloŭskaja katalička Iryna Šlakava, narodžanaja ŭ stalinskaj ssyłcy
Iryna Šlakava pamierła na 85-m hodzie žyćcia. Razam z maci jana viarnułasia sa stalinskaj ssyłki ŭ rodny horad i adradžała katalickaje žyćcio.
Iryna Šlakava nie praminała nabaženstvaŭ u mahiloŭskim kaściole Uniebaŭziaćcia Najśviaciejšaj Pany Maryi. Zaŭždy ścipła stajała pry bramie i vietliva prasiła prychadžan zastavacca da kanca słužby. Jaje nazyvali pani Iryna. Niamnohija znali jaje proźvišča i historyju žyćcia.
Pra śmierć 84-hadovaj katalički stała viadoma z sacyjalnych sietak.
Sioleta 30 studzienia niepadalok ad kaściołu, jaki jana tak šanavała, źbiła mašyna. Kabieta trapiła ŭ reanimacyju.
Mahiloŭcy raskazali, što žančynie amputavali nahu. Lekary zmahalisia za jaje žyćcio. Jana nie zdavałasia, ale nie vytrymała serca.
«Pajšoŭ jašče adzin čałaviek, jaki navučaŭ mianie viery i dabru», — havarycca ŭ adnym z kamientaroŭ na dopis pra toje, što pani Iryny bolš niama.
«Pani Iryna z rodu Lipskich — patomnaj šlachty i bujnych ziemleŭładalnikaŭ hubierni. Małaletni viazień HUŁAHa», — z žałobaju infarmuje aŭtar jašče adnaho.
Iryna Šlakava ź siamji ssylnych Stalinym katalikoŭ.
Jaje maci (Fiłamiena Lipskaja) razam z adnadumcami pratestavała ŭ 1930 hodzie suprać źniavoleńnia miascovaha ksiandza Balasłava Słoskana, jaki ŭžo pabyvaŭ u Sałavieckich łahierach i viarnuŭsia ŭ Mahiloŭ.
Kataliki z charuhvami tady pryjšli da NKVD. Śviatara adpuścili, ale pačali pieraśledavać jaho abaroncaŭ.
Fiłamienu Lipskuju spačatku ŭtrymlivali ŭ maskoŭskaj turmie, namaŭlali adračysia ad viery, a potym adpravili na volnaje pasialeńnie ŭ Kazachstan. Na pačatku 1930-ch jašče nie było takoha teroru, jaki balšaviki ŭsčali paźniej.
Balasłava Słoskana taksama aryštavali. Paśla troch hadoŭ u HUŁAHu Łatvija abmianiała jaho na savieckaha špijona.
Paśla Druhoj suśvietnaj vajny śviatar byŭ apostalskim vizitataram dla biełarusaŭ-katalikoŭ u Zachodniaj Jeŭropie. Pamior u 1981 hodzie ŭ Brusieli. Jaho pareštki byli pierapachavanyja ŭ Łatvii. Ź inicyjatyvy łatvijskaha jepiskapatu tryvaje praces kananizacyi śviatara.
U Kazachstanie maci Fiłamiena Lipskaja syšłasia z ssylnym rasiejcam Juryjem Šlakavym. Uśled za dačkoj na čužynu pierabrałasia i babula viernicy.
U 1939 hodzie naradziłasia Iryna Šlakava. Praz try hady jaje baćku zabrali na front, dzie jon prapaŭ bieź viestak. Nieŭzabavie pamierła i babula.
Pa słovach Iryny Šlakavaj, maci sumavała pa Biełarusi, časta zhadvała jaje i mahiloŭski kaścioł.
U Mahiloŭ jany viarnułasia tolki ŭ 1958 hodzie. Adrazu pryjechali da kaścioła, a jon stajaŭ abharełym.
Kataliki ŭ toj čas źbiralisia na malitvy na «polskich» mohiłkach.
Tudy ž naviedvałasia milicyja — pierapisvała viernikaŭ, a zatym vyklikała na prafiłaktyčnyja hutarki. Zredku na malitvy pryjazdžaŭ śviatar.
Arcybiskup Tadevuš Kandrusievič na adnym z nabaženstvaŭ u mahiloŭskim kaściole zhadvaŭ sa ślaźmi, jak miascovyja vierniki malilisia na mohiłkach. Načynieńnie dla malitvy prynosili ŭ valizcy.
Pieršuju katalickuju parafiju ŭ Mahilovie zarehistravali ŭ 1990 hodzie. Iryna Šlakava była siarod padpisantaŭ zvarotu da ŭłady. Budynak kaściołu viernikam nie viarnuli dahetul.
Śviatynia ličycca kamunalnaj ułasnaściu. U jaje adnaŭleńni ŭdzielničaŭ pamierły ŭ źniavoleńni mastak Aleś Puškin.
Pachavajuć Irynu Šlakavu 13 sakavika na katalickich mohiłkach, pobač z maci.
«Naša Niva» — bastyjon biełaruščyny
PADTRYMAĆHladzicie taksama:
Jany pajšli ad nas u 2023-m. Zhadvajem biełarusaŭ, jakich my sioleta stracili
Arcybiskup Kandrusievič: Uźnikły kryzis — heta niepaźbiežnaje nastupstva hrachu biezzakońnia
«Samaje strašnaje — heta žyćcio ŭ strachu». Biskup Jašeŭski padčas teletranślacyi byŭ pryncypovy
U Mahilovie «rusifikavali» kryž na miescy stalinskich rasstrełaŭ
Kamientary