Hramadzianie Šviejcaryi vykazalisia za «trynaccatuju piensiju»

Pa vynikach ahulnanarodnaha refierendumu ŭ Šviejcaryi, jaki prajšoŭ u niadzielu, 58,2% hramadzian vykazalisia za dadatkovyja vypłaty piensijanieram — tak zvanuju «trynaccatuju piensiju», piša Deutsche Welle.

Zakonaprajekt ab vypłatach pa anałohii z «trynaccataj zarpłataj», jakuju atrymlivajuć rabotniki ŭ Šviejcaryi i mnohich inšych krainach Jeŭropy, łabiravali miascovyja prafsajuzy i levyja partyi. Jaŭka na hałasavańni pa ŭsioj krainie skłała 58%.

Hałasavańnie na refierendumach u Šviejcaryi patrabuje taho, kab za źmieny vykazalisia nie prosta bolšaściu hałasoŭ pa krainie, ale ŭ bolšaści z 26 kantonaŭ krainy, adznačajuć ŚMI.

«Trynaccatuju piensiju» padtrymali ŭ 16 kantonach z 26 — heta pieršy vypadak u Šviejcaryi, kali prafsajuzam udałosia za košt pramoj demakratyi damahčysia realizacyi prapanovy, jakaja praduhledžvaje pavieličeńnie dziaržvydatkaŭ.

Siaredniaja miesiačnaja piensija ŭ respublicy składaje 2450 šviejcarskich frankaŭ (kala 2470 jeŭra) dla adzinokich i 3675 frankaŭ (kala 3854 jeŭra) dla par. Pry hetym Šviejcaryja — adna z samych darahich krain śvietu.

Šviejcarcy nie padtrymali pavyšeńnie piensijnaha ŭzrostu

Suprać novych vypłat vystupaŭ urad Šviejcaryi. Ułady ličać, što heta zapatrabuje dadatkovych biudžetnych vydatkaŭ u pamiery bolš za 4 młrd šviejcarskich frankaŭ u hod i moža pastavić pad pahrozu stabilnaść sacyjalnaj sistemy. Prychilnikam reformy ŭdałosia mabilizavać pratestny elektarat, adznačajuć ekśpierty.

Adnačasova z pytańniem ab «trynaccataj piensii» na refierendum była vyniesiena prapanova ab pavyšeńni piensijnaha ŭzrostu ŭ Šviejcaryi. Moładzievaje adździaleńnie Svabodnaj demakratyčnaj partyi prapanavała pavysić uzrost vychadu na piensiju na hod — z 65 da 66 hadoŭ, a zatym pryviazać jaho da praciahłaści žyćcia. 74,7 adsotka hramadzian prahałasavali suprać hetaj idei.

Charakterna, što papiaredni refierendum pa pytańni piensijnaha ŭzrostu ŭ Šviejcaryi prachodziŭ tolki za paŭtara hoda da ciapierašniaha — u vieraśni 2022 hoda kraina prahałasavała za toje, kab pavysić piensijny ŭzrost dla žančyn na adzin hod, z 64 da 65 hadoŭ. Mužčyny ŭ Šviejcaryi taksama vychodziać na piensiju ŭ 65 hadoŭ.

Dla paraŭnańnia, u Niamieččynie piensijny ŭzrost pavyšajecca pastupova z 2012 hoda i da 2031 hoda dasiahnie 67 hadoŭ. U Biełarusi piensijny ŭzrost u žančyn pavysili da 58 hadoŭ, dla mužčyn da 63 hadoŭ.

U cełym, u Šviejcaryi nie zanadta časta pravodziacca reformy ŭ sistemie piensijnaha saczabieśpiačeńnia — «trynaccataja piensija» stała pieršaj takoj reformaj za apošnija dziasiatki hadoŭ. Ale ŭ inšych ekanamičnych śfierach šviejcarcy nie zaŭsiody padtrymlivajuć «levyja» idei — da prykładu, u 2016 hodzie hramadzianie admovilisia ad idei ŭviadzieńnia bazavaha biezumoŭnaha dachodu.

• 3
• 0
• 1
• 0
• 2
• 0
• 0
• 0