Łukašenka pra padručnik Koli pa fiłasofii: Jaki kašmar, što jany napisali — heta žach
Na naradzie z rektarami Łukašenka asablivuju ŭvahu źviarnuŭ na jakaść padručnikaŭ, pa jakich vučycca Kola.
Alaksandr Łukašenka raskazaŭ, što niadaŭna aznajomiŭsia z padručnikam pa fiłasofii dla studentaŭ VNU, pa jakim navučajecca małodšy syn Mikałaj.
«Słuchajcie, jaki kašmar! — daŭ svaju acenku Alaksandr Łukašenka. — Što jany napisali — heta žach! Savieckija padručniki davali vyraznyja strukturavanyja adkazy na ŭsie pytańni, a tam taki chłam… nivodny student heta nie vyvučyć».
U suviazi z hetym Łukašenka jašče raz paŭtaryŭ svajo patrabavańnie pryvieści ŭ paradak padručniki, asabliva školnyja, vykłaŭšy infarmacyju ŭ ich narmalnaj, dastupnaj dla navučencaŭ movaj.
U cełym na naradzie Alaksandr Łukašenka patrabavaŭ uzmacnić ideałahičny kantrol i jašče bolš abmiežavać svabodu vykładčykaŭ i studentaŭ.
Na jaho dumku, i zaraz u Biełaruś jeduć vučycca, «tamu što my zachavali lepšyja savieckija tradycyi».
Pry hetym Łukašenka pryznaŭ nizkuju jakaść biełaruskaj adukacyi. Pavodle jaho słoŭ, «ledź nie pałova» studentaŭ siońnia niezadavoleny jakaściu adukacyi.
«Dakładvajuć, vy nie paśpiavajecie za technałohijami, maładyja śpiecyjalisty davučvajucca na vytvorčaści. Kamu patrebnyja takija «śpiecyjalisty»?» — skazaŭ jon.
«Mnohija ŭciakli tudy [za miažu] za adukacyjaj, chutka pačynajuć razumieć roźnicu. Mnohija viartajucca, ale nie ŭsie. Hetaha chistańnia być nie pavinna. A heta — prahramy, heta vykładańnie, vykładčyki i jakasny vynik. Jak vy budziecie heta rabić — heta vaša prablema. Ale da vieraśnia, papiaredžvaju ŭrad, administracyju i ministra, my, jak pa škole, źbiaromsia i spytajem z kožnaha», — skazaŭ Łukašenka.
«Jak vy za ich zmahajeciesia? — praciahnuŭ Łukašenka temu emihracyi maładych ludziej. — Kankretnaje pytańnie, na jakoje ja chacieŭ by pačuć kankretny adkaz. Viadoma, jany mohuć viarnucca, ale z całkam pieraviernutaj śviadomaściu».
Alaksandr Łukašenka taksama zaklikaŭ da novych čystak u VNU.
«Adukacyja nikoli nie była i nie moža być pa-za palitykaj. Vy nie prosta dajacie prafiesiju, vy farmirujecie śvietapohlad maładych ludziej. Skažu prama: vy pieršyja adkazvajecie za nacyjanalnuju biaśpieku i niesiacie adkaznaść za zachavańnie suvierenitetu krainy. Kali siarod vas dahetul pracujuć ludzi, jakija nie padzialajuć našy padychody i našu palityku, dziaržaŭnuju ideałohiju, kali vy pracaŭładkoŭvajecie ŭčorašnich chistalnikaŭ «režymu», to jakija vysnovy ja pavinien rabić pra vas? Pytańnie dla razvažańnia i pryniaćcia rašeńniaŭ», — skazaŭ jon.
Na staranna zmantažavanaj narezcy vykazvańniaŭ Alaksandra Łukašenki na naradzie iznoŭ vyrazna zaŭvažny tremar hałavy.
«Šynvize — končany sadyst». Adzin z adyjoznych načalnikaŭ kałonii Babrujska pierabraŭsia ŭ Hiermaniju28
Kamientary