Aksana Jučkavič uziataja pad vartu pa kryminalnaj spravie. Jaje pieraviali ŭ Žodzina
Aksana — viadomaja i pavažanaja ŭ rymska-katalickaj supolnaści ŭ Biełarusi chryścijanskaja aktyvistka, žurnalistka.
Zatrymanaja 23 studzienia Aksana Jučkavič była ŭziataja pad vartu pa kryminalnaj spravie pa art. 342 KK («Arhanizacyja i padrychtoŭka dziejańniaŭ, jakija hruba parušajuć hramadski paradak). Jaje źmiaścili ŭ śledčuju turmu №8 u Žodzinie, paviedamlaje «Chryścijanskaja vizija».
Aksana — viadomaja i pavažanaja ŭ rymska-katalickaj supolnaści ŭ Biełarusi chryścijanskaja aktyvistka.
Jana naradziłasia 2 listapada 1989 hoda ŭ Parafjanavie, časta naviedvała Budsłaŭ ź pilihrymkaj. Viernica žyła aktyŭnym carkoŭnym žyćciom — u kafiedralnym sabory Minska śpiavała ŭ chory «Hłoryja», jeździła ŭ ekumieničnuju manaskuju supolnaść Teze, u studenctvie ŭdzielničała ŭ kafiedralnych maładziožnych scenkach na čuvańni, paśla pierajezdu ŭ Zasłaŭje aktyŭna ŭdzielničała ŭ žyćci miascovaj parafii.
Akramia hetaha, Aksana była źvienavoj u arhanizacyi katalickich skaŭtaŭ, navučajučy padletkaŭ pavažliva stavicca da navakolnaha śvietu. Vučyła jana i sieminarystaŭ miždyjacezijalnaj sieminaryi, vykładajučy im padrychtoŭčy kurs polskaj movy.
Pracavała Aksana i ŭ katalickaj žurnalistycy — spačatku ŭ vydaviectvie «Pro Christo», potym na aficyjnym ahulnanacyjanalnym katalickim partale catholic.by. Jana šmat pisała ab ludziach i ich cikavych losach. Padčas vizitu dziaržsakratara Apostalskaj Stalicy kardynała Pjetra Paralina ŭ Biełaruś u 2015 hodzie ad imia partała Aksana brała ŭ jaho intervju.
Šmat svaich sił i enierhii viernica addavała dapamohi inšym ludziam, tym, chto mieŭ patrebu ŭ dapamozie. Pracavała ŭ Chryścijanskim sacyjalnym centry Dabračynnaj misii dobraha samaranina ŭ Minsku.
Adras dla listoŭ i hrašovych pieravodaŭ:
Jučkavič Aksanie Stanisłavaŭnie
ST-8, Žodzina vuł. Savieckaja 22A, 222163
Kamientary